Éxodo 9:1-35
9 Tsawraqa Moisésta TAYTA DIOS kayno nirqan: “Aywaykur Faraónta kayno ninki: ‘Hebreo runakunapa* TAYTA DIOSNINMI kayno nin: Kuyashqä hebreo runakunata kachariy adoramaq aywapäkunanpaq.
2 Aywananta mana munar tsaynöla michaptikiqa
3 intëru Egiptumanmi pesti qeshyata yuritsimushaq. Tsaywanmi wanunqa cawallukuna, bürrukuna, *camëllukuna, wäkakuna, uyshakuna y cabrakunapis.
4 Egipto runakunapa uywankuna qeshyawan wanuptinpis Israel runakunapa uywankunaqa manami ni juklaylapis wanunqatsu’ ”.
5 Nirkurmi TAYTA DIOS kayno nirqan: “Warami tsay nishqäta rurashaq”.
6 Nishqannöla waraynin* junaq ruraptinmi Egipto runakunapa uywankuna wanupäkurqan. Israel runakunapami itsanqa ni juklaylapis mana wanurqantsu.
7 Tsaymi Israel runakunapa uywankunata rikamunanpaq Faraón kachaptin mana ni juklaylapis wanushqatsu karqan. Tsayno kaykaptinpis Faraónqa shonqun yapay chukruyaptin manami munarqantsu Israel runakuna aywapäkunanta.
Runakunata y uywakunata chupu ushashqan
8 Tsawraqa Moisésta y Aarónta TAYTA DIOS kayno nirqan: “Hornupita uchpakunata aptakurkur aywapäkunki Faraón kaqman. Nirkur paypa nawpancho uchpata altupa Moisés matsitsun.
9 Tsay uchpataqa wayra intëru Egiptupa polvutano apanqa. Tsaypitami chupu yurimunqa lapan Egipto runakunacho y uywankunachöpis”.
10 TAYTA DIOS nishqannömi Moisés y Aarón hornupita uchpata shuntarqan. Nirkurmi Faraón kaqman aywaykur uchpata Moisés altupa matsirqan. Tsawraqa runakunatapis y uywakunatapis chupu usharqan.*
11 Wakin runakunatano chupu ushaptinmi Moiséspa nawpanman brüjukunapis mana aywarqannatsu.
12 Yapaypis TAYTA DIOSMI Faraónpa shonqunta chukruyätsirqan. Tsaymi Moisés y Aarón nishqanta Faraón mana cäsukurqantsu. Tsayno karqan Moisésta TAYTA DIOS nishqannölami.
Runtu tamya kashqan
13 Tsaypita Moisésta TAYTA DIOS kayno nirqan: “Wara tuta aywaykur Faraónta kayno ninki: ‘Hebreo runakunapa TAYTA DIOSNINMI kayno nin: Adoramaq aywapäkunanpaq kuyashqä runakunata kachariy.
14 Mana kachapaptikiqa kananyaq castigashqäpitapis masraqmi castigashayki. Tsaynölami castigashaq mandäshishuqnikikunata y intëru Egiptucho taq runakunatapis. Tsayraqmi tantiyankipaq noqala kay patsacho munayniyuq Dios kashqäta.
15 Munarqa maynami qamtapis intëru Egipto runakunatapis fiyu qeshyawan ushakätsïmanna karqan.
16 Tsayno kaptinpis qamta kawaykaqta kachashqä maytsaychöpis taq runakuna munayniyuq kashqäta musyananpaqmi.*
17 “ ‘Mana tantiyakushpaykimi kuyashqä runakunata michaykanki adoramaq mana aywananpaq.
18 Tsaymi wara junaq kayno höra runtu tamyata tamyatsimushaq. Tsay tamyanöqa manami kashqatsu Egipto nación qalaykushqanpita hasta kananyaq.
19 Kananqa uywaykikunata jukla wayi rurinman qaykatsiy. Wayi rurincho mana lantukuqtaqa uywatapis runatapis lapantami runtu tamya wanutsinqapaq’ ”.
20 Moisés tsayno niptinmi Faraónpa wakin mandäshiqninkuna TAYTA DIOS nishqanta cäsukur ashmayninkunata y uywankunata wayi rurinman yaykatsirqan.
21 Wakinmi itsanqa TAYTA DIOS nishqanta mana wiyakushpan waqtalacho kachaykurqan.
22 Tsawraqa Moisésta TAYTA DIOS kayno nirqan: “Runtu tamya tamyamunanpaq makikita jana patsapa joqariy. Tsay runtu tamyami chayanqa Egiptucho kaykaq lapan runakunaman, uywakunaman y chakracho kaykaq mikuykunamanpis”.
23 Nishqanno jana patsaman Moisés tukrunta joqariptinmi intëru Egiptuman TAYTA DIOS elqütsimurqan, räyutsimurqan y runtu tamyata tamyatsimurqan.
24 Tsawraqa runtu tamyapis y räyupis mana chawaypami karqan.* Tsaynöqa manami imaypis Egiptucho karqantsu.
25 Tsaymi tsay runtu tamya runakunatapis uywakunatapis intëru Egiptucho wanutsirqan. Chakracho mikuykunatapis pasaypami usharqan. Yörakunatapis intëru Egiptucho qarapächulata kachaykurqan.
26 Tsayno tamyaykarpis Israel runakuna taykashqan Gosén partimanqa manami runtu tamya chayarqantsu.
27 Tsawraqa Moisésta y Aarónta qayaykatsir Faraón kayno nirqan: “Noqa y Egipto runakunami jutsayuq karkaykä TAYTA DIOS kayno castigapäkamänanpaq.
28 TAYTA DIOSTA manakäriy räyutapis y runtu tamyatapis chawätsinanpaq. Kananqa kachashaykinami TAYTA DIOSTA adoraq aywapäkunaykipaq”.
29 Tsayno niptinmi Moisés kayno nirqan: “Kay markapita yarqunä höra makïta jana patsapa joqarkur TAYTA DIOSTA manakuptïmi runtu tamyapis räyupis chawanqa. Tsaynöpami musyankipaq kay patsapis TAYTA DIOSPA munaynincho kashqanta.
30 Tsayno kaptinpis musyämi qampis ni mandäshishuqnikikunapis TAYTA DIOSTA mana *mantsakushqaykita”.
31 Tsay runtu tamyawanmi shikshiraykaq cebädapis y tukturaykaq linäzapis chipya ushakarqan.
32 Trïguta y centënatami itsanqa qepa muruy kaptin mana ushakätsirqantsu.
33 Markapita yarqurirmi makinta joqarkur TAYTA DIOSTA Moisés manakurqan. Tsawraqa jinan hörami runtu tamyapis y räyupis chawarqan.
34 Tamyapis, runtu tamyapis y räyupis chawaptinnami Faraón y mandäshiqninkunapis shonqunta chukruyätsirqan.
35 Tsaymi Israel runakuna TAYTA DIOSTA adoraq aywapäkunanta Faraón mana munarqannatsu. Tsayno karqan Moisésta TAYTA DIOS nishqannölami.
Ichic wilacuycuna
^ 9.1 Hebreo runakunaqa Israel runakunami karqan. Tsaymi Moiséspis hebreo runa karqan.
^ camëllu Camëlluqa jatunkaray uywami kaykan. Camëllukunataqa ashmapäkun maypapis aywar cargakunanpaq y muntakunanpaqmi. Tsaynöpis camëllupa milwanta putskarkurmi awapäkuq. Camëllupa milwanpitami Bautizaq Juanpa röpanpis karqan (Mat. 3.4; Mar. 10.25).
^ 9.6 Wakin runakunaqa warantin nipäkun.
^ 9.10 Apoc. 16.2.
^ 9.24 Apoc. 8.7; 16.21.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
Tayta Diosta mantsakunantsipaq yachakuntsi (Deut. 4.10; 14.23; 17.19; Sal. 34.11). Tayta Diosta mantsakuq runaqa yachaq y tantiyakuqmi kaykan (Job 28.28; Sal. 111.10; Prov. 1.7).
Mushuq Testamentuchöpis Tayta Diosta mantsakunantsipaq kashqanpitami parlan. Tsaychömi niykan payta mantsakuqkunata Tayta Dios kuyapashqanta (Luc. 1.50; Hech. 10.35) y Tayta Diosta mantsakur pay munashqanno kawashqantsita (2Cor. 7.1; 1Ped. 1.17; 2.17). Tsaynöpis niykan Tayta Diosta mantsakuqkuna premiuta chaskinanpaq kashqanta (Apoc. 11.18).
Itsanqa Jesucristuta chaskikur jutsata rurashqantsipita perdonashqana kaykantsi (Rom. 3.23-25; 1Juan 1.9). Tsaymi musyantsi Tayta Dios manana castigamänantsipaq kashqanta (1Juan 4.18) y payta mana mantsakuypa manakunantsipaq kashqanta (Rom. 8.15; Efe. 3.12).
