Éxodo 16:1-36
16 Elim partipita aywakurmi Israel runakuna chayarqan chunyaq jirka Sin partiman. Tsayqa kaykan Elimpita Sinaíman aywaqchömi. Tsayman chayarqan Egiptupita yarqupäkushqanpita juk killa chunka pitsqa junaqtami.
2 Tsay chunyaq jirkachömi Israel runakuna Moiséspa y Aarónpa contran sharkur
3 kayno nipäkurqan: “Egiptulachöna TAYTA DIOS wanutsimaptintsi alimi kanman karqan. Tsaychöqa saksaqpaqmi mikurqantsi. Aytsapis mankantsicho manami pishirqantsu. Qamkunaqa kay chunyaq jirkaman pushapäkamashqanki yarqaypita wanutsimänaykipaq”.
4 Tsayno niptinmi Moisésta TAYTA DIOS kayno nirqan: “Jana patsapitami tamyatanöraq mikuyta shikwatsimushaq.* Tsayta runakuna waran waran shuntatsun tsay junaq mikunanpaq tupuyla. Nishqäno shuntaptinmi musyashaq cäsukamashqanta. Nishqäpita masta shuntaptinmi itsanqa musyashaq mana cäsukamashqanta.
5 Soqta kaq junaqchöqa ishkay junaq mikunanpaq tupuy shuntapäkutsun”.
6 Tsawraqa Moisés y Aarón Israel runakunata kayno nipäkurqan: “Kanan tardimi musyapäkunkipaq Egiptupita kikin TAYTA DIOS jorqamushushqaykita.
7 Tsaynölami wara tutapis TAYTA DIOS munayniyuq kashqanta rikapäkunkipaq. Pay musyanmi contran rimarkaykashqaykita. ¡Noqakunapa conträ parlanaykipaqqa pitaq kä!”
8 Mastapis Moisés kayno nirqan: “¿Imanirtaq conträ rimarkaykanki? Qamkunaqa manami noqakunapatsu conträ rimarkaykanki, sinöqa TAYTA DIOSPA contranmi. PAYMI mayashqa contran sharkushqaykita. Tsayno kaptinpis kanan tardimi aytsata mikunantsipaq kamaripämäshun. Wara tutanami mikuyta kamaripämäshun”.
9 Nirkurmi Aarónta Moisés kayno nirqan: “TAYTA DIOSMI mayashqa Israel runakuna contran rimapäkushqanta. Kananqa Israel runakunata wilay TAYTA DIOSPA nawpanman juntakänanpaq”.
10 Israel runakunata Aarón parlapaykaptinmi chunyaq jirka läducho TAYTA DIOSPA chipchipyayninta pukutaycho rikapäkurqan.
11 Moisésta TAYTA DIOS kayno nirqan:
12 “Mayashqämi Israel runakuna conträ rimarkaykaqta. Kanan paykunata kayno wilay: ‘Tardipami aytsata mikupäkunkipaq. Tutapanami saksashqaykiyaq mikuyta mikupäkunkipaq. Tsaynöpami musyapäkunkipaq TAYTA DIOSNIKI kashqäta’ ”.
13 Tsay tardimi atska codornizkuna Israel runakunapa campamentunman ratapäkurqan. Patsa wararkuptinnami campamentu nawpankunapapis yoraqayparaq shulyashqa warämurqan.*
14 Shulya tsakirkuptinnami rashta niraq pampacho karqan.
15 Tsayta rikaykur Israel runakuna ima kashqantapis manami musyapäkurqantsu. Tsaymi jukninpis jukninpis nipäkurqan: “¿Imaraq kayqa?”*
Tsawraqa Moisés kayno nirqan: “Kayqa kaykan TAYTA DIOS kamaripämashqantsi mikuymi.
16 TAYTA DIOS kaynömi nishqa: ‘Cada junaq mikunaykipaq tupuyla shuntapäkunki. Aykaqpis tolduykicho kashqaykiman tupu cada ünuykipaq ishkay matitano shuntapäkunki’ ”.
17 Tsay nishqannölami Israel runakuna shuntapäkurqan. Tsaymi walkaqla karqa walkalata shuntapäkurqan. Atskaq karqa atskatami shuntapäkurqan.
18 Matiwan tupuylapami shuntapäkurqan. Atskata shuntaptinpis manami putsurqantsu. Walkalata shuntaptinpis manami pishirqantsu.* Cada ünun shuntapäkurqan tsay junaq mikunanpaq tupuylatami.
19 Tsawraqa Moisés kayno nirqan: “Warapaqqa mayqaykipis mikuyta ama putsütsinkitsu”.
20 Tsayno niykaptinpis wakinkunaqa mana cäsukurmi waraynin* junaqpaqpis mikuyta putsütsirqan. Tsay putsushqan mikuy waraynin junaq rikaykunanpaqqa pasaypa kuruyashqa karmi asyaykänaq. Tsaymi mikuy putsütsiqkunata Moisés fiyupa olqüparqan.
21 Tsaypitaqa mikuyta ushananpaq tupuylanami cada tuta jukninpis jukninpis shuntapäkurqan. Mana shuntashqan kaqtaqa shanaymi tsulutsiq.
22 Soqta kaq junaqchömi itsanqa ishkay junaq mikunanpaq shuntapäkurqan. Tsaymi cada ünunpaq shuntarqan chusku mati juntata. Tsayno shuntaptinmi mayor runakuna aywarqan Moisésta wilananpaq.
23 Tsawraqa Moisés kayno nirqan: “Tsayno shuntananpaqmi TAYTA DIOS nishqa. Wara junaqqa Tayta Diosta adoranantsipaq jamay junaqmi kaykan.* Tsaymi yanukunaykipaq kaqtaqa warapaqwan yanukunki y timputsinaykipaq kaqtapis kananlana timputsinki. Putsuq kaqtaqa churanki wara junaq mikunaykipaq”.
24 Moisés nishqannölami yanurkur churapäkurqan waraynin junaq mikunanpaq. Waraynin junaq rikaykunanpaq tsay churashqan mikuy manami kuruyarqantsu ni asyarqantsu.
25 Tsaypitanami Moisés kayno nirqan: “Kanan junaqqa TAYTA DIOSTA adoranantsipaq jamay junaqmi kaykan. Tsaymi qanyan churashqayki mikuylatana mikupäkunki. Mikuy shuntaq yarqurpis manami imatapis taripäkunkipaqtsu.
26 Soqta junaqlami mikuy kanqa shuntanaykipaq. Qanchis kaq junaqchöqa jamay junaq kaptin manami imatapis taripäkunkipaqtsu”.
27 Tsayno niykaptinpis wakin runakunaqa jamay junaq kaykaptinpis mikuy shuntaq yarqur manami imatapis taripäkurqantsu.
28 Tsawraqa Moisésta TAYTA DIOS kayno nirqan: “¿Imayyaqtaq mandamientükunata y leynïkunata mana cäsukärinkitsu?
29 Ama qonqapäkuytsu jamay junaqcho jamanaykipaq nishqäta. Jamay junaqpaqwanmi soqta kaq junaqcho mikuyta kamaripaykä. Tsaymi qanchis junaqchöqa maypapis mana yarquypa jamanki”.
30 Tsayno niptinmi qanchis kaq junaqcho lapan runakuna jamapäkurqan.
31 Israel runakuna shuntashqan mikuyqa karqan culandrupa murunnömi. Tsaynöpis tsay mikuy karqan yoraqmi. Tsayqa mishkirqan abëjapa mishkinwan rurashqa tantanömi. Tsaytami Israel runakuna *maná nipäkurqan.*
32 Tsaypitanami Israel runakunata Moisés kayno nirqan: “TAYTA DIOSMI kayno nin: ‘Qamkunapita miraqkuna rikananpaq ishkay matitano manáta churapäkuy. Tsaynöpami paykuna reqinqa Egiptupita jorqamur chunyaq jirkacho kamaripashqä mikuyta’ ”.
33 Nirkurmi Aarónta Moisés kayno nirqan: “Ishkay matiman tupurkur juk canastaman manáta winarkur TAYTA DIOSPA nawpanman churay.* Tsaycho churaranqa Israel runakunapita miraqkuna reqipäkunanpaqmi”.
34 Tsawraqa Moisésta TAYTA DIOS nishqannölami canastaman manáta winarkur *Pactu Babul nawpanman Aarón churarqan.
35 *Canaánpa lindërunman chayashqanyaqmi chusku chunka (40) wata Israel runakuna manáta mikurqan.*
36 Ishkay mati manáta canastaman winashqanqa karqan ishkay kïlunömi. Tsay tuputami gomer nipäkuq.
Ichic wilacuycuna
^ 16.12-13 Núm. 11.31-32.
^ 16.15 1Cor. 10.3.
^ 16.18 2Cor. 8.15.
^ 16.20 Wakin runakunaqa warantin nipäkun.
^ 16.23 Éxo. 20.8-11.
^ maná Manáqa karqan culandrupa murunno y jachapa weqin niraq qarwashlami. Tsay mikuytami Israel runakunata Tayta Dios kamariparqan chunyaq tsaki jirkacho. Tsaytami ankaypapis machkaypapis y tantata ruraykurpis mikupäkurqan. Israel runakunaqa chusku chunka (40) watami tsay mikuyta mikupäkurqan (Éxo. 16; Núm. 11.4-9; Juan 6.31).
^ 16.14-31 Núm. 11.7-9.
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
^ Canaán Canaánchöqa atska markakunami karqan. Cada markachömi juk mandaq rey karqan. Tsaychömi tarqan ceneo runakuna, cenezeo runakuna, cadmoneo runakuna, heteo runakuna, ferezeo runakuna, refaíta runakuna, amorreo runakuna, cananeo runakuna, gergeseo runakuna y jebuseo runakunapis (Gén. 15.19-21). Abrahamtami Tayta Dios promitirqan paypita miraqkunata Canaánta qoykunanpaq (Gén. 17.8).
