1 Crónicas 10:1-14
10 Gilboa jirkacho filisteo runakuna atacaptinmi Israel runakuna qeshpir aywakärirqan. Tsayno qeshpiykaqtami filisteo runakuna atskata wanutsipäkurqan.
2 Tsaynölami Saúlta y tsurinkunatapis qatikacharqan. Tsaychömi wanutsipäkurqan Saúlpa tsurinkuna Jonatánta, Abinadabta y Malquisúata.
3 Tsaypitana filisteo runakuna Saúlta flëchaykärirqan. Tsaymi qeshpiyta mana kamäpakur
4 armanta apapaq yanapaqnin soldäduta Saúl kayno nirqan: “Espädaykiwan wanuratsimay. Manami munätsu Diosta mana reqiq filisteo runakuna wanurkatsimar kushikärinanta”.
Tsayno niptinpis yanapaqnin soldädu pasaypa mantsakushpan manami wanutsiyta munarqantsu. Mana munaptinmi espädanta jawirkur puntanman Saúl lätakuykurqan.
5 Saúl wanushqanta rikaykurmi yanapaqnin soldädupis kikin tuksikurirqan.
6 Tsaynöpami Saúl, kimsa tsurinkuna y paywan kaykaq aylunkuna wanurqan.
7 Israel soldädukuna qeshpishqanta y tsurinkunawan Saúl wanushqanta mayaykurmi Jezreel pampacho taq Israel runakuna markankunapita qeshpir aywakärirqan. Tsaymi filisteo runakunana tsay markakunacho tarqan.
8 Saúl wanushqanpita jukaqnin junaqnami wanushkunapa imaykantapis apakunanpaq filisteo runakuna aywapäkurqan. Tsaychömi Saúlta y tsurinkunata Gilboa jirkacho wanushqa jitarpaykaqta taripäkurqan.
9 Tsawraqa Saúlpa umanta roqurishpan espädanta y pelyananpaq kaq röpanta shuntapäkurqan. Nirkurmi intëru markakunaman diosninkunapa templunman wilakuqkunata kachapäkurqan Saúl wanushqanta wilakärinanpaq.
10 Saúlpa espädanta y pelyananpaq kaq röpantanami churapäkurqan diosninkunapa templunman y umantanami warkurqan *Dagón diosninpa templunman.
11 Saúlta tsayno rurapäkushqanta Galaad particho kaykaq Jabes markacho taq Israel runakuna mayaykurmi
12 alinnin kaq soldädukuna wilanakurkur Saúlpa y tsurinkunapa ayankunata shuntapäkurqan. Nirkurmi tsay ayakunata Jabesman apaykur encina yöra sikinman pampaykur qanchis junaqyaq ayunapäkurqan.
13 TAYTA DIOSTA mana cäsukushqanpita y TAYTA DIOSTA tapukunanpa trukan brüjaman rikatsikuq aywashqanpitami Saúl tsayno wanurqan.*
14 Tsaymi Tayta Dios kamakätsirqan filisteo runakuna payta wanutsipäkunanpaq. Nirkurnami Isaípa tsurin Davidtana churarqan rey kananpaq.*
Ichic wilacuycuna
^ Dagón Dagónqa karqan filisteo runakuna adorashqan ïdulumi. Mikuyninkuna ali wayunanpaq kashqanta yarparmi tsay ïduluta adorapäkuq. Dios kashqanta yarpapäkuptinpis manami rasunpatsu dios karqan (Jue. 16.23; 1Sam. 5.1-7).
^ 10.13 Lev. 19.31; 20.6; 1Sam. 28.7-8.
^ 10.14 1Sam. 13.13-14; 15.22-29.
