Éxodo 37:1-29
37 Tsaynöpis acacia qerupita juk babulta Bezaleel rurarqan. Tsay babulpa largun karqan juk metru chunka centïmetru. Tsaynöla anchun y altunpis karqan soqta chunka pitsqa (65) centïmetru.
2 Rurinpa y jananpa qoriwan enchaparqan. Tsaynöpis intëru kuchunpa qoripita rebëtinta rurarkur jiruruq churaparqan.
3 Qoripita chusku argöllata rurarkurmi chuskun chakinkunaman tanaparqan: ishkayta babulpa jukaq lädunman y ishkaytana babulpa jukaq lädunman.
4 Tsaynöpis acacia qerupitami ishkay largu qeruta rurarqan. Tsay qerukunata qoriwan enchaparkurmi
5 argölla uchkunpa pasatsirqan babulta wintupäkunanpaq.
6 *Babulpa tsapanantana rurarqan qori pürupitami. Largun karqan juk metru chunka centïmetru. Anchunnami karqan soqta chunka pitsqa (65) centïmetru.
7 Tsaynölami martilluwan takaylapa ishkay *querubinkunata qoripita rurarqan. Tsay *angilkunatami babulpa tsapanan ishkan kuchunman ichitsirqan.
8 Tsapananta y querubinkunataqa rurarqan tsay piëzalatami. Jukaq querubín karqan itsuq kaq läduncho y jukaqnami karqan alawqa kaq läduncho.
9 Tsay ishkan querubinkunami älankuna mashtashqa frenti frenti babulpa tsapananta rikarpaykarqan. Tsaynöpami ishkanpa älankuna tsapananta lantuparqan.
Tanta churakuna mësata rurashqan
Éxodo 25.23-29
10 Tsaynöpis acacia qerupita mësata rurarqan. Tsay mësapa largunmi karqan isqun chunka (90) centïmetru. Anchunnami karqan chusku chunka pitsqa (45) centïmetru y altunnami karqan soqta chunka pitsqa (65) centïmetru.
11 Tsay mësapa jananta, rurinta y chakinkunatapis qoriwan enchaparqan. Kuchunkunapapis jiruruq qoripita rurashqa rebëtinta churaparqan.
12 Tsaynöpis qanchis centïmetru anchuta qeruta jiruruq churarqan. Tsay jananmannami qoripita rurashqa juk rebëtita churarqan.
13 Tsaynöpis chusku argöllakunata qoripita rurarkur mësapa chuskun chakinkunaman tanarqan.
14 Tsay argöllakunata tanarqan chakinpita rebëtinman tinkuraqman. Tsay argöllakunapami ishkay largu qerukunata pasatsirqan mësata wintupäkunanpaq.
15 Mësa wintukuna qerukunata acacia qerupita rurarkurmi qoriwan enchaparqan.
16 Tsay mësapa manëjunkunatami qori pürupita rurarqan plätukunata, wishlakunata, järrakunata y pucillukunata. Tsay järrakuna y pucillukunaqa vïnuta *altarman winapänanpaqmi karqan.
Candelabruta rurashqan
Éxodo 25.31-39
17 Tsaynöpis candelabruta qori pürupita martilluwan takaylapa rurarqan. Tsay candelabrupa jamakunan, chakin, cöpankuna y waytankunapis juk piëzalami karqan.
18 Tsay candelabru soqta rikrayuqmi karqan. Kimsa rikranmi jukaq lädupa y kimsa rikranmi jukaq lädupa karqan.
19 Cada rikrancho kimsa waytakunata rurarqan. Tsay waytakuna karqan almendrupa waytan niraq.
20 Candelabrupa chakinchöpis karqan chusku waytankuna. Tsay waytakunapis karqan almendrupa waytan niraqmi.
21 Cada rikran tinkuraqchömi karqan juk wayta.
22 Waytankunapis y rikrankunapis tsay piëzalami karqan. Lapanpis qori pürulapita martilluwan takaylapa rurashqami karqan.
23 Tsaynölami candelabrupaq qanchis mechërukunata, mëchapa liptanta jorqunanpaq taksha alicätinkunata y lipta shuntakunan taksha plätukunatapis qori pürupita rurarqan.
24 Tsay candelabruta y lapan manëjunkunata rurarqan kimsa chunka kimsa (33) kïlu qoripitami.
Inciensuwan qoshtatsikuna altarta rurashqan
Éxodo 30.1-5
25 Inciensuwan qoshtatsikuna *altartapis acacia qerupita rurarqan. Tsay altarpa largunpis anchunpis chusku chunka pitsqa (45) centïmetrumi karqan. Altunmi karqan isqun chunka (90) centïmetru. Chuskun kuchunkunachömi altarwan juk piëzala kananpaq waqratano rurarqan.
26 Tsay altarta jananpa, lädunkunapa y waqrankunatapis qori püruwanmi enchaparqan. Tsaynöpis intëru kuchunpa qoripita rebëtinta rurarkur jiruruq churaparqan.
27 Tsay churashqan rebëtin chakinpana cada esquïnanman tanaparqan qoripita argöllakunata. Tsay argöllakunami karqan qeruta pasarkatsir altarta wintupäkunanpaq.
28 Altar wintukuna qerukunata acacia qerupita rurarkurmi qoriwan enchaparqan.
29 Tsaynölami perfümita ruraqkuna rurashqanno *sagrädu aceitita y ali asyaq* inciensutapis rurarqan.*
Ichic wilacuycuna
^ babulpa tsapanan Babulpa tsapananpa jutinmi hebreucho karqan kapporet. Kapporet ninanqa tsapanan ninanmi y jutsata perdonashqan ninanmi. Wakin castellänu traduccionkunaqa propiciatoriu nirmi tsay palabrata traducin. Babulpa tsapanan jananpitami Moisésta Tayta Dios parlaparqan (Éxo. 25.22). Tsaynöpis babulpa tsapanan jananman pukutaycho Tayta Dios yurimurqan (Lev. 16.2). Israel runakuna purificashqa kananpaq kaq junaqchömi mandaq cüra babul kashqanman yaykur turitupa yawarninman dëdunta jatirkur babulpa tsapananta tsaqtsuparqan (Lev. 16.14).
^ querubín Querubinqa älayuq angilkunami karkaykan. Querubinkunatami Tayta Dios churarqan Edén huertata täpananpaq (Gén. 3.24). Tsaynölami Pactu Babulpa tsapanan jananchöpis qoripita rurashqa ishkay querubinkuna ichiraykarqan (Éxo. 25.18-22; Heb. 9.5). Salomón ruratsishqan templuchöpis ishkay querubinkunami qoriwan enchapashqa karqan. Tsay querubinkunapa altunmi karqan chusku metru pulan (1Rey. 6.23-29). Profëta Ezequielpis revelacionchömi querubinkunata rikarqan (Eze. 10.1-22; 41.18-19).
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
Angilkunaqa (1) Tayta Dios nishqankunata wilakärin (Gén. 18.16–19.29; Dan. 8.15-17; 9.21-23; Mat. 1.20-24; Luc. 1.11-20, 26-38), (2) Tayta Diospa favornin pelyapäkun (2Rey. 6.15-17; Dan. 10.13-14; Apoc. 12.7-9) y (3) Diosman yärakuqkunata tsapan y yanapan (Sal. 91.11-12; Heb. 1.14).
Satanáspa angilninkunaqa supaykunami karkaykan (Mat. 25.41; Apoc. 9.11).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ sagrädu Liyinki santupita tantiyatsikuyta.
^ 37.29 Wakin runakunaqa mushkuq nipäkun.
^ 37.29 Éxo. 30.22-38.
