Éxodo 36:1-38
36 Tsaymi Bezaleel, Aholiab y wakin yachaq y tantiyaq runakunapis TAYTA DIOS nimashqantsino Tinkuna Sagrädu Tolduta sharkatsipäkunqa. Paykunatami TAYTA DIOS habilidäta qoshqa Tinkuna Sagrädu Tolduta y manëjunkunata* rurapäkunanpaq”.
Sagrädu Tolduta rurapäkunanpaq putsuy putsuy apapäkushqan
2 Aruyta qalaykunanpaqmi Bezaleelta, Aholiabta y wakin yachaq y tantiyaq runakunatapis Moisés qayarqan. Paykunaqa arunanpaq listumi karkaykarqan.
3 Tinkuna *Sagrädu Tolduta rurapäkunanpaqmi Israel runakuna apashqan ofrendakunata paykunata Moisés entregarqan. Tsay jananmanmi Israel runakunaqa voluntäninpita cada tuta mas ofrendakunata apapäkurqan.
4 Tsawraqa aruyninkunata kachaykur Tinkuna Sagrädu Tolducho aruqkuna
5 aywapäkurqan Moisésta kayno ninanpaq: “TAYTA DIOS nimashqantsino Tinkuna Sagrädu Tolduta sharkatsinantsipaq putsuy putsuynami runakuna apamushqa”.
6 Tsaymi Moisésqa runakunata intëru campamentupa wilakatsirqan kayno nir: “Tinkuna Sagrädu Tolduta sharkatsinantsipaq amana masta imatapis apapäkamuynatsu”.
Tsayno wilakatsiptinmi runakuna manana aparqannatsu.
7 Lapanta rurapäkunanpaq putsuy putsuymi karqan.
Sagrädu Tolduta rurapäkushqan
Éxodo 26.1-37
8 *Sagrädu Toldupaqmi mas habilidäniyuq runakuna chunka bayëtata awapäkurqan llanula putskashqa lïnu hïlupita y azul, granäti y puka milwa hïlukunapita. Tsay bayëtakunamanmi *querubinkunata bordapäkurqan.
9 Tsay chunka bayëtakunaqa tsay tamäñulami karqan. Cada bayëtapa largunmi karqan chunka ishkay metru pulan (12.5). Anchunnami karqan ishkay metru.
10 Pitsqa bayëtakunata largun kaqpa jirapäkurqan juklaylanöna kananpaq. Tsaynöla jirapäkurqan pitsqa kaq bayëtakunatapis.
11 Nirkurnami tsay ishkan jirashqan bayëtakunapa largu kaq kuchunman azul hïlukunata pataparkur churapäkurqan ojalninkuna kananpaq.
12 Pitsqa chunkata (50) rurapäkurqan jukaq bayëtapa kuchunman churananpaq y pitsqa chunkatanami rurapäkurqan jukaq bayëtapa kuchunman churananpaq. Tsaynöpami ishkan bayëtakunapa ojalninkuna frenti frenti karqan shequnanpaq.
13 Ojalninkunapita shequnanpaq qoripita rurapäkurqan pitsqa chunka ganchukunata. Tsay ganchukunawan ishkan jirashqan bayëtakunata shequptinmi juk toldulana karqan.
14 Tsay jananman qatananpaq cabrapa aqtsanpita awapäkurqan chunka juk bayëtakunata.
15 Tsay bayëtakunaqa lapanpis tsay tamäñulami karqan. Cada bayëtapa largun karqan chunka kimsa metru pulanmi (13.5). Anchunnami karqan ishkay metru.
16 Nirkurnami pitsqa bayëtakunata largun kaqpa jirapäkurqan juklaylano kananpaq. Tsaynölami soqta kaqkunatapis largun kaqpa jirapäkurqan juklaylano kananpaq.
17 Tsaynöpis ojalkunata hïlupita rurarkur tsay jirashqan bayëtakunapa tinkuränan kaq kuchunman churapäkurqan. Pitsqa chunka (50) ojalkunata churapäkurqan jukaq jirashqan bayëtapa kuchunman y pitsqa chunkatanami churapäkurqan jukaq bayëtapa kuchunman.
18 Tsay ojalkunapita shequnanpaqmi broncipita rurapäkurqan pitsqa chunka ganchukunata. Tsaywan shequptinmi juk bayëtanölana karqan.
19 Tsay bayëtakuna jananpa qatananpaqmi rurapäkurqan pukaman tinishqa uysha pirqashpita rurashqa tolduta. Tsay pirqashkuna jananmanna qatapäkurqan fïnu qarapita rurashqa tolduwan.
20 Nirkurna acacia qerupita marcukunata rurarkur derëchu ichitsipäkurqan.
21 Cada marcupa altun karqan chusku metru pulan. Anchunnami karqan soqta chunka pitsqa (65) centïmetru.
22 Marcupura laqaränanpaq cada marcupa chakincho ishkay espïgata rurapäkurqan. Tsaynölami lapan marcukunatapis rurapäkurqan.
23 Ishkay chunka (20) marcukunata rurapäkurqan sur kaq lädupa ichitsinanpaq.
24 Tsay marcukuna ichinanpaq rurapäkurqan qellaypita chusku chunka (40) jawiräkunanta. Cada marcupa ishkay espïgan kaptinmi cada marcupa ishkay jawiräkunanpis karqan.
25 Tsaynöla ishkay chunka (20) marcukunata rurapäkurqan norti kaq lädupa ichitsinanpaq.
26 Tsaykuna ichiränanpaqpis qellaypita rurapäkurqan chusku chunka (40) jawiräkunanta. Tsaynöpami cada marcupaq karqan ishkay jawiräkunan.
27 Soqta marcukunata rurapäkurqan inti jeqanan kaq lädupa ichitsinanpaq.
28 Qepan kaq esquïnankunapaqpis ishkay marcukunata rurapäkurqan.
29 Tsay marcukunami esquïnacho tinkuq marcukunaman shumaq laqararqan. Jana kaq esquïnachömi juk argöllawan shequrarqan. Ishkan esquïnancho marcukunata tsaynöla ichitsirqan.
30 Tsaymi pusaq marcukuna tsay läducho karqan. Cada marcupami qellaypita rurashqa ishkay jawiräkunan karqan. Tsaynöpami tsay läducho chunka soqta jawiräkunan karqan.
31 Sagrädu Toldupa jukaq lädun marcukunapa witsan witsan tsakraränanpaq acacia qerupita pitsqa traviskunata rurapäkurqan.
32 Tsaynölami jukaq lädupaqpis pitsqa traviskunata rurapäkurqan. Sagrädu Toldu qepanpaqpis pitsqa traviskunata rurapäkurqan. Tsayqa karqan inti jeqanan kaq lädupami.
33 Chawpi kaq travisqa juk kuchunpita jukaq kuchunyaq ichiraq marcukunapa pasararqan.
34 Tsay marcukunata y traviskunata qoriwan enchaparqan. Traviskuna pasananpaqqa qoripita argöllankunata rurapäkurqan.
35 Nirkurna cortïnata awapäkurqan azul, granäti y puka milwa hïlukunapita y llanula putskashqa lïnu hïlupita. Tsaymannami ishkay querubinkunata shumaq bordapäkurqan.
36 Tsay cortïnatanami qoripita rurashqa ganchukunawan shequpäkurqan acacia qerupita rurashqa chusku tushakunaman. Tsay tushakuna qoriwan enchapashqami karqan. Tushakunapa jawiräkunan qellaypita rurashqami karqan.
37 Tsaypitami juk cortïnata awapäkurqan tolduman yaykuna punkupaq. Tsayta awapäkurqan azul, granäti y puka milwa hïlukunapita y llanula putskashqa lïnu hïlupita. Tsay cortïna kuyaylapaq kananpaq shumaq bordapäkurqan.
38 Cortïnata churananpaq pitsqa tushakunata y ganchunkunata rurapäkurqan. Tsay tushakunapa puntanta y argöllankunatapis qoriwanmi enchaparqan. Tsaynöpis tushakuna ichiränanpaq pitsqa jawiräkunanta broncipita fundipäkurqan.
Ichic wilacuycuna
^ 36.1 Éxo. 35.4-19.
^ Sagrädu Toldu Liyinki Tinkuna Toldupita tantiyatsikuyta.
^ Sagrädu Toldu Liyinki Tinkuna Toldupita tantiyatsikuyta.
^ querubín Querubinqa älayuq angilkunami karkaykan. Querubinkunatami Tayta Dios churarqan Edén huertata täpananpaq (Gén. 3.24). Tsaynölami Pactu Babulpa tsapanan jananchöpis qoripita rurashqa ishkay querubinkuna ichiraykarqan (Éxo. 25.18-22; Heb. 9.5). Salomón ruratsishqan templuchöpis ishkay querubinkunami qoriwan enchapashqa karqan. Tsay querubinkunapa altunmi karqan chusku metru pulan (1Rey. 6.23-29). Profëta Ezequielpis revelacionchömi querubinkunata rikarqan (Eze. 10.1-22; 41.18-19).
