Éxodo 18:1-27
18 Madianita runakunapa cüran Jetrumi Moiséspa suedrun karqan. Paymi mayarqan Moisésta y Israel runakunatapis Tayta Dios yanapashqanta. Tsaynöpis mayarqan Egiptupita Israel runakunata TAYTA DIOS jorqamushqanta.
2 Mas puntalatanami Moisésqa warmin Séforata papänin kaqman kutinanpaq despacharqan. Chayaptinmi Jetruqa tsurin Séforata
3 ishkan wawantinta chaskikurqan.* Jäpa markacho tashqa karmi jukaq tsurinpa jutinta Moisés churaparqan Gersón jutin kananpaq.* *
4 Jukaqpanami jutin karqan Eliezer.* Tsay jutita churaparqan kayno nishpanmi: “Faraón wanutsimänanpaq kaykaptinmi papänï yärakushqan Tayta Dios qeshpimunäpaq yanapamashqa”.
5 Tsay witsanmi chunyaq jirkacho Israel runakunawan Moisés patsaraykarqan Tayta Dioswan tinkuna jirka cercancho*. Tsaymanmi wilkankunata y Séforata pushakurkur suedrun Jetro chayarqan.
6 Chayaykurmi Moisésta kayno nirqan: “Warmikita y tsurikikunata pushakurkurmi watukuq shamushqä, hïju”.
7 Tsaymi suedrun Jetruta chaskikushpan qonqurpakuykur Moisés winchikushpan mutsarqan. Imano kashqantapis wilapänakurkurmi toldunman yaykapäkurqan.
8 Tsaychömi suedrunta Moisés wilaparqan Israel runakunapa favornin sharkur Faraónta y qatipaq Egipto runakunata TAYTA DIOS ushakätsishqanta. Tsaynöpis wilaparqan Egiptupita yarqamur nänicho nakapäkushqanta y TAYTA DIOS imano yanapashqantapis.
9 Egiptupita Israel runakunata Tayta Dios jorqamushqanta wilapaptinmi Jetro pasaypa kushikushpan
10 kayno nirqan: “TAYTA DIOS alabashqa kaykulätsun. Paymi Faraónpa munaynincho kaykaptiki y Egipto runakuna nakaykätsishuptiki qamkunata jorqamushushqanki.
11 Egipto runakuna contrayki kaykaqta vincishqa kaptinmi tantiyakü lapan dioskunapitapis TAYTA DIOS mas munayniyuq kashqanta”.
12 Nirkurmi Jetruqa uywata pishtarkur Tayta Diospaq sacrificiuta rupatsirqan. Wakin uywakunatapis Tayta Diospa nawpancho* pishtarmi Aarónwan y Israel mayor runakunawan aytsata mikupäkurqan.
Juezkunata Moisés churashqan
Deuteronomio 1.9-18
13 Tsaypita jukaqnin junaqmi Moisés jamakurqan Israel runakuna quejakushqanta arreglananpaq. Tsaymanmi tutapita tardiyaq quejakuq aywapäkurqan.
14 Runakunata Moisés qoyayta arreglaptinmi suedrun kayno nirqan: “Tutapita tardiyaq ¿imanirtaq japalayki runakuna quejakushqanta arreglaykanki?”
15 Tsayno niptinmi Moisés kayno nirqan: “Israel runakuna noqaman shapäkamun Tayta Diosta manakur arreglanäpaqmi.
16 Imalapitapis rimanakurqa noqamanmi shapäkamun mayqanpis jutsayuq kashqanta arreglanäpaq. Nirkurnami paykunata tantiyatsï Tayta Diospa estatütunkunata y leyninkunata”.
17 Tsawraqa suedrun Jetro kayno nirqan: “Noqapa tantiyaynïpitaqa japalayki lapanta rurashqayki manami alitsu kaykan.
18 Tsaynöla rurarqa pasaypami utikankipaq. Tsaynölami runakunapis utikanqapaq. Tsaytsika runakunataqa manami japalayki arreglayta atipankipaqtsu.
19 Kanan yätsishqäta shumaq wiyamay. Yätsishqäno ruranaykipaq Tayta Dios yanapaykuläshunki. Tayta Diosta manakur runakunata arreglashqaykiqa alimi kaykan.
20 Tsaynöpis Tayta Diospa estatütunkunata y leyninkunata yachatsishqayki alimi kaykan. Tayta Dios munashqanno kawananpaq yachatsishqaykipis alimi kaykan.
21 Tsayno kaptinpis yanapashunaykipaq formal runakunata akranki. Paykuna katsun Tayta Diosta *mantsakuq, mana lulakuq y sobornuta mana chaskipakuq. Paykunapita wakinta churanki waranqa (1,000) runakunapa jueznin kananpaq, wakintana churanki pachak (100) runakunapa jueznin kananpaq, wakintana churanki pitsqa chunka (50) runakunapa jueznin kananpaq y wakintana churanki chunka runakunapa jueznin kananpaq.
22 Tsay juezkunanami ima quëjutapis arreglanqapaq. Arreglayta mana puëdipäkushqalantanami qamman apamunqa. Tsayno yanapashuptikimi aläpa mana utikankipaqnatsu.
23 Tayta Dios munaptin yätsishqäno ruraptiki valorniki kanqaraqmi. Quejakushqanta shumaq arreglaptikimi lapan runakunapis kushishqa wayinman kutikunqapaq”.
24 Moisésqa suedrun yätsishqannölami lapanta rurarqan.
25 Tsaymi formal runakunata akrarkur wakinta churarqan waranqa (1,000) runakunapa jueznin kananpaq, wakintana churarqan pachak (100) runakunapa jueznin kananpaq, wakintana churarqan pitsqa chunka (50) runakunapa jueznin kananpaq y wakintana churarqan chunka runakunapa jueznin kananpaq.
26 Tsay juezkunanami runakuna quejakushqanta waran waran arreglapäkuq. Arreglayta mana kamäpakushqantami itsanqa Moisés arreglaq.
27 Tsaypitanami Moiséspita despidikurir markanpa suedrun kutikurqan.
Ichic wilacuycuna
^ 18.3 Hech. 7.29.
^ 18.3 Gersón ninanqa jäpa ninanmi.
^ 18.2-3 Éxo. 2.21-22.
^ 18.4 Eliezer ninanqa Tayta Diosnï yanapaman ninanmi.
^ 18.12 Tayta Diospa nawpancho nirqa Tinkuna Tolducho kaykaq altarpa nawpanchömi niykan.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
Tayta Diosta mantsakunantsipaq yachakuntsi (Deut. 4.10; 14.23; 17.19; Sal. 34.11). Tayta Diosta mantsakuq runaqa yachaq y tantiyakuqmi kaykan (Job 28.28; Sal. 111.10; Prov. 1.7).
Mushuq Testamentuchöpis Tayta Diosta mantsakunantsipaq kashqanpitami parlan. Tsaychömi niykan payta mantsakuqkunata Tayta Dios kuyapashqanta (Luc. 1.50; Hech. 10.35) y Tayta Diosta mantsakur pay munashqanno kawashqantsita (2Cor. 7.1; 1Ped. 1.17; 2.17). Tsaynöpis niykan Tayta Diosta mantsakuqkuna premiuta chaskinanpaq kashqanta (Apoc. 11.18).
Itsanqa Jesucristuta chaskikur jutsata rurashqantsipita perdonashqana kaykantsi (Rom. 3.23-25; 1Juan 1.9). Tsaymi musyantsi Tayta Dios manana castigamänantsipaq kashqanta (1Juan 4.18) y payta mana mantsakuypa manakunantsipaq kashqanta (Rom. 8.15; Efe. 3.12).
