Grupo Banco Mundial nisqamanta presidente, junio de 2022 killamanta informepi nerqa: “Mundo enteropi qolqeqa watejmanta pisiyashan. Kunanqa tukuy ima aswan valesqa, runaspatataj pisilla qolqen tiyan gastananpaj”, nispa.

 Fondo Monetario Internacional nisqamanta kajkuna ninku: “Mikhunaspata, gasolinajta, dieselpata, waj imaspatapis precionqa usqhayllata wicharerqa. Chaytaj astawan llakicherqa wajcha suyuspi tiyakojkunata”, nispa.

 Bibliaqa willawanchej imajtinchus tukuy imaj precion wicharisqanta, chay kutispi imatachus ruwanata, maykʼajchus qolqemanta llakiykuna tukukunanta ima.

•    Bibliaqa kay tiemponchejta ‘qhepa pʼunchaykuna’ nispa sutichan (2 Timoteo 3:1).

•    Jesusqa nerqa qhepa pʼunchaykunapi ‘mancharina imas’ runasta manchachinanta (Lucas 21:11). Tukuy imajta precion yapakojtenqa, runasqa mayta mancharinku, imajtinchus mana yachankuchu imachus qhepaman kananta, familiankutapis mantieneyta atinankutachus manachus.

•    Apocalipsis libroqa nerqaña qhepa pʼunchaykunapi mikhuna aswan valesqa kananta. Apocalipsis libro nin: “Chantá [...] ujninku nerqa: Iskay libra trigo uj jornal pagopaj, sojta libra cebadataj uj jornal pagollapaj kanqa”, nispa (Apocalipsis 6:6, Diospa Qhelqachisqan).

 Qhepa pʼunchaykunamanta, Apocalipsis libroj profecianmantawan yachakunaykipaj, 1914 watamantapacha kay mundoqa uj jinaman tukun nisqa videota qhawariy, “¿Ima niyta munan tawa caballospi lloqʼasqa kajkuna?” nisqa yachaqanatawan leeriy.

•   “Wasista ruwakonqanku, chaypitaj tiyakonqanku, uva huertasta churanqanku, poqoynintapis mikhonqanku. Wasistaqa mana wajkunalla tiyakunankupajchu ruwanqanku, uva huertastapis mana wajkunalla mikhunankupajchu churanqanku” (Isaías 65:21, 22).

•   “Jallpʼapeqa ashkha trigo poqonqa. Orqo puntaspi trigoqa mana oqhariy atinata poqonqa” (Salmo 72:16).

•   “Jehová Diosqa nin: ‘Wajchasta kʼumuykachachinku, wajchasta ñakʼarichinku, chayrayku noqa oqharikusaj wajchasta libranaypaj’” (Salmo 12:5). a

 Kay tiempopeqa wakillan ashkha qolqeyoj kanku, wakintaj wajchas kanku. Diostajrí pisimantawan mundo enteropi chayta tukuchenqa. Imaynatachus chayta ruwananta yachanaykipaj, “¿Es realista esperar un sistema económico justo?” nisqa yachaqanata leeriy.

 Jinapis chay imastaqa aswan qhepamanraj Diosninchej ruwanqa, chaykamataj kunan Biblia yanapasunkiman. Bibliaqa sumajta yuyaychawanchej qolqenchejta mana usqhayllata tukurparinapaj (Proverbios 23:4, 5; Eclesiastés 7:12). Chaymanta astawan yachakunaykipaj “Qolqeta, kapuyninchejtapis waqaychana”, chantá “Cómo vivir con menos” nisqa yachaqanasta leeriy.