Éxodo 22:1-31
22 (21.37) “Pipis töruta, uyshata o cabrata suwarkur pishtakurkushqa karpis o rantikushqa karpis töruta suwashqanpita pitsqa mastami päganqa. Tsaynöla uyshata o cabrata suwashqanpita päganqa chusku masta.
2 (1) “Pitapis tsakaypa suwakuykaqta taripaykur wanutsirqa manami jutsayuqtsu kanqa wanutsishqanpita.
3 (2) Junaqpa suwakuykaqta taripaykur wanutsirmi itsanqa jutsayuq kanqa.
“Suwakuq runa suwakushqanpita päganqa. Pägananpaq qellaynin mana kaptinqa kikin suwakuq runata rantikunqa.
4 (3) “Suwakuqpa makincho wäkata karpis, uyshata karpis y bürruta karpis kawaykaqta taripaptinqa suwakushqanta kutitsir jananman ishkay masta päganqa.
5 (4) “Pipis mitsikur jukpa chakranta o üva huertanta däñukurqa däñukushqanpita mikuycho karpis üvacho karpis alinnin kaqta päganqa.
6 (5) “Pipis kanapakuykashqancho jukpa chakrancho kaykaq o ërancho kaykaq mikuyta rupatsirqa nina rupashqanpita päganqa.
7 (6) “Paytakuy qellayta o alhäjakunata suwakushqanta taripaptinqa tsay suwakushqan jananman ishkay masta päganqa.
8 (7) Suwakuq runata mana taripaptinqa paytakuyta chaskiq runata Tayta Diospa nawpanman apapäkunqa.* Tsaychönami juzgapäkunqa suwashqanta o mana suwashqantapis.
9 (8) “Töruta karpis, bürruta karpis, uyshata karpis, röpata karpis o imata karpis ishkay runakuna ‘kayqa noqapami’ nir qechunakuptinqa tsay runakunata Tayta Diospa nawpanman apapäkunqa. Tsaychömi mayqantapis taripaptinqa jutsayuq kaq päganqa ishkay kuti masta.
10 (9) “Paytakuy bürru, paytakuy töru, paytakuy uysha o ima uywapis wanuptin, imapis pasaptin o tsay paytakushqanta suwa apakuptinqa
11 (10) paytakushqanta chaskiq runa kikin mana pakashqanta Diospa jutincho juranqa. Tsayno juraptinqa uywapa ämun amana cobranqanatsu.
12 (11) Mana täpaptin suwa apakuptinmi itsanqa ämunta päganqa.
13 (12) Jirka uywa mikushqa kaptinqa putsupakushqanta ämun rikananpaq apanqa. Tsayno aparqa mananami päganqanatsu.
14 (13) “Pipis runapa uywanta manakuykur ämun mana rikaykaptin wanupakur imarqa tsay uywapa chaninta päganqa.
15 (14) Uywapa ämun rikaykaptin wanuptinmi itsanqa uywapa chaninta mana päganqatsu. Alquilakushqa karqa flëtintana päganqa.
Jutsa ruraqkunata imano castigananpaqpis nishqan
16 (15) “Piwanpis manaraq parlädan kaptin virginlaraq jipashta pipis perditsirqa tsay jipashta jorqunqa warmin kananpaq. Jipashpa taytantapis päganqa pägananpaq costumbri kashqanno.
17 (16) Shuntananta jipashpa taytan mana munaptinqa ama shuntanqatsu. Itsanqa warmi ashiycho costumbri kashqanno jipashpa taytanta tsay mözu päganqa.*
18 (17) “Brüjutaqa lapanta wanutsipäkunki.*
19 (18) “Pitapis uywawan kakuqtaqa wanutsipäkunki.*
20 (19) “TAYTA DIOSPAQ sacrificiuta rupatsinanpa trukan juk dioskunapaq sacrificiuta rupatsiptinqa tsay runata wanutsipäkunki.*
21 (20) “Jäpa runakunata ama nakatsinkitsu ni chikinkitsu. Yarpapäkuy qamkunapis Egiptucho tar jäpa kashqaykita.
22 (21) “Viüdakunatapis ni waktsakunatapis ama nakatsinkitsu.*
23 (22) Nakatsiptiki manakamaptinqa noqami paykunapa favornin sharkushaq.
24 (23) Tsaymi fiyupa rabyashpä espädawan wanutsishaykipaq. Tsaynöpami qamkunapapis warmiki viüda quëdanqa y tsurikikunapis waktsa rikakunqa.
25 (24) “Israel nacioncho waktsa runakunata qellayta manarqa wakin runakunanöqa qellaynikipa wawanta ama cobrapäkunkitsu.*
26 (25) Qellayta manaptiki röpanta prenda kachapäshuptikiqa patsa manaraq tsakaptin kutitsipäkunki.
27 (26) Tsay prendata kachapäshushqayki röpalanmi kaykan tsakaypa punur pitukunanpaq. Mana kutitsiptikiqa ¿imanwanraq pununqa? Qasätsikur manakamaptin kuyapäkuq karmi favornin sharkushaq.*
28 (27) “Tayta Diospaq lutanta imaypis ama rimapäkunkitsu. Tsaynöpis markaykicho autoridäkunata ama maldicionankitsu.*
29 (28) “Ama qonqapäkunkitsu cosëchaykipita y vïnu rurashqaykipita noqapaq *primiciata apamunaykipaq.
“Qechpa tsurikita apamunaykipa trukanqa noqapaq ofrendata apapäkamunki.*
30 (29) “Tsaynöla noqapaq apapäkamunki orqu kaqtaqa manta wäkaykipa y manta uyshaykipa y manta cabraykipa punta wawanta. Yurishqanpita qanchis junaqlami tsay uywakuna mamanwan kanqa. Pusaq kaq junaqchöqa noqapaq apapäkamunki.
31 (30) “Qamkunata akrashqä jutsaynaq kar *santu kanaykipaqmi. Tsayno kaykarqa ama mikunkitsu jirka uywakuna wanutsishqan uywapa aytsanta.* Tsaytaqa alqukuna mikunanpaq jitapaykunki.
Ichic wilacuycuna
^ 22.8 Tayta Diospa nawpanman apapäkunanpaq nirqa Tinkuna Tolducho kaykaq altarpa nawpanman apananpaqmi nirqan. Wakin traduccionkunachöqa juezkunapa nawpanman ninmi. Tsaynölami kaykan versïculu 9-chöpis.
^ 22.16-17 Deut. 22.28-29.
^ 22.18 Deut. 18.10-11.
^ 22.19 Lev. 18.23; 20.15-16; Deut. 27.21.
^ 22.20 Deut. 17.2-7.
^ 22.21-22 Éxo. 23.9; Lev. 19.33-34; Deut. 24.17-18; 27.19.
^ 22.25 Lev. 25.35-38; Deut. 15.7-11; 23.19-20.
^ 22.26-27 Deut. 24.10-13.
^ 22.28 Hech. 23.5.
^ primicia Primiciaqa kaykan Israel runakuna qechpa kaqkunata y chakrancho punta poquqkunata Tayta Diospaq apashqanmi (Éxo. 23.19; Lev. 2.11-12; Deut. 14.23; 18.3-4; 26.1-11; 2Crón. 31.11-12; Neh. 10.35-37; 12.44; Eze. 44.30; Rom. 8.23; Apoc. 14.4).
^ 22.29 Núm. 3.40-51.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
Runakuna santu kashqanta nirqa Tayta Dios akrashqan runakuna kashqanta (Deut. 7.6) y pay munashqanno jutsaynaq kawashqantami niykan (Lev. 20.7-8).
Sitiukuna y manëjukuna Tayta Diospaq kaptinqa sagrädu kashqantami niykan. Tsaymi Israel nacionpis (Zac. 2.12), Jerusalén markapis (Isa. 48.2) y templupis (Sal. 68.5) sagrädu kaykan. Tsaynölami jamay junaqpis (Éxo. 31.14) y fiestakunapis (Lev. 23.2) sagrädu kaykan.
^ 22.31 Lev. 17.15.
