Éxodo 21:1-36
21 “Kay leykunata Israel runakunata yachatsinki:
2 Hebreo mayinta ashmaynin kananpaq pipis rantirqa soqta watayaqlami makincho kanqa. Qanchis kaq watachöqa imatapis mana pägaylapami librina yarqukunqa.
3 Ashmaynin kananpaq warmiynaqla yaykushqa karqa warmiynaqlami yarqukunqa. Warmiyuq yaykushqa karqa warmintinmi yarqukunqa.
4 “Japala yaykuptin ashmaynin jipashwan patronnin tätsiptinqa ashmay kashqanpita tsay runa yarqukur japalanmi yarqukunqa. Tsay ashmay warmi y wawankunapis patronninpa makinchömi quëdakunqa.
5 Patronninta, warminta y wamrankunata tsay runa kachayta mana munaptinqa
6 patronninmi Tayta Diospa nawpanman apanqa.* Tsaychönami punkupa quiciunman apaykur rinrinta alisnawan uchkunqa. Tsayno rurarkuptinqa imayyaqpis ashmayninmi kanqa.*
7 “Pipis ashmay kananpaq warmi tsurinta rantikurqa ama yarpätsuntsu qanchis wata arushqanpita olqu ashmayno libri yarqukunanpaq kashqanta.
8 Tsay jipashta warminpaq patronnin mana munaptinqa aylunkuna pägaykur shuntanqa. Tsay patrón warminpaq mana munarpis mana Israel runamanqa manami rantikunmantsu.
9 Tsay ashmaynin jipashta tsurinwan tätsirqa kikinpa warmi tsurintano rikanqa.
10 “Ashmaynin jipash jananman juk warmita ashirqa tsay ashmay kaq warminta mikuyta y röpata imaypis kamaripanqa. Tsaynöla paywanpis pununqa.
11 Mikuytapis o röpatapis mana kamaripar o paywan manana punurqa ashmaynin kananpaq rantishqanpita imatapis mana cobraylapa libri yarqukunanpaq kacharinqa.
Imano castigananpaqpis tantiyatsishqan
12 “Pipis runa mayinta maqaykashqancho wanutsiptinqa kikintapis wanutsipäkunqa.*
13 Aybësisqa noqa destinashqa kaptï mana yarpaypami wanutsin. Tsayno kaptinqa rikatsishqä markamanmi tsay wanutsiq runa qeshpinqa.*
14 Yarpaypa runa mayinta wanutsiptinmi itsanqa *altarnïman pakakuptinpis wanutsipäkunqa.
15 “Pipis mamanta taytanta maqaq kaqtaqa wanutsipäkunqa.
16 “Pipis runa mayinta suwarkur rantikushqana kaptinpis o makincho tsararaykaqta taripaptinpis tsay suwakuq runata wanutsipäkunqa.*
17 “Pipis mamanta o taytanta mana respitaq kaqtaqa wanutsipäkunqa.*
18 “Pelyaykashqancho saqmaypapis o kutaypapis pasaypa antsa kashqanyaq maqaptinqa
19 tsay maqaq runa manami wanutsishqatsu kanqa. Itsanqa cämanpita tukrulanwanpis tsay antsa kaykaq runa yarqamuptinqa lapan jampikushqanpita y aträsunpita päganqa.
20 “Pï patronpis ashmayninta warmitapis olqutapis wanuqpaq wirur imarqa castigashqami kanqa.
21 Maqashqanpita juk ishkay junaq kawaptinqa tsay patrón mananami castigashqanatsu kanqa. Tsayno kanqa kikinpa ashmaynin kaptinmi.
22 “Ishkay runa pelyaykashqancho chichu warmita pasapakuptin tsay achäquila shuluptinqa juezman aywanqa quejakunanpaq. Tsay warmi mana wanuptin imaptinqa warmipa lesionninpita runan aykata paqananpaq nishqantami juez pägatsinqa.
23 Tsay warmi wanuptinmi itsanqa maqaq runatapis wanutsipäkunqa.
24 “Nawinta jorquptinqa kikinpa nawintapis jorqunqa. Kirunta jorquptinqa kikinpa kiruntapis jorqunqa.* Makinta pakiptinqa kikinpa makintapis pakinqa. Chakinta pakiptinqa kikinpa chakintapis pakinqa.
25 Rupatsiptinqa kikintapis rupatsinqa. Yawarta jorquptinqa kikinpatapis yawarninta jorqunqa. Maqaptinqa kikintapis maqanqa.
26 “Pipis ashmayninta maqaykashqancho nawinta pashtaparqa librina yarqukunanpaq kacharinqa olqu kaptinpis warmi kaptinpis.
27 Tsaynöla ashmayninpa kirun yarquqpaq maqarqa libri yarqukunanpaq kacharinqa.
Elaqpita imapis kaptin imata rurananpaqpis nishqan
28 “Olquta karpis warmita karpis töru ashtir* wanutsiptinqa tsay töruta saqmaylapa wanutsipäkunqa. Aytsantaqa pipis ama mikunqatsu. Ämuntaqa ama demandanqatsu.
29 Ashtikuyta mäñashqa kar pitapis ashtir wanutsiptinqa tsay törupa ämuntapis wanutsipäkunqa. Tsayno kanqa ashtikuq kashqanta musyaykar mana sigurashqanpita. Tsaynöla töruntapis saqmaylapa wanutsipäkunqa.
30 Törupa ämun wanuyta mana munar pägayta munaptinqa manashqanta päganqa.
31 “Tsaynöla kanqa olqu wamrata o warmi wamrata töru ashtiptinpis.
32 Ashmaytapis töru ashtiypa wanutsiptinqa tsay töruta saqmaylapa wanutsipäkunqa. Tsayno kanqa ashmay olqu kaptinpis o warmi kaptinpis. Tsaynöpis törupa ämun kimsa chunka (30) siclo qellayta päganqa wanuq ashmaypa patronninta.
33 “Pipis uchkushqan pözuta mana tsapaylapa kachaykuptin o yaku pözuta mana tsapaylapa kachaykuptin tsayman töru o bürru jeqaptinqa
34 pözupa duëñun tsay uywakunapa preciunta päganqa. Wanuq uywapa aytsantaqa pözupa duëñunnami quëdatsikunqa.
35 “Pipa törunpis juk runapa törunta maqar wanutsiptinqa kawaykaq töruta rantikunqa. Nirkurna tsay qellayta pulanpura rakipänakunqa. Tsayno wanushqa törupa aytsantapis pulanpura rakipänakunqa.
36 Törun fiyu kashqanta musyaykar ämun mana siguraptin jukpa törunta wanutsiptinqa wanuq törupa trukanta qoykunqa. Tsay wanushqa törupa aytsantaqa pägaq kaqnami quëdatsikunqa.
Ichic wilacuycuna
^ 21.6 Tayta Diospa nawpanman apananpaq nirqa Tinkuna Tolducho kaykaq altarpa nawpanman apananpaqmi nirqan. Wakin traduccionkunaqa juezkunapa nawpanman ninmi.
^ 21.2-6 Lev. 25.39-46.
^ 21.12 Lev. 24.17.
^ 21.13 Núm. 35.10-34; Deut. 19.1-13; Jos. 20.1-9.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 21.16 Deut. 24.7.
^ 21.17 Lev. 20.9; Mat. 15.4; Mar. 7.10.
^ 21.24 Lev. 24.19-20; Deut. 19.21; Mat. 5.38.
^ 21.28 Wakin runakunaqa wishtir nipäkun.
