Éxodo 17:1-16
17 Sin nishqan chunyaq jirkacho tarkaykashqanpitami TAYTA DIOS nishqannöla Israel runakuna patsakur patsakur Refidim partiman chayapäkurqan. Tsaychöpis yaku manami karqantsu.
2 Tsawraqa runakuna Moisésta rabyashqa nipäkurqan: “¿Ima yakutataq kaycho upupäkushaq?”
Niptinmi Moisés nirqan: “ ‘Yaku manami kantsu’ nipäkamaptikipis ¿imatataq rurashaq? ¿Imanirtaq Tayta Diosta obligayta munarkaykanki yakuta kamaripäshunaykipaq?”
3 Moisés tsayno niptinpis runakuna fiyupa yakunashpanmi qayapar kayno nipäkurqan: “¿Kayno nakatsimänaykipaqku Egiptupita jorqamarqayki? ¿Lapan wamräkunata y uywäkunata yakunaypita wanutsimänaykipaqku jorqapäkamashqanki?”
4 Runakuna tsayno niptinmi TAYTA DIOSTA manakur Moisés kayno nirqan: “Kay runakunata ¿imatataq rurashaq, Tayta? Tsaynöla karqa saqmaykälarmi wanutsimanqapaq”.
5 Tsawraqa Moisésta TAYTA DIOS kayno nirqan: “Juk ishkay Israel mayor runakunata pushakurkur lapan runakunapa nawpanta aywanki. Paykunawan aywar mayuta wirushqayki tukruykita apanki.
6 Horeb* jirkacho kaykaq qaqachömi noqa shuyaraykäshayki. Tsay qaqata tukruykiwan wiruptiki yaku yarqamunqa lapan runakuna upunanpaq”.
Tsaymi TAYTA DIOS nishqanno Moisés rurarqan Israel mayor runakuna rikaykaptin.
7 Tsay partipa jutinta churaparqan Masah* jutin kananpaq y Meriba* jutin kananpaq. Tsay jutikunata churaparqan Israel runakuna descontentu kar “¿noqantsiwan TAYTA DIOS kaykanku o manaku?” nishqanpitami.
Amalecita runakunata vincishqan
8 Israel runakuna Refidimcho tarkaykaptinmi amalecita runakuna aywarqan paykunata atacananpaq.
9 Tsawraqa Josuéta Moisés kayno nirqan: “Runakunata akray amalecita runakunawan pelyaq aywapäkunaykipaq. Wara tutalami puntacho kaykäshaq Tayta Dios ‘apay’ nimashqan tukrü aptashqa”.
10 Moisés nishqannölami Josuéqa runakunata akrarkur amalecita runakunawan pelyaq aywarqan. Moisés, Aarón y Hurmi puntaman witsäpäkurqan.
11 Moisés ishkan rikranta joqariraptin Israel runakuna amalecita runakunata vincipäkuq. Rikranta Moisés utikar bäjatsiptinnami amalecita runakuna vincipäkuq.
12 Tsayno utikaptinmi Aarónwan Hur rumita churaparqan Moisés jamananpaq. Nirkur ishkan lädupa Moiséspa rikranta joqarirarqan inti jeqananyaq.
13 Tsaynöpami Josué y akrashqan runakuna espädankunawan wanutsir amalecita runakunata ushakätsirqan.
14 Tsawraqa Moisésta TAYTA DIOS kayno nirqan: “Mana qonqakänanpaq kay pelya kashqanta juk rölluman qelqay. Josuétana wilanki amalecita runakunata lapanta ushakätsinäpaq kashqanta”.*
15 Tsaypita Moisés juk *altarta perqarkur jutinta churaparqan TAYTA DIOSMI Bandërä nir.*
16 Nirkurna kayno nirqan: “TAYTA DIOSPA contran amalecita runakuna sharkushqanpitami paykunawan TAYTA DIOS imayyaqpis pelyanqa”.
Ichic wilacuycuna
^ 17.6 Horebqa Sinaí jirkapa jukaq jutinmi karqan.
^ 17.7a Masah ninanqa probaq ninanmi.
^ 17.7b Meriba ninanqa reclamay ninanmi.
^ 17.14 Deut. 25.17-19; 1Sam. 15.2-9.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 17.15 Hebreo idiömachömi tsay juti kaykan Yahweh-nissi.
