Éxodo 23:1-33
23 “Manakaqkunataqa pitapis ama tumpankitsu.* Tsaynöpis lutan ruraqkunapa favornin ama sharkunkitsu.
2 “Wakin runakuna lutanta ruraptinpis qamkunaqa ama rurapäkunkitsu. Testïgu karqa rasuntanöraq wakin rimaptinpis qamkunaqa rasun kaqlata rimanki.
3 Lutanta ruraptinqa ni waktsa kaptinpis ama favornin sharkunkitsu.*
4 “Chikishuqnikipa törunta o bürrunta oqrakashqa kaykaqta tarishpaykiqa ämunman kutitsinki.
5 Chikishuqnikipa bürrun cargantin tunishqa kaykaqta rikarqa sharkatsipäkunki.*
6 “Waktsataqa demandakuptin shumaq arreglapäkunki.
7 “Manakaqkunata pitapis tumpaptinqa ama cäsupankitsu. Jutsaynaq runataqa ama wanutsipäkunkitsu. Jutsayuq kaqtaqa manami perdonashaqtsu.
8 “Autoridä karqa sobornuta ama chaskipakunkitsu. Sobornuta chaskipakuq autoridäqa manami shumaq arreglantsu, sinöqa chaskipashqan runapa favornin sharkurmi runakuna ali yätsishqantapis mana chaskintsu.*
9 “Juk nacionpita shamuq runata ama nakatsipäkunkitsu. Qamkunapis Egiptucho jäpa kashqa kar musyankimi juk nacioncho imano kaway kashqantapis.*
Chakrapis runapis jamananpaq tantiyatsishqan
10 “Soqta wata chakraykita murur wayushqanta shuntapäkunki.
11 Qanchis wata kaqchöqa tsay chakraykita jamatsipäkunki. Tsaycho shiwa winamuptinqa kachaykunki waktsakuna shuntakunanpaq y munti uywakuna mikunanpaq. Tsayno rurapäkunki üva chakra kaptinpis y olïvu chakra kaptinpis.*
12 “Lapan arunaykipaq kaqta soqta junaqcho arupäkunki. Qanchis junaqchöqa jamapäkunki.* Töruykitapis, bürruykitapis, ashmaynikitapis y arupakuq jäpa runakunatapis jamatsipäkunki.
13 “Noqa nishqäkunataqa lapanta cumplipäkunki. Juk lädu runakuna yärakushqan dioskunata ama manakunkitsu. Tsay dioskunapataqa ni jutinkunatapis ama joqarinkitsu.
Watacho kimsa fiestata rurapäkunanpaq tantiyatsishqan
Éxodo 34.18-26; Deuteronomio 16.1-17
14 “Noqata adoramashpayki cada watacho kimsa kuti fiestata rurar adorapäkamanki.
15 “Levadüraynaq Tantata Mikupäkunan fiestata rurapäkunki. Nishqänöla tsay fiestacho levadüraynaq tantata* qanchis junaq mikupäkunki. *Abib killacho Egiptupita yarqamushqa karmi tsay killacho fiestata rurapäkunki. Pipis noqata adoramänanpaq shamurqa jinaylaqa ama shamunqatsu.
16 “Tsaypita tsaki mikuy cosëchata qalaykur *Tsaki Mikuy Cosëcha fiestata* rurapäkunki.
“Wata ushanancho cosëcha shuntayta usharkurna* Cosëcha Ushay fiestatapis* rurapäkunki.*
17 “Lapan olqu kaqkunaqa cada watacho tsay kimsa fiestakunaman aywapäkunqa adoramänanpaq.
18 “Uywakunata noqapaq sacrificiuta rupatsirqa yawartawan levadürayuq tantata talurkur ama rupatsipäkunkitsu. Wara junaqpaqqa wirantapis ama churapäkunkitsu.
19 “Mikuynikikuna poquptin *primiciata wayïman apapäkamunki.*
“Cabra malwapa aytsantapis mamanpa lëchinwanqa ama yanupäkunkitsu.*
Israel runakunata Tayta Diospa angilnin pushashqan
20 “*Angilnïtami kachamushaq imapitapis tsapäshushpayki kamarishqä nacionman chayatsishunaykipaq.
21 Paymi trukä qamkunata yanapashunki. Tsayno kaykaptinqa contran ama sharkunkitsu. Pay nishushqaykita lapanta cäsukunki. Jutsata ruraptikiqa manami perdonashunkitsu.
22 Pay nishushqaykita lapanta cäsukuptikiqa chikishuqnikikunapa contranmi sharkushaq. Tsaynölami nakatsishuqnikikunatapis nakatsishaq.
23 “Angilnïmi pushashunkipaq amorreo runakuna, heteo runakuna, ferezeo runakuna, cananeo runakuna, heveo runakuna y jebuseo runakuna tashqan nacionman. Tsay runakunata lapantami elqätsishaq.
24 Paykuna jutsata ruraptinpis qamkunaqa jutsata ama rurapäkunkitsu. Yärakushqan dioskunamanpis ama qonqurpakunkitsu ni sirvipäkunkitsu. Adorashqan wankakunatapis y lapan ïdulunkunatapis elqätsinki.
25 “Noqa TAYTA DIOSNIKI kaptï noqalata sirvipäkamanki. Tsawraqa bendicionnïta qoshayki mikuypis yakupis mana pishïshunaykipaq. Ima qeshyapitapis noqami aliyätsishaykipaq.
26 Qamkuna tashqaykichöqa manami pï warmipis shulunqatsu ni qoluqpis kanqatsu. Awkin kashqaykiyaqmi kawankipaq.
27 “Mayqan nacionman chayaptikipis noqami yanapashayki tsaycho taq runakuna mantsakashpan qeshpir aywakärinanpaq.
28 Tsayno yanapaptïmi heveo runakuna, cananeo runakuna y heteo runakunapis qamkunapita qeshpir aywakärinqapaq.
29 Tsayno kaptinpis manami juk watalachöqa tsay runakunata qarqushaqtsu. Jukla qarquptïqa chakrakuna purunyanqapaqmi y munti uywakunapis mirar ushashunkipaqmi.
30 Tsaymi qamkuna mirashqayki tupula paykunata walka walkala qarqushaqpaq. Tsaynöpami lapan chakrankuna qamkunapana kanqapaq.
31 “Nacionnikipa lindërunmi kanqa Puka Lamarpita filisteo runakunapa lamarninyaq.* Tsaynöpis lindëruyki kanqa chunyaq jirkapita Éufrates mayuyaq. Qamkunatami yanapashayki tsaycho taq runakunata qarqunaykipaq.
32 Tsay runakunawan ni diosninkunawan ima *pactutapis ama rurapäkunkitsu.
33 Tsay runakunata ama kachapankitsu tashqayki nacioncho tänanpaq. Qamkuna kaqcho tarqa mana cäsukamänaykipaqmi shimita jatipäshunkipaq. Tsaynöpami paykuna yärakushqan dioskunata adoraptiki mana kuyapaypa castigashaykipaq”.
Ichic wilacuycuna
^ 23.1 Éxo. 20.16; Lev. 19.11; Deut. 5.20.
^ 23.3 Lev. 19.15.
^ 23.4-5 Deut. 22.1-4.
^ 23.6-8 Lev. 19.15; Deut. 16.19.
^ 23.10-11 Lev. 25.1-7.
^ 23.15 Éxo. 12.14-20; Lev. 23.6-8; Núm. 28.17-25.
^ Abib killa Abib killa imay qalaykushqanta runakuna musyananpaq shuyararqan trïgu shikshiyta qalaykuptin killa ushashqanyaq. Tsay junaqnami karqan Abib killa qalaykunan.
^ Tsaki Mikuy Cosëcha fiesta Liyinki Pentecostés fiestapita tantiyatsikuyta.
^ 23.16b Lev. 23.39-43.
^ 23.16b Cosëcha Ushay fiestapa jukaq jutinmi Ramäda fiesta kaykan. Tsayta musyanaykipaq liyinki Deut. 16.13.
^ 23.16a Lev. 23.15-21; Núm. 28.26-31.
^ 23.16a Tsaki Mikuy Cosëcha fiestapa jukaq jutinmi Semäna fiesta kaykan. Tsayta musyanaykipaq liyinki Éxo. 34.22.
^ primicia Primiciaqa kaykan Israel runakuna qechpa kaqkunata y chakrancho punta poquqkunata Tayta Diospaq apashqanmi (Éxo. 23.19; Lev. 2.11-12; Deut. 14.23; 18.3-4; 26.1-11; 2Crón. 31.11-12; Neh. 10.35-37; 12.44; Eze. 44.30; Rom. 8.23; Apoc. 14.4).
^ 23.19a Deut. 26.2.
^ 23.19b Éxo. 34.26; Deut. 14.21.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
Angilkunaqa (1) Tayta Dios nishqankunata wilakärin (Gén. 18.16–19.29; Dan. 8.15-17; 9.21-23; Mat. 1.20-24; Luc. 1.11-20, 26-38), (2) Tayta Diospa favornin pelyapäkun (2Rey. 6.15-17; Dan. 10.13-14; Apoc. 12.7-9) y (3) Diosman yärakuqkunata tsapan y yanapan (Sal. 91.11-12; Heb. 1.14).
Satanáspa angilninkunaqa supaykunami karkaykan (Mat. 25.41; Apoc. 9.11).
^ 23.31 Filisteo runakunapa lamarninqa Mediterráneo Lamarmi kaykan.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
