Éxodo 11:1-10
11 Tsawraqa Moisésta TAYTA DIOS kayno nirqan: “Yapayraqmi Faraónta y Egipto runakunata castigashaq. Tsayno castigaptïraqmi kaypita aywakärinaykipaq kikin qarqushunkipaq.
2 Kanan Israel runakunata olqutapis warmitapis ninki qellaypita y qoripita rurashqa alhäjakunata Egipto runakunata cada ünun manakärinanpaq”.
3 Tayta Diosmi Egipto runakunapa yarpayninman churarqan Israel runakunata ali rikananpaq. Tsaynölami Faraónpa mandäshiqninkuna y wakin Egipto runakunapis yarparqan Moisés imaykapaqpis munayniyuq kashqanta.
4 Tsaymi Faraónta Moisés kayno nirqan: “TAYTA DIOS kaynömi nishqa: ‘Pulan paqasmi pasashaq intëru Egiptupa.
5 Tsaypa pasaptïmi lapan Egipto runakunapa qechpa olqu tsurinkuna wanunqa. Faraónpa qechpa tsurinpita qalaykur hasta mulinucho aqaq ashmay warmipa wawanpis qechpa kaqqa wanunqami. Tsaynölami lapan uywakunapa punta yuriq orqu wawankunapis wanur ushakanqapaq.
6 Tsayno wanuptinmi Egiptucho runakuna pasaypa lakikushpan waqapäkunqapaq. Tsay runakuna waqashqannöqa manami imaypis Egiptucho runakuna waqashqatsu ni waqanqapistsu’ ”.
7 “Egipto runakuna tsayno waqaptinpis Israel runakuna tashqan kaqchöqa manami alqulapis aulanqatsu. Israel runakuna kaqcho runakunapis ni uywakunapis mana wanuptinmi musyapäkunki Israel runakunata TAYTA DIOS kuyashqanta.
8 Tsayraqmi mandäshishuqnikikunapis nawpäman qonqurpakuykur kayno nimanqapaq: ‘Israel runakunata kaypita pushakurkur aywakuy’. Manaraq tsayno nimaptinqa manami yarqushaqtsu”.
Tsayno nirkurmi pasaypa rabyashqa Moisés aywakurqan Faraónpa nawpanpita.
9 Tsaypitami Moisésta TAYTA DIOS kayno nirqan: “Imata niptikipis Faraónqa manami cäsushunkipaqtsu. Tsaymi kay Egiptucho mantsariypaq castïgukunawan castigashaq”.
10 Faraónpa nawpancho Moisés y Aarón mantsariypaq kaqkunata ruraptinpis TAYTA DIOSMI Faraónpa shonqunta chukruyätsirqan. Tsaymi Israel runakuna Egiptupita aywananta Faraón mana kachaparqantsu.
