“19 watapana shuyaraycargä” nergan juc waugui, quiquinpa rimaynincho yargamushgan Bibliapaj parlar; chayga caycan la Traducción del Nuevo Mundo de las Escrituras Griegas Cristianas bengalí rimaycho. Achca runacunapis chaynolami nipäcun Traducción del Nuevo Mundo idiumancho yargamuptin. Ichanga, ¿tapucushcanquichu ayca trabajutaj caycan Bibliacuna ruracänanpaj?

 Naupataga Comité de Redacción del Cuerpo Gobernante nishgancho aroj encargado hermanucunami yanapacun pïcuna Bibliata traducipäcunanpaj. ¿Ayca tiempuchotaj Bibliata traducipäcun? Warwick (Nueva York) marcacho caycaj, Traducciuncho yanapacoj Nicholas Ahladis wauguimi cayno nin: “Imaycarämi caycan ruranapaj: aycajraj traducciuncho yanapacunga, facilchuraj canga chay idiumacho traducinapaj, y chay rimaycho liejcuna musyanchuraj unay wichanpaj Biblia wilacamushganta. Jina ricänanchiraj lapan runacuna chay rimayta tantiapashganta o mana. Escrituras Griegas Cristianas cajta traducir ushanapäga, öraga quimsa watacunanorämi pasan; y lapan Bibliata traducinapäga chuscu watacunanorämi canman. Y más tiempuraj pasan señas idiumacho ruracänanpäga”.

 Bibliata traducinapäga manami traducturcunalachu caycan, achca hermanucunarämi yanapacun. Traduciycashganchita leichinapaj hermanucunatami necesitanchi, paycunaga may chay naciuncunapitami yanapacamun. Traducciunninchi imano caycashganta nimashganchicunaga yanapämanchi imalatapis alchapänapaj. Sudáfrica naciunpita traducturcunata yachachej juc waugui cayno nin: “Bibliata traducejcunaga alapami calpachacärin, quiquin Jehová Diospa Palabranta traducircaycashganraycur, y runacuna imano tantiananpäpis yarpachacärinmi”.

 Traduciyta usharerga imprimicämunna y encuadernacämunna Bibliacuna. Lapan ruracämunanpäga caycunarämi canman: papel, tinta, garanpaj cajcuna, pegamento, garan imano ricacänanpaj cajcuna, película de plata nishgan, cintacuna, cabezadas nishgancuna, wajtanpaj cartoncuna y mana rachicänanpaj materialcunapis. 2019 watachoga 20 millones dólares cajcho gastacargan chay lapan materialcunalacho. Y chay watalachoshi 300.000 horacunano hermanunchicuna arupäcurgan Bibliacunata rurar ushananpaj.

 ¿Imanirtaj tiemputa y achca guellayta gastanchi chay lapan trabajucho? “Chaytaga ruranchi Biblia ima librupitapis más ali caj libro captin”, nin Joel Blue hermanunchi (Departamento Internacional de Impresión nishgancho arun). Caytapis ninmi: “Cuyaylapämi canman, chayno Diosninchita alabanapaj, y predicanapaj ali wilacuynincunapis ali ricacänanpaj”.

 Chaypitapis jorgunchimi Traducción del Nuevo Mundo Bibliata Braille nishgancho, 10 idiumacunacho. Braille nishgancho juc Bibliata ruranapäga 8 horacunatarämi necesitacan, y mashtaycur jucnin jucninta churaycurga 2,3 metrucunami caycan. Jina presuraycajcunapäpis jorgunchimi Bibliata, ichanga cay Bibliacunapa garanga papel-lapita canman.

 La Traducción del Nuevo Mundo nishgan Biblianchega liejcunapa shongunmanmi chayan. Tombe (República Democrática del Congo) marcacho caycaj juc congregaciunpita parlarcushun, chaychoga kiluba idiumatash parlapäcun. Cay marcaga, jatun caj marcapita más caruräshi caycan, 1.700 kilometruspitapis más carucho. Chaycho hermanucunaga juc Bibliatash kiluba rimaycho chararargan, y leipäcuptenga shumajga manashi tantiacajchu. Y reuniunpaj preparacärinanpaj jucnin jucninshi prestanacärej. Ichanga 2018, agosto quillapitaga lapan hermanucunana Traducción del Nuevo Mundo Bibliata kiluba rimaycho charapäcun.

 Alemaniapitapis juc cristiana, idiumancho caycaj Traducción del Nuevo Mundo Bibliapita cayno nin: “Manami nïnachu Bibliäta leinäpaj. Cananga tapucö, ‘¿imaytaj Bibliäta leir siguishaj?’ nir”. Juc presupis cayta escribergan: “Traducción del Nuevo Mundo Bibliatami goycalämargan y yanapaycämanmi vidächo. Cay Bibliawanrämi shumaj tantiapaycä Dios escribichimushgan Palabranta. Testigucunapita más yachacuyta munä y ‘paycunano canäpaj imataraj ruräman’ nëmi”.

 Traducción del Nuevo Mundo Bibliata liejcunaga agradecido carcaycan apachicushgayqui guellaywan Bibliacuna ruracashganpita. Guellayniquita imano apachicunayquipaj cay paginaman yaycuy: donate.pr418.com. Graciaslä guellayniquiwan yanapacamushgayquipita.