Sapa wata may chhika terremotos tiyan. Wakin terremotosqa mana sinchʼichu, wakintaj may sinchʼipuni karqa, may chhika runasta wañuracherqa, tukuy imatataj chinkacherqa. Wakin terremotosqa jatuchachej tsunamista oqharicherqa, chay tsunamistaj mar kantupi tiyakojkunata may chhikata wañuracherqa. ¿Terremotosmanta Biblia parlanchu?

Kay yachaqanapi kay imasta yachakusun:

•  ¿Biblia nerqachu terremotos kananta?

•  Kay tiempopi terremotos, ¿Bibliaj profeciasnintachu juntʼashanku?

•  Chay profeciasmanta yachay, ¿imaynatá yanapawanchej?

•  Bibliaj profeciasninmanta, terremotosmanta ima pantasqa yuyaykuna

 Bibliaqa willawanchej Jesús terremotosmanta parlasqanta. Chaytataj kay kinsa versiculospi leerisunman:

 “Uj nacionqa waj nacionwan maqanakonqa, uj gobiernopis waj gobiernowan maqanakonqa. Kaynejpi jaqaynejpitaj yarqhaykuna, terremotos ima kanqa” (Mateo 24:7).

 “Uj nacionqa waj nacionwan maqanakonqa, uj gobiernopis waj gobiernowan maqanakonqa. Kaynejpi jaqaynejpitaj terremotos, yarqhaykuna ima kanqa” (Marcos 13:8).

 “Kallanqataj sinchʼi terremotos, kaynejpi jaqaynejpitaj yarqhaykuna, wañuchej onqoykuna ima” (Lucas 21:11).

 Jesusqa nerqa “kaynejpi jaqaynejpitaj” “sinchʼi terremotos” kananta, chaywan khuskataj guerras, yarqhaykuna, jatuchaj onqoykuna ima kananta. Kay imas pasanan karqa ‘kay mundoj imasninpa tukukuyninpi’ chayri ‘qhepa pʼunchaykunapi’ (Mateo 24:3; 2 Timoteo 3:1). Bibliaj nisqanman jina tanteaspaqa, reparanchej 1914 watapi qhepa pʼunchaykuna qallarisqanta, chay tiempotaj manaraj tukukunchu.

 Arí. Jesusqa nerqa terremotos kananta, chantá waj imaspiwan kananta, chaytaj kunan juntʼakushan. 1914 watamantapacha karqa 1.950 sinchʼi terremotos. Chaypitaj 2 millones runasmanta astawan wañorqanku. a Wakin terremotosmanta parlarina, chay terremotosqa pasaj 20 wataspi pasarqanku.

 Océano Índico (2004). Uj sinchʼi terremoto karqa, magnitud 9,1 escala de Richter nisqapi, chaytaj uj jatun tsunamita oqharicherqa. Chay tsunamiqa ashkha suyusman chayarqa, 225.000 runastataj wañucherqa.

 China (2008). Uj sinchʼi terremoto karqa, magnitud 7,9 escala de Richter nisqapi, chaytaj ashkha llajtasta chinkacherqa. Yachakusqanman jinataj 90 mil runas wañorqanku, 375 miltaj heridos karqanku. Chantapis may chhika runas mana wasiyoj qhepakorqanku.

 Haití (2010). Uj sinchʼi terremoto karqa, magnitud 7 escala de Richter nisqapi. Chay terremotoj qhepantataj ashkha kutistawan jallpʼa kharkaterqa. Chaypi wañorqanku 300 mil runasmanta astawan, uj millonmanta astawan runastaj mana wasiyoj qhepakorqanku.

 Japón (2011). Uj sinchʼi terremoto karqa, magnitud 9 escala de Richter nisqapi. Chaypa qhepantataj ashkha tsunamis karqa. Ajinapitaj 18.500 runas wañorqanku, may chhika runastaj wasisninkumanta riporqanku. Chantapis chay terremotoqa central nuclear de Fukushima nisqata lajrarparerqa, radiactivos nisqataj sururpamorqa. Chayrayku chaymanta chunka watasninkamapis 40 mil runas manaraj wasinkuman kutipuyta aterqankuchu.

 Biblia terremotosmanta parlaspa, imachus pisimantawan kananta willariwanchej. Jesús nerqa: “Chay imasta juntʼakojta rikuspaqa, yachaychej Diospa Gobiernon qayllitapiña kasqanta”, nispa (Lucas 21:31).

 Bibliaqa niwanchej Diospa Gobiernon kasqantapuni, cielopi kashasqanta, Reynintaj Jesucristo kasqanta. Jesustaj discipulosninman yachacherqa Diospa Gobiernota mañakunankuta (Mateo 6:10).

 Diospa Gobiernon jallpʼata kamachimushajtin, manaña pipis ñakʼarenqachu desastres, terremotos ima kasqanrayku (Isaías 32:18). Mana chayllachu, Diosqa terremotosrayku sufrejkunata sanoyachenqa (Isaías 65:17; Apocalipsis 21:3, 4). Astawan yachakuyta munaspaqa “¿Imastataj Diospa Gobiernon ruwanqa?” nisqa yachaqanata leeriy.