Éxodo 8:1-32
8 (7.26) Moisésta yapay TAYTA DIOS kayno nirqan: “Faraón kaqman aywaykur kayno ninki: ‘TAYTA DIOSMI kayno nin: Kuyashqä runakuna noqata adoramaq aywananpaq kachariy.
2 (7.27) Aywananta mana munaptikiqa ratsakkunawanmi intëru nacionnikita castigashaq.*
3 (7.28) Mayupita tsaytsika ratsakkuna yarqamurmi yaykapäkunqa palaciuykiman, cämaykiman, hornuykiman, artësaykiman, mandäshishuqnikikunapa wayinkunaman y intëru Egiptucho taq runakunapa wayinkunamanpis.
4 (7.29) Tsay ratsakkunaqa janaykimanpis, mandäshishuqnikikunapa jananmanpis y intëru Egiptucho taq runakunapa jananmanpis saltanqaraqmi’ ”.
5 (1) Mastapis Moisésta TAYTA DIOS kayno nirqan: “Aarónta niy mayukunaman, qochakunaman y pukyukunaman aywaykur tukrunwan toqrinanpaq. Tsayno toqriptinmi tsaytsika ratsakkuna yarqamunqa Egiptuman juntaqpaq”.
6 (2) Tsawraqa lapan yakuman aywaykur jananpa Aarón toqriptinmi intëru Egiptuman tsaytsika ratsakkuna yarqamurqan.
7 (3) Brüjukunapis munayniyuq kashqanta musyatsikurmi Aarón rurashqannöla ratsakkunata yakupita yuritsimurqan.
8 (4) Tsaypitanami Moisésta y Aarónta qayaykatsir Faraón kayno nirqan: “TAYTA DIOSTA manakäriy noqapita y Egipto runakunapitapis lapan ratsakkunata elqätsinanpaq. Elqätsiptinqa TAYTA DIOSPAQ sacrificiuta rupatsiq aywapäkunanpaq Israel runakunata kachashaqmi”.
9 (5) Tsawraqa Faraónta Moisés kayno nirqan: “TAYTA DIOSTA manakunäpaq nimashqayki hörami qampaq, mandäshishuqnikikunapaq y wakin Egipto runakunapaqpis manakushaq. Manakuptïmi palaciuykicho y maytsaychöpis ratsakkuna wanur ushakaptin Nilo mayucho kaqkunalana quëdanqapaq”.
10 (6) Tsayno niptin Faraón kayno nirqan: “Wara junaq manakuykulay”.
Tsawraqa Moisés kayno nirqan: “Nishqaykinömi kanqa. Tsaynöpami musyankipaq TAYTA DIOSNÏMANQA mayqan diospis mana tinkushqanta.
11 (7) Ratsakkuna palaciuykicho wanur ushakaptinmi Nilo mayulachöna kanqapaq. Tsaynöpami mana rabyanätsishunkinatsu qamta, mandäshishuqnikikunata ni pitapis”.
12 (8) Tsayno nirkurmi Moisés y Aarón aywakurqan Faraónpa palaciunpita. Nishqannölami TAYTA DIOSTA Moisés manakurqan ratsakkunata elqätsinanpaq.
13 (9) Moisés manakushqannöla TAYTA DIOS ruraptinmi lapan ratsakkuna wanurqan wayikunacho, patiukunacho y chakrakunachöpis.
14 (10) Wanushqa ratsakkunata muntuy muntuytaraq runakuna shuntaptinmi maytsaychöpis fiyupa asyarqan.
15 (11) Ratsakkuna elqashqana kashqanta rikarmi Faraónqa yapay shonqunta chukruyätsirqan. Tsaymi mana cäsuparqannatsu Moisésta y Aarónta. Tsayno karqan TAYTA DIOS nishqannölami.
Tsaytsika chuspi yurishqan
16 (12) Tsawraqa TAYTA DIOS kayno nirqan Moisésta: “Aarónta ninki tukrunwan pampata wirunanpaq. Tsayno wiruptinmi akapa chuspikunaman* alpa tikranqa intëru Egiptucho junta kananpaq”.
17 (13) Tsawraqa TAYTA DIOS nishqannölami pampata Aarón wiruykuptin intëru Egiptucho akapa chuspikunaman alpa tikrarqan. Tsay chuspikunami maytsaychöpis runakunata y uywakunatapis usharqan.
18 (14) Tsayta rikashpan brüjukunapis chuspikunata yuritsiyta munarqan. Yuritsiyta munarpis manami kamäpakurqantsu. Tsaynölami chuspikunaqa runakunata y uywakunatapis pasaypami usharqan.
19 (15) Tsaymi brüjukuna Faraónta kayno nirqan: “Kayqa Diospa castïgunmi kaykan”.
Tsayno niptinpis Faraónqa shonqun chukru kaptinmi mana cäsukurqantsu. Tsayno karqan TAYTA DIOS nishqannölami.
Tsaytsika upuqruy yurishqan
20 (16) Tsaypita Moisésta TAYTA DIOS kayno nirqan: “Wara tutami tsaka tsakala Faraón aywanqa mayuman. Qampis tsay hörala mayuman aywaykur payta kayno ninki: ‘TAYTA DIOSMI kayno nin: Kuyashqä runakunata kachay adorapäkamänanpaq.
21 (17) Aywananta mana kachapaptikiqa upuqruytami* yuritsimushaq qamman, mandäshishuqnikikunaman y intëru Egiptucho taq runakunamanpis. Tsaymi wayikunachöpis y maytsaychöpis tsaytsika kanqa.
22 (18) Tsayno kaptinpis kuyashqä runakuna tashqan Gosén partichöqa juklaylapis upuqruy manami kanqatsu. Tsaynöpami musyanki Egipto runakunata noqa TAYTA DIOS castigaykashqäta.
23 (19) Tsaymi Egipto runakunata castigarpis kuyashqä Israel runakunataqa mana castigashaqtsu. Tsay castïguqa wara junaqmi qalaykunqa’ ”.
24 (20) TAYTA DIOS nishqannölami upuqruy juntarqan Faraónpa palaciunman, mandäshiqninkunapa wayinkunaman y intëru Egiptuman. Tsayno kaptinmi Egipto runakuna ima ruraytapis mana kamäpakurqantsu.
25 (21) Tsaymi Faraónqa Moisésta y Aarónta qayaykatsir kayno nirqan: “Kananqa aywapäkuy Diosnikita adorar sacrificiuta rupatsipäkunaykipaq. Itsanqa kay nacionpita ama yarqupäkunkitsu”.
26 (22) Tsayno niptinmi Moisés kayno nirqan: “Nishqaykinöqa manami alitsu kanqa. TAYTA DIOSNÏTA adorar sacrificiuta rupatsiptïqa Egipto runakunapaq pasaypa melanaypaqmi kanqa. Sacrificiuta rupaykätsiqta rikamarqa fiyupa rabyashpan saqmaylapachari wanutsipäkamanqa.
27 (23) Tsawraqa kimsa junaq aywayta chunyaq jirkaman aywapäkushaq. Tsaychöraqmi TAYTA DIOSNÏ nishqanno sacrificiuta rupatsir adorapäkushaq”.
28 (24) Tsayno niptinmi Faraón kayno nirqan: “Tsayno kaptinqa chunyaq jirkaman aywapäkuy TAYTA DIOSNIKITA adorar sacrificiuta rupatsipäkunaykipaq. Itsanqa aläpa karumanqa ama aywapäkuytsu. Tsaycho noqaläpaqpis manakuykunki”.
29 (25) Tsayno niptinmi Moisés kayno nirqan: “Kaypita yarqur juklami TAYTA DIOSTA manakushaq qampita, mandäshishuqnikikunapita y intëru Egiptupitapis upuqruykunata elqätsinanpaq. Noqakunata kachamänaykipaq awnirkamarpis paqta wara junaq juk yarpaywan yurirkamur TAYTA DIOSTA adoraq aywapäkunäta michämankiman”.
30 (26) Tsawraqa Faraónpa palaciunpita yarqurir Moisésqa TAYTA DIOSTA jukla manakurqan.
31 (27) Manakushqanno TAYTA DIOS ruraptinmi Faraónpita, mandäshiqninkunapita y intëru Egiptucho taq runakunapitapis upuqruykuna elqar ni jukpis karqannatsu.
32 (28) Upuqruy elqaptinnaqa Faraónpa shonqun yapay chukruyarqan. Tsaymi mana munarqannatsu Israel runakuna aywananta.
Ichic wilacuycuna
^ 8.2 Apoc. 16.13.
^ 8.16 Juk ishkay castellänu traduccionkunachömi niykan usakuna kashqanta.
^ 8.21 Wakin runakunaqa täbanutami nipäkun.
