Éxodo 2:1-25
2 Tsay witsanmi Leví trïbu runa tarqan tsay trïbu warmiwan.
2 Tsaypitanami warmin qeshyaq rikakuptin wawan yurirqan olqu. Kuyaylapaq kaptinmi kimsa killa maman pakarätsirqan.*
3 Tsaypita masta pakarätsiyta manana kamäpakurmi ututupita canastata awaykur breawan lashtarqan. Canastaman wamrata winarkurmi Nilo mayu kuchuncho kaykaq ututukuna chawpinman kachaykurqan.
4 Nirkur itipa paninta nirqan karulapita rikaykänanpaq.
5 Tsaypita mas rätulantanami Faraónpa warmi tsurin mayuman aywarqan armakunanpaq. Ashmayninkuna mayu kuchunpa rikachakur puriykashqanchömi rikarqan ututu chawpincho canasta awnaykaqta. Tsayta rikaykurmi juk ashmayninta kacharqan canastata jorqamunanpaq.
6 Jorqarkamuptinnami canastata kichaykur tarirqan iti wamra waqaykaqta. Tsawraqa Faraónpa warmi tsurin wamrata kuyapar kayno nirqan: “Kayqa hebreo runapa wamranchari kaykan”.
7 Tsawraqa Faraónpa warmi tsurinta itipa panin kayno nirqan: “¿Alitsuraq kanman kay wamrata ashmapäshunaykipaq hebrea warmita qayapämuptï?”
8 Tsayno niptinmi kayno nirqan: “¡Jukla pushamuy!”
Tsawraqa itipa mamanta wamra pushamurqan.
9 Itipa maman chayaykuptinmi Faraónpa tsurin kayno nirqan: “Kay itita ashmapaykalämay. Ashmapämashqaykipita pägaläshaykimi”.
Tsayno niptinmi itita apakurqan ashmapänanpaq.
10 Wamra jatunyarkuptinnami Faraónpa tsurinpa makinman qoykurqan. Paynami kikinpa wawanno kananpaq legitimakurqan.* “Yakupitami jorqukushqä” nirmi Moisés* jutin kananpaq churaparqan.
Egiptupita Moisés qeshpishqan
11 Tsaypita Moisés mözuyarkurnami juk junaqcho aywarqan hebreo mayinkunaman watukuq. Tsaychömi rikarqan paykuna fiyupa nakar arurkaykashqanta. Tsaynöpis rikarqan juk Egipto runa hebreo runata maqaykaqta.
12 Tsawraqa Moisés intërupa rikachakur pitapis mana rikashpan Egipto runata wanutsirqan. Nirkurmi aquysha rurinman pampaykurqan.
13 Waraynin* junaq Moisés yapay aywarna rikarqan ishkay hebreo runakuna kikinpura pelyaykaqta. Tsaymi maqaykaq runata kayno nirqan: “Hebreo mayiki kaykaptinqa ¿imanirtaq maqaykanki?”
14 Tsawraqa kayno nirqan: “Qamta ¿pitaq churashushqanki noqakunapa mandamaqnï y jueznï kanaykipaq? ¿Egipto runata wanutsishqaykinöku noqatapis wanutsimayta munaykanki?”*
Tsayno niptinmi Moisés fiyupa mantsakäkurqan. Tsaymi yarpachakur kayno nirqan: “Egipto runata wanutsishqä mayakaykannachaq”.
15 Egipto runata wanutsishqanta Faraón musyaykurmi Moisésta wanutsinanpaq ashitsirqan. Tsaymi Moisés qeshpir Madiánpa aywakurqan tsaycho tänanpaq.* Chayaykurmi pözu nawpanman jamaykurqan.
Madiáncho Moisés tashqan
16 Madiánchömi tarqan Reuel jutiyuq runa.* Payqa karqan madianita runakunapa cüranmi. Paypa jipash tsurinkunami karqan qanchis. Pözu nawpancho Moisés jamaraykaptinmi tsay qanchis jipashkuna chayarqan papäninpa uyshankunata y cabrankunata yaku uputsiq.
17 Wakin mitsikuqkunapis pözuman chayarmi tsay jipashkunata qarqurqan. Qarquykaqta rikarmi Moisésqa jipashkunapa favornin sharkushpan uyshankunata y cabrankunata yakuta uputsirqan.
18 Jipashkuna jukla kutipäkuptinmi papänin kayno nir tapurqan: “Kanan junaqqa ¿imanirtaq rätula kutipäkamushqanki?”
19 Tsaymi kayno wilapäkurqan: “Wakin mitsikuqkuna pözupita qarqaykämaptinmi juk Egipto runa noqakunapa favornï sharkur yanapamashqa. Nirkurmi uyshantsikunata y cabrantsikunata yakuta uputsishqa”.
20 Tsawraqa tsurinkunata kayno nirqan: “¿Maychötaq kaykan tsay runa? ¿Imanirtaq mana pushamushqankitsu? ¡Ayway qayamuy mikunanpaq!”
21 Reuelpa wayinman chayaykurmi Moisés awnirqan paykunawan tänanpaq. Tsaycho taptinmi Reuelqa tsurin Séforawan Moisésta tätsirqan.
22 Tsaypita Séfora wacharqan olqu wamrata. Tsay itipa jutintami Moisés churaparqan Gersón* jutin kananpaq. Tsay jutita churaparqan “noqa kay markacho jäpa runami kä” nishpanmi.
23 Tsaypita atska wata pasarkuptinnami Egipto nacionpa mandaqnin rey wanurqan. Israel runakunaqa ashmay kar jinalami fiyupa nakarkaykarqan. Tsaymi lakikushpan Tayta Diosta manakärirqan Egiptupita jorqunanpaq.
24 Tsayno manakärishqantami Tayta Dios mayarqan. Tsaymi Abrahamwan, Isaacwan y Jacobwan *pactu rurashqanta yarpashpan paykunata kuyaparqan.*
25 Tsaynöpis Israel runakuna pasaypa nakarkaykashqantami rikarqan.
Ichic wilacuycuna
^ 2.2 Hech. 7.20; Heb. 11.23.
^ 2.10 Hech. 7.21.
^ 2.10 Moisés ninanqa jorqushqa ninanmi.
^ 2.13 Wakin runakunaqa warantin nipäkun.
^ 2.11-14 Hech. 7.23-28, 35.
^ 2.15 Hech. 7.29; Heb. 11.27.
^ 2.16 Reuelqa karqan Moiséspa suedrunmi (Éxo. 2.21). Paytami Jetro nirqan (Éxo. 3.1; 18.1) y Hobab nirqanpis (Jue. 4.11).
^ 2.22 Gersón ninanqa jäpa ninanmi.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 2.24 Gén. 15.13-14.
