Éxodo 26:1-37
26 “*Sagrädu Toldupaq llanula putskashqa lïnu hïlupita y azul, granäti y puka milwa hïlukunapita chunka bayëtakunata awatsinki. Nirkur tsay bayëtakunaman bordatsinki ishkay *querubinkunata.
2 Tsay chunka bayëtata ruratsinki tsay tamäñulata. Largunmi kanqa chunka ishkay metru pulan (12.5). Anchunnami kanqa ishkay metru.
3 “Pitsqa bayëtakunata largun kaqpa jiratsinki juk bayëtala kananpaq. Tsaynöla pitsqa kaqtapis jiratsinki juk bayëtala kananpaq.
4 Tsay ishkay bayëtakunapa largu kaq kuchunman azul hïlukunata pataparkur churatsinki ojalninkuna kananpaq.
5 Pitsqa chunka (50) kanqa jukaq bayëtapa kuchunpaq y pitsqa chunkanami kanqa jukaq bayëtapa kuchunpaq. Tsaynöpami ishkan bayëtakunapa ojalninkuna frenti frenti kanqa shequtsinanpaq.
6 Ojalninkunapita shequtsinaykipaq qoripita ruratsinki pitsqa chunka ganchukunata. Tsay ganchukunawan shequtsinki ishkan jirashqan bayëtakunata. Tsaynöpami juk toldulana kanqa.
7 “Tsay jananman qatanaykipaq cabrapa aqtsanpita awatsinki chunka juk bayëtakunata.
8 Tsay bayëtakunaqa lapanpis tsay tamäñulami kanqa. Cada bayëtapa largun kanqa chunka kimsa metru pulan (13.5). Anchunna kanqa ishkay metru.
9 “Nirkurnami pitsqa bayëtakunata largun kaqpa jiratsinki juklaylano kananpaq. Tsayno soqta kaqkunatapis largun kaqpa jiratsinki juklaylano kananpaq. Tsay bayëtakunawan qatatsiptiki soqta kaq jirashqan bayëtaqa punku yaykunacho pasaränanpaq kanqa. Tsay pasaraq kaqta jananman doblatsinki.
10 “Ojalkunata hïlupita rurarkur tsay jirashqan bayëtakuna tinkuränan kaq kuchunman churatsinki. Pitsqa chunka (50) ojalta churatsinki jukaq jirashqan bayëtapa kuchunman y pitsqa chunkatanami churatsinki jukaq bayëtapa kuchunman.
11 Tsay ojalkunapita shequtsinaykipaq broncipita ruratsinki pitsqa chunka ganchukunata. Tsaywan shequtsiptikimi juk bayëtanölana kanqapaq.
12 “Tsay bayëtakunawan qatatsiptiki mas jatulan kar putsuq kaqqa Sagrädu Toldupa lädunkunapa pasanqa.
13 Tsay qataraykaq bayëtami rurin kaq bayëtata ishkan lädunpa pasaranqa chusku chunka pitsqa (45) centïmetru.
14 “Tsay bayëtakuna jananpa qatatsinki pukaman tinishqa uysha pirqashpita rurashqa tolduwan. Tsay pirqashkuna jananmanna qatatsinki fïnu qarakunawan.
15 “Sagrädu Tolduta ichitsinaykipaqqa acacia qerupita shumaq derëchu marcukunata ruratsinki.
16 Cada marcuta ruratsinki chusku metru pulan altuta. Anchuntana ruratsinki soqta chunka pitsqa (65) centïmetruta.
17 Marcupura laqaränanpaq cada marcupa chakincho ishkay espïgata ruratsinki. Lapan marcukunatapis tsaynöla ruratsinki.
18 Ishkay chunka (20) marcukunata ruratsinki sur kaq läduman ichitsinaykipaq.
19 Tsay marcukuna ichinanpaq ruratsinki qellaypita chusku chunka (40) jawiräkunanta. Cada marcupa ishkay espïgan kaptinmi cada marcupa ishkay jawiräkunanpis kanqa.
20 Tsaynöla ishkay chunka (20) marcukunata ruratsinki norti kaq läduman ichitsinaykipaq.
21 Tsaykuna ichiränanpaqpis qellaypita ruratsinki chusku chunka (40) jawiräkunanta. Tsaynöpami cada marcupaq kanqa ishkay jawiräkunan.
22 “Inti jeqanan kaq lädupa ichitsinaykipaqpis soqta marcukunata ruratsinki.
23 Qepan kaq esquïnankunapaq ishkay marcukunata masta ruratsinki.
24 Tsay marcukunami esquïnacho tinkuq marcukunaman shumaq laqaranqa. Jana kaq esquïnachömi juk argöllawan shequranqa. Ishkan esquïnancho marcukunata tsaynöla ichitsinki.
25 Tsaymi pusaq marcukuna tsay läducho kanqa. Cada marcupami qellaypita rurashqa ishkay jawiräkunan kanqa. Tsaynöpami tsay läducho chunka soqta jawiräkunan kanqa.
26 “Sagrädu Toldupa jukaq lädun marcukunapa witsan witsan tsakraränanpaq acacia qerupita pitsqa traviskunata ruratsinki.
27 Tsaynöla jukaq lädupaqpis pitsqa traviskunata ruratsinki. Sagrädu Toldu qepanpaqpis pitsqa mas traviskunata ruratsinki. Tsayqa inti jeqanan kaq lädupami kanqa.
28 Chawpi kaq travisqa juk kuchunpita jukaq kuchunyaq marcukunapa pasaranqa.
29 Tsay marcukunata y traviskunata qoriwan enchapatsinki. Traviskuna pasananpaqqa qoripita argöllankunata ruratsinki.
30 Kay puntacho rikatsishqätanöla Sagrädu Tolduta ruratsinki.
31 “Nirkurna cortïnata awatsinki azul, granäti y puka milwa hïlukunapita y llanula putskashqa lïnu hïlupitapis. Tsaymanna ishkay querubinkunata shumaq bordatsinki.
32 Tsay cortïnata qoripita rurashqa ganchukunawan shequtsinki acacia qerupita rurashqa chusku tushakunaman. Tsay tushakuna qoriwan enchapashqami kanqa. Tushakunapa jawiräkunan qellaypita rurashqami kanqa.
33 Cortïnapa qepanmanna churanki *Pactu Babulta. Tsay cortïnami rakinqa Lugar Santïsimupita Lugar Santuta.*
34 Nirkurna Lugar Santïsimucho Pactu *Babulta tsapananwan tsapanki.
35 Lugar Santuchöna mësata y candelabruta churanki. Mësata churanki norti kaq läduman y candelabrutana churanki sur kaq läduman.
36 “Juk cortïnatana awatsinki tolduman yaykuna punkupaq. Tsayta awatsinki azul, granäti y puka milwa hïlukunapita y llanula putskashqa lïnu hïlupitapis. Tsay cortïnaman shumaq bordatsinki kuyaylapaq kananpaq.
37 Cortïnata churatsinanpaq acacia qerupita pitsqa tushakunata ruratsinki. Tsay tushakunata qoriwan enchapatsinki. Nirkurna ganchunkunatapis qoripita rurarkatsir tusha puntanman churatsinki. Tsaynöpis tushakuna ichiränanpaq pitsqa jawiräkunanta broncipita funditsinki.
Ichic wilacuycuna
^ Sagrädu Toldu Liyinki Tinkuna Toldupita tantiyatsikuyta.
^ querubín Querubinqa älayuq angilkunami karkaykan. Querubinkunatami Tayta Dios churarqan Edén huertata täpananpaq (Gén. 3.24). Tsaynölami Pactu Babulpa tsapanan jananchöpis qoripita rurashqa ishkay querubinkuna ichiraykarqan (Éxo. 25.18-22; Heb. 9.5). Salomón ruratsishqan templuchöpis ishkay querubinkunami qoriwan enchapashqa karqan. Tsay querubinkunapa altunmi karqan chusku metru pulan (1Rey. 6.23-29). Profëta Ezequielpis revelacionchömi querubinkunata rikarqan (Eze. 10.1-22; 41.18-19).
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
^ 26.33 Heb. 6.19; 9.3.
^ babulpa tsapanan Babulpa tsapananpa jutinmi hebreucho karqan kapporet. Kapporet ninanqa tsapanan ninanmi y jutsata perdonashqan ninanmi. Wakin castellänu traduccionkunaqa propiciatoriu nirmi tsay palabrata traducin. Babulpa tsapanan jananpitami Moisésta Tayta Dios parlaparqan (Éxo. 25.22). Tsaynöpis babulpa tsapanan jananman pukutaycho Tayta Dios yurimurqan (Lev. 16.2). Israel runakuna purificashqa kananpaq kaq junaqchömi mandaq cüra babul kashqanman yaykur turitupa yawarninman dëdunta jatirkur babulpa tsapananta tsaqtsuparqan (Lev. 16.14).
