Éxodo 13:1-22
13 Tsaypitanami Moisésta TAYTA DIOS kayno nirqan:
2 “Israel runakunapa qechpa kaq olqu tsurinkunata y uywakunapa punta yuriq orqu wawankunatapis noqapaq apapäkamunki. Tsaykunaqa noqapami kaykan”.*
3 Tsawraqa lapan runakunata Moisés kayno nirqan: “Egiptupita kanan junaq munayninwan TAYTA DIOS jorqamashqantsita ama qonqapäkunkitsu. Kanan junaqmi ashmay kaykashqantsipita jorqaykämantsi. Cada wata kay junaqta yarpar levadürayuq tantata ama mikupäkunkitsu.
4 *Abib killachömi yarquykantsi.
5 Tsawraqa unay ayluntsikunata Tayta Dios promitishqan nacionman chayaykur Abib killacho cada wata fiestata rurapäkunki. Tsaychöqa lëchipis abëjapa mishkinpis yakunöraqmi atska kaykan. Tsaycho tarkaykan cananeo runakuna, heteo runakuna, amorreo runakuna, heveo runakuna y jebuseo runakunami. Paykuna tarkaykashqan naciontami TAYTA DIOS qoshunkipaq.
6 “Tsay fiestata rurashpayki qanchis junaq levadüraynaq tantalata mikupäkunki. Qanchis kaq junaqchöqa tutapita tardiyaq TAYTA DIOSTA adorapäkunki.
7 Qanchis junaq fiestata rurashpayki levadüraynaq tantata mikupäkunkipaq. Qamkuna tashqaykichöqa tsay junaqkuna levadüra ni levadürayuq tantapis ama kanqatsu.
8 “Tsay junaqmi tsurikikunata kayno nir wilapankipaq: ‘Kay fiestata ruraykantsi Egiptupita TAYTA DIOS jorqamashqantsita yarpashpantsimi.
9 Runakunapa rikrancho o urkuncho señal kashqannömi tsay fiestapis señal kanqa TAYTA DIOS qomashqantsi leykunapita imaypis mana qonqaypa parlanantsipaq. Tsayno kanqa Egiptupita munayninwan TAYTA DIOS jorqamashqantsipitami.
10 Tsayno kaptinmi cada wata TAYTA DIOS nimashqantsi junaqcho kay fiestata mana qonqaypa ruraykantsi’.
11 “Cananeo runakuna tashqan nacionta qoshunaykipaqmi unay ayluntsikunata y qamkunatapis TAYTA DIOS promitishushqanki. Tsayman TAYTA DIOS chayaykatsir entregashuptikimi
12 qechpa olqu tsurikikuna TAYTA DIOSPAQ kanqa. Tsaynöla uywaykikunapa punta yuriq orqu wawankunapis TAYTA DIOSPAQ kanqa.*
13 Manta bürrupa punta kaq orqu wawanpa trukanta carnishta karpis o chïvuta karpis sacrificiupaq apapäkunki. Trukanta mana aparqa bürru malwapa kunkanta pakirinki. Qechpa tsurikikunapa trukantapis Tayta Dios nishqannöla qellayta* apapäkunki.
14 “Waray warantin tsuriki ‘¿imanirtaq kay fiestata ruraykantsi?’ nir tapushuptiki kayno ninki: ‘Egiptucho noqakuna ashmay kashqäpitami munayninwan TAYTA DIOS jorqamarqan.
15 Tsaychömi Faraónpa shonqun chukruyaptin mana munarqantsu yarqupäkamunäta. Tsaymi TAYTA DIOS wanutsirqan lapan Egipto runakunapa qechpa olqu tsurinkunata. Tsaynölami wanutsirqan lapan uywankunapa punta yuriq orqu wawankunatapis. Tsaymi uywapa punta yuriq wawan orqu yuriptinqa sacrificiupaq rupatsintsi. Qechpa tsurintsi olqu yuriptinqa TAYTA DIOS nishqannölami qellayta apantsi.
16 Egiptupita TAYTA DIOS munayninwan jorqamashqantsita imaypis yarparänantsipaqmi runakunapa rikrancho o urkuncho señal kashqanno kay fiestapis señal kaykan’ ”.
Ninawan pukutay kashqan
17 Tayta Dios musyarqanmi filisteo runakuna atacaptin Israel runakuna mantsakur Egiptuman kutikärinanpaq kashqanta. Tsaymi Israel runakunata Egiptupita Faraón kachariptin filisteo runakunapa nacionninman aywaq nänipa, cerca kaptinpis, Tayta Dios manami pusharqantsu.
18 Tsaypa trukanqa chunyaq jirkapami tumatsirqan Puka Lamarman aywaq nänipa. Egiptupita yarqamur Israel runakunaqa punta punta soldädukunanöraq aywapäkamurqan.
19 Egiptupita Israel runakunawan yarqamurmi Moisésqa Josépa tulunkunata apamurqan. Manaraq wanurmi Israel runakunata José kayno nir ruwakurqan: “*Canaánman kutipäkunaykipaq Tayta Dios rasunpami shamur yanapashunkipaq. Tsayno yanapashuptiki kaypita aywakur tulükunatapis apakulanki*”.
Tsayno nirmi Tayta Diospa jutincho juratsirqan.
20 Sucotpita aywakurmi Israel runakuna Etamman chayarqan. Tsaypitaqa chunyaq jirkanami qalaykun.
21 Israel runakunata pushashpanmi junaqpa TAYTA DIOS aywarqan ichiraykaq pukutaycho. Tsakaypanami atsikyapänanpaq ichiraykaq ninacho aywarqan. Tsaynöpami tsakaypapis y junaqpapis Israel runakuna aywapäkurqan.
22 Junaqpaqa ichiraykaq pukutaymi paykunapa puntanta imaypis aywaq. Tsakaypanami ichiraykaq nina mana upiypa atsikyapaq.*
Ichic wilacuycuna
^ 13.2 Éxo. 13.11-16; Núm. 3.13; Luc. 2.23.
^ Abib killa Abib killa imay qalaykushqanta runakuna musyananpaq shuyararqan trïgu shikshiyta qalaykuptin killa ushashqanyaq. Tsay junaqnami karqan Abib killa qalaykunan.
^ 13.13 Núm. 18.15-16.
^ Canaán Canaánchöqa atska markakunami karqan. Cada markachömi juk mandaq rey karqan. Tsaychömi tarqan ceneo runakuna, cenezeo runakuna, cadmoneo runakuna, heteo runakuna, ferezeo runakuna, refaíta runakuna, amorreo runakuna, cananeo runakuna, gergeseo runakuna y jebuseo runakunapis (Gén. 15.19-21). Abrahamtami Tayta Dios promitirqan paypita miraqkunata Canaánta qoykunanpaq (Gén. 17.8).
^ 13.19 Gén. 50.25; Jos. 24.32.
^ 13.21-22 Éxo. 40.34-38; Núm. 9.15-23.
