Wata watami may chaycho lapan tiempunwan sirvej achca hermanucuna, Escuela Bíblica de Galaad nishganman aywapäcun; cay Escuelaga Patterson (Nueva York) marcachomi caycan. a Cay escuelapita yargoj hermanucunaga Jehovapa marcancho masraj yanapacunanpaj listo carcaycan. Yachacushgancunaga alapami yanapacun may chaycho congregaciuncunata y sucursalcunatapis.

 Galaad escuelamanga achca naciuncunapitami estudianticuna shapäcamun. 2019 watacho ruracashgan 147 caj clasichoga, 29 naciuncunapitami shapäcamurgan 56 estudianticuna. Chay estudianticunaga manaraj Galaadman aywar mayna sirvircaycanman betelitano, misioneruno, precursor especialcunano o congregaciunta watucojnopis.

 Galaadcho escuela galaycunanpäga imaycapis ruranapäraj caycan. Departamento de Viajes nishgancho aroj hermanucunaga naupalapitana aviunpaj pasajita rantipäcun chay escuelaman aywaj hermanucunapaj. 147 caj clasiman aywaj cajcunapa pasajinchoga gastacarganshi 3 mil solispita ichic masla (aywanapaj y cutinapaj pasajicho). Islas Salomón marcapita estudianticunaga, escuelanman chayananpäga chuscu aviunwanräshi viajargan, y cutipäcunanpäga quimsa aviunwanraj viajargan. Chauraga paycunaga achca junajcunata viajapäcurgan y pasajincunaga jucnin jucninpaj 8 mil soliscunano cargan. Encargado hermanucunaga calpachacärinmi pasajicunacho alapa mana gastanapaj. Pasajicunata rantipäcunanpäga acha sitiucunachoraj tapucärin, öraga quillacunaraj pasan taripäcunanpaj. Departamento de Viajes nishganpis utilizapäcunmi waquincuna achca cuti viajashganraycur juntacashgan guellayta (chayga ninan créditos de aerolínea o millas de viajero).

 Achca estudianticunaga permisutarämi charanman Estados Unidos naciunman yaycunanpäga. Chaymi leycunata tantiaj encargado hermanucunaga yanapacunmi chay lapancho. Permisuta jorgunapäga guellaypärämi, 1500 soliscunano gastacan jucnin jucninpaj.

 Chay estudianticuna yachacushganga noganchicunatapis yanapämanchimi. Hendra Gunawan wauguiga, ancianuno yanapacun congregaciunnincho, Sureste Asiático sitiucho; chaychoshi jina yanapacun Galaadpita juc matrimonio. Wauguilanchi cayno nin: “Unayga maygan precursorlapis congregaciunnïcho carganchu. Pero Galaadpita chay matrimonio chayamuptenga cushi cushilami yanapacärergan y waquincunapis precursormanmi ticrapäcurgan. Y congregaciunninchipitapis juc hermana, Diospa Gobiernunpita yachachicunapaj Escuelaman aywargan”.

 Sergio Panjaitan hermanupis juc sucursalcho arun Galaad escuelapita yargoj hermanucunawan. Paymi cayta nin: “Aywashgan escuelacho yachacushgan hermanucunaga, manami paycunalapächu yachacärish, noganchicunatapis yanapämanchimi. ¡Ima aycatami musyapäcun! Pero manami mayganlapis ninchu ‘nogami pipitapis más yachaj cä’ nir. Chayno cashganga shacyächicunmi, waquincunatapis shacyächinapaj listo caycanchi”.

 ¿Lapan gastucunapäga maypitataj guellay yargun? May chaypita apachicushganchi guellaywanmi. Imano apachicunapäga yanapacunmi cay página: donate.pr418.com. Agradecicunchimi guellayniquiwan aycalawanpis yanapacamushgayquipita; chaynoparaj may chaypita hermanucuna escuelanman aywapäcun.