Éxodo 10:1-29
10 Tsaypitami Moisésta TAYTA DIOS kayno nirqan: “Faraón kaqman ayway. Aläpa mantsariypaq castïgukunawan castiganäpaqmi paypata y mandäshiqninkunapatapis shonqunta chukruyätsishqä.
2 Munayniyuq TAYTA DIOS kashqäta tantiyarmi Egiptucho espantaypaq castigashqäta wamraykikunata y wilkaykikunatapis wilapankipaq”.
3 Tsayno niptinmi Moisés y Aarón Faraón kaqman aywaykur kayno nirqan: “Hebreo runakunapa* TAYTA DIOSNINMI kayno nin: ‘¿Imayyaqtaq mana cäsumankitsu? ¡Kuyashqä runakunata kachariy adoramaq aywapäkunanpaq!
4 Kachayta mana munaptikiqa wara junaqmi nacionnikiman atska chukluskunata yuritsimushaq.
5 Tsaykunami juntakämunqa alpapis mana rikakashqanyaq. Runtu tamyapita qeshpiq kaq mikuytapis chipyaqmi ushanqapaq. Tsaynölami lapan yörakunatapis kachkashpan ushanqapaq.
6 Tsaykunami juntanqa palaciuykimanpis, mandäshishuqnikikunapa wayinkunamanpis y intëru Egiptucho taq runakunapa wayinkunamanpis. Taytaykipis ni awkiluykikunapis tsaytanöqa manami imaypis rikashqatsu’ ”.
Tsayno niyta usharkurna Moisés aywakurqan Faraónpa palaciunpita.
7 Tsawraqa mandäshiqninkuna Faraónta kayno nipäkurqan: “Tayta, ¿imayyaqtaq tsay runa pasaypa desgracialacho tsararämäshun? Tsay runakuna jina aywapäkutsun TAYTA DIOSNINTA adorapäkunanpaq. ¿Manaraqku shumaq tantiyakunki Egiptucho imaykapis pasaypa ushakaykashqanta?”
8 Tsayno niptinmi Moisésta y Aarónta yapay qayaykatsir Faraón kayno nirqan: “Kananqa aywapäkuy TAYTA DIOSNIKITA adorapäkunaykipaq. Itsanqa wilamay pïpïpis aywananpaq kashqanta”.
9 Tsawraqa Moisés kayno nirqan: “Noqakunaqa TAYTA DIOSTA adorarmi jatun fiestata rurapäkushaq. Tsaymi lapanï aywapäkushaq olqu tsurïkunata, warmi tsurïkunata y awkilükunatapis pushakurkur. Tsaynölami uyshäkunata, cabräkunata y wäkäkunata chipyaq qatikurkur aywapäkushaq”.
10 Tsawraqa Faraón kayno nirqan: “¡Achyä! ‘TAYTA DIOSMI yanapaykäman’ niq tumpala aywakärinaykipaq kashqanta ¿mana tantiyashqätaku yarparkaykanki? ¡Manami imanöpapis qamkunata y wamraykikunata aywakärinaykipaq kachapäshaykitsu!
11 Manami yarpashqaykinötsu kanqa. TAYTA DIOSTA adoraq aywayta munarqa olqu kaqkunala ayway. Olqu kaqkunala aywapäkunaykipaqmi manakamarqayki”.
Tsayno nirmi paykunata qarqunanpaq mandarqan.
12 Tsaypita Moisésta TAYTA DIOS kayno nirqan: “Egipto nacionman makikita toqriy atska chukluskuna shapäkamunanpaq. Tsay chukluskunami ushapäkunqa lapan plantakunata y runtu tamya ushashqanpita qeshpiqkunata”.
13 Tsayno niptinmi Egipto kaqpa tukrunta Moisés toqrirqan. Tsawraqa inti jeqamunan lädupita juk paqas y juk junaq TAYTA DIOS wayrätsimurqan. Patsa wararkunanpaqqa tsaytsika chukluskuna kaykänaq.
14 Tsaynöpami intëru Egiptuman chukluskuna juntarqan. Tsayjinanpaqa chukluskuna manami imaypis karqantsu ni imaypis kanqapaqtsu.*
15 Tsaymi juntarqan pampapis mana rikakashqanyaq. Tsayno timpuyparaq karmi mikurqan lapan plantakunata y runtu tamyapita qeshpiq yörakunapa wayuynintapis. Tsaymi Egiptucho yörakunapis qewakunapis verdiqa mana karqannatsu.
16 Tsaymi Moisésta y Aarónta jukla qayaykatsir Faraón kayno nirqan: “Mana wiyakuypa TAYTA DIOSNIKIPA contran y qamkunapa contrayki karmi jutsata rurashqä.
17 Tsaymi qamkunata ruwakü kananlana perdonamänaykipaq. Tsaynöpis TAYTA DIOSNIKITA manakuykulay kay chukluskunata elqätsinanpaq”.
18 Tsawraqa Faraónpa palaciunpita Moisés yarqurirmi TAYTA DIOSTA jukla manakurqan.
19 Manakuptinmi inti jeqanan lädupita TAYTA DIOS fiyupa wayrätsimurqan. Tsay wayra lapan chukluskunata Puka Lamarman apaptinmi intëru Egiptucho elqarqanna.
20 Tsayno kaptinpis Faraónpa shonqunta TAYTA DIOS yapay chukruyätsiptinmi Israel runakuna yarqunanta mana munarqantsu.
Patsa tsakakäkushqan
21 Tsaypitami Moisésta TAYTA DIOS kayno nirqan: “Jana patsapa makikita joqariy intëru Egiptucho pasaypa yanawyayparaq patsa tsakakäkunanpaq”.
22 Nishqanno makinta Moisés joqariptinmi kimsa junaqyaq Egiptucho pasaypa tsakakäkurqan.*
23 Tsawraqa Egipto runakunaqa kimsa junaq pitapis mana rikarqantsu ni maypa aywaytapis mana kamäpakurqantsu. Israel runakuna tashqanchömi itsanqa atsikyarqan.
24 Tsawraqa Moisésta qayaykatsir Faraón kayno nirqan: “Wamraykikunata pushakurkur TAYTA DIOSTA adoranaykipaq lapayki aywapäkuy. Uyshaykikunata, cabraykikunata y wäkaykikunata itsanqa kaycho kachaykuy”.
25 Faraón tsayno niptinmi Moisés kayno nirqan: “Uywäkunata qatinäta mana munarqa ¿qamtsuraq uywakunata kamaripämanki TAYTA DIOSNÏTA adorar sacrificiukunata rupatsipäkunäpaq?
26 Uywäkunataqa juktapis mana kachaypami lapanta qatipäkushaq. Tsay uywakunapitami akrapäkushaq sacrificiuta rupatsir TAYTA DIOSNÏTA adorapäkunäpaq. Manaraq chayarqa manami musyapäküraqtsu ayka uywata rupatsinäpaq kashqantapis”.
27 Tsayno niptinmi Faraónpa shonqunta TAYTA DIOS yapay chukruyätsirqan Israel runakunata mana kachananpaq.
28 Tsaymi Moisésta Faraón kayno nirqan: “Kaypita aywakuy. Kananpitaqa manami qamta rikaytapis munätsu. Yapay kutimuptikiqa supaynikitami apatsishaykipaq”.
29 Tsayno niptinmi Moisés kayno nirqan: “Awmi tayta, kananpitaqa manami imaypis rikamankipaqnatsu”.
Ichic wilacuycuna
^ 10.3 Hebreo runakunaqa Israel runakunami karqan. Tsaymi Moiséspis hebreo runa karqan.
^ 10.12-14 Apoc. 9.2-3.
^ 10.22 Sal. 105.28; Apoc. 16.10.
