Éxodo 31:1-18
31 Moisésta TAYTA DIOS kayno nirqan:
2 “Uripa tsurin y Hurpa wilkan Bezaleelta noqami akrashqä. Judá trïbupitami pay kaykan.
3 Bezaleelman Espïritüta kachamurmi habilidäta qoshqä. Tsaymi payqa ima ruraytapis shumaq yachan.
4 Qoripita, qellaypita y broncipita kuyaylapaq kaqkunata rurananpaqpis habilidänin kanmi.
5 Kuyaylapaq rumikunatapis laqlayta yachanmi. Tsararänanta shumaq rurarkurmi kamaraqla kananpaq siguratsin. Tsaynömi qerutapis laqlayta yachan y tukuy niraq kuyaylapaq kaqkunatapis rurayta yachan.
6 Payta yanapananpaqmi Dan trïbupita Ahisamacpa tsurin Aholiabta churashqä. Tsaynölami nishqäkunata ruratsinaykipaq qamkunacho kaq lapan yachaq runakunatapis habilidäta qoshqä.
7 Paykunami rurapäkunqa Tinkunantsi Tolduta, *Pactu Babulta, Pactu *Babulpa tsapananta y Tinkunantsi Toldupa lapan manëjunkunatapis.
8 Tsaynöpis rurapäkunqa mësata manëjuntinta, qoripita candelabruta manëjuntinta, inciensuwan qoshtatsikuna *altarta,
9 sacrificiuta rupatsina altarta manëjuntinta y jatun lavatoriuta jamakunantinta.
10 Tsaynöpis rurapäkunqa Aarón jatikunanpaq *sagrädu röpata y tsurinkuna jatikunanpaq kaq röpakunata.
11 Tsaynöpis rurapäkunqa sagrädu aceitita y Tinkunantsi Toldupaq inciensuta. Qamta yätsishqänölami lapantapis rurapäkunqa”.
Jamay junaqpaq tantiyatsishqan
Éxodo 35.1-3
12 TAYTA DIOS mastapis Moisésta kayno nirqan:
13 “Israel runakunata wilanki jamay junaqta respitananpaq. Jamay junaqqa imaypis señal kanqa qamkunapaq y qamkunapita miraqkunapaqpis. Tsaymi tsay junaqta respitar tantiyapäkunkipaq *santu kapäkunaykipaq qamkunata akrashqäta.
14 Jamay junaq *sagrädu kaptin lapayki respitanki. Tsay junaqta mana respitaq kaqtaqa wanutsipäkunki. Tsay junaqcho ima aruytapis aruq kaqtaqa Israel runakunapita qarqupäkunki.
15 “Soqta junaqla arupäkunki. Qanchis kaq junaqqa sagrädu kaptin jamapäkunki.* Pipis jamay junaqcho aruq kaqtaqa wanutsipäkunki.
16 Tsayno kaptinqa Israel runakuna imaypis jamay junaqta respitanqa. Tsayno respitarmi paykunawan *pactu rurashqäta cumplipäkunqa.
17 Jana patsata y kay patsata soqta junaqcho kamarkurmi qanchis junaqcho jamarqä. Tsaymi Israel runakuna cäsumashqanta musyanäpaq tsay junaq señal kanqa”.*
18 Sinaí puntacho Moisésta tantiyarkatsirmi ishkay läja rumikunaman dëdunwan qelqashqan mandamientunkunata Tayta Dios entregarqan. Tsay mandamientunkuna karqan paykunawan Tayta Dios rurashqan pactuta cumplipäkunanpaqmi.
Ichic wilacuycuna
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
^ babulpa tsapanan Babulpa tsapananpa jutinmi hebreucho karqan kapporet. Kapporet ninanqa tsapanan ninanmi y jutsata perdonashqan ninanmi. Wakin castellänu traduccionkunaqa propiciatoriu nirmi tsay palabrata traducin. Babulpa tsapanan jananpitami Moisésta Tayta Dios parlaparqan (Éxo. 25.22). Tsaynöpis babulpa tsapanan jananman pukutaycho Tayta Dios yurimurqan (Lev. 16.2). Israel runakuna purificashqa kananpaq kaq junaqchömi mandaq cüra babul kashqanman yaykur turitupa yawarninman dëdunta jatirkur babulpa tsapananta tsaqtsuparqan (Lev. 16.14).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ sagrädu Liyinki santupita tantiyatsikuyta.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
Runakuna santu kashqanta nirqa Tayta Dios akrashqan runakuna kashqanta (Deut. 7.6) y pay munashqanno jutsaynaq kawashqantami niykan (Lev. 20.7-8).
Sitiukuna y manëjukuna Tayta Diospaq kaptinqa sagrädu kashqantami niykan. Tsaymi Israel nacionpis (Zac. 2.12), Jerusalén markapis (Isa. 48.2) y templupis (Sal. 68.5) sagrädu kaykan. Tsaynölami jamay junaqpis (Éxo. 31.14) y fiestakunapis (Lev. 23.2) sagrädu kaykan.
^ sagrädu Liyinki santupita tantiyatsikuyta.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 31.17 Éxo. 20.11.
