1 Crónicas 12:1-40
12 Davidqa Cispa tsurin Saúlpita qeshpirkurmi Siclag markaman aywarqan. Tsaycho taykaptinmi ali geniuyuq soldädukunapis tsayman aywarqan payta yanapananpaq.
2 Tsay runakunaqa ishkan makinpami warakayta y flëchaytapis yachapäkuq. Paykunaqa Benjamín trïbu runakuna kar Saúlwan tsay trïbulapitami karqan.
Tsay runakunami karqan:
3 Semaapa tsurin capitán Ahiezer,Ahiezerpa wawqin Joás (Ahiezer y Joásqa karqan Gabaa markapitami),Azmavetpa tsurinkuna Jeziel y Pelet,Anatot markapita kaq Beraca y Jehú,
4 4a Gabaón markapita kaq Ismaías (payqa Kimsa Chunka nishqan alinnin kaq soldäducho mandaqmi karqan),4b (5) Jeremías,Jahaziel,Johanán,Gedera markapita kaq Jozabad,
5 (6) Eluzai,Jerimot,Bealías,Semarías,Haruf markapita kaq Sefatías,
6 (7) Elcana,Isías,Azareel,Joezer,Jasobeam (tsay ultimu pitsqa kaq runakunaqa karqan Coré aylupitami),
7 (8) Joela y Zebadías (Joela y Zebadíasqa karqan Gedor markapita kaq Jerohampa tsurinkunami).
8 (9) Tsaynölami chunyaq jirkacho kaykaq machaycho David pakaraykaptin Gad trïbu runakunapis pay kaqman aywarqan yanapananpaq. Paykunaqa escüdutapis lanzatapis alimi manijayta yacharqan. Leonnöpis pasaypa mantsariypaq y luychunöpis ali cörriqmi karqan.
9 (10) Punta kaq soldädumi karqan Ezer, ishkay kaq karqan Obadías, kimsa kaq karqan Eliab,
10 (11) chusku kaq karqan Mismana, pitsqa kaq karqan Jeremías,
11 (12) soqta kaq karqan Atai, qanchis kaq karqan Eliel,
12 (13) pusaq kaq karqan Johanán, isqun kaq karqan Elzabad,
13 (14) chunka kaq karqan Jeremías y chunka juk kaq karqan Macbanai.
14 (15) Paykuna karqan Gad trïbu soldädukunapa capitanninkunami. Mas kalpayuq kaqqa waranqa (1,000) soldädukunapa kalpannömi kalpan karqan. Mënus kalpayuq kaqpis pachak (100) soldädukunapa kalpannömi kalpan karqan.
15 (16) Tsay soldädukunami wata qalaykunan killacho Jordán mayuta pasarqan pasaypa cargashqa aywaykaptin. Paykunata rikaykurmi ishkan lädu pampakunacho taq runakuna qeshpir aywakärirqan.
16 (17) Tsaynölami Benjamín trïbu runakuna y Judá trïbu runakuna Davidta yanapananpaq pakaraykashqan machayman aywapäkurqan.
17 (18) Chayaykuptinmi machaypita yarqarkamur David kayno nirqan: “Yanapamänaykipaq shamushqa kaptikiqa chaskikushaykimi. Jutsaynaq kaykaptïpis conträkunapa makinman kachaykamänaykipaq shamushqa kaptikimi itsanqa unay ayluntsikuna yärakushqan Tayta Dios juzgashunkipaq”.
18 (19) Tsaychömi karqan Kimsa Chunka nishqan alinnin kaq soldädukunapa capitannin Amasai. Espíritu Santu parlatsiptin Amasai kayno nirqan:“¡Makiki chakikichömi karkaykä, tayta David!¡Qamwanmi noqakuna imaypis kaykäshaq, Isaípa tsurin David!¡Tayta Dios yanapaykäshuptikiqa qam y yanapashuqnikikunapis ali kawaykulätsun!”
Amasai tsayno niptinmi paykunata David churarqan soldädunkunapa capitannin kananpaq.
19 (20) Tsaynölami Manasés trïbu soldädukunapis David kaqman aywapäkurqan payta yanapananpaq. Tsay hörami Davidqa filisteo soldädukunata yanapar Saúlpa contran pelyaq yarqunanpaqna kaykarqan. Itsanqa filisteo runakunapa mandaqninkunami wilanakurqan Davidta kutitsinanpaq kayno nir: “Kay runaqa wanurkatsimashpantsi umantsita apakurkurmi patronnin Saúlman kutinqa”.
20 (21) Siclagman David kutiykuptinmi Manasés trïbu soldädukunapis paywan aywarqan. Paykuna karqan Adnas, Jozabad, Jediael, Micael, Jozabad, Eliú y Ziletai. Paykunami karqan Manasés trïbupita waranqa (1,000) soldädukunapa capitanninkuna.
21 (22) Contrankunata vincinanpaqmi paykuna Davidta yanaparqan. Tsaymi paykunata ali chölu kaptin churarqan soldädunkunapa capitanninkuna kananpaq.
22 (23) Waranlanta waranlatami runakuna chayarqan Davidpa soldädun kananpaq. Tsaytsika karmi Tayta Diospa soldädunkunanöraq karqan.
Rey kananpaq Davidta Hebróncho churapäkushqan
23 (24) Hebróncho David kaykaptinmi atska soldädukuna aywaykur Saúlpa trukan rey kananpaq Davidta churapäkurqan. Tsaynöpami TAYTA DIOS nishqannöla David rey karqan.
24 (25) Judá trïbupita karqan soqta waranqa pusaq pachak (6,800) soldädukuna. Paykunami guërracho pelyananpaq listu aywarqan escüdunkunawan y lanzankunawan.
25 (26) Simeón trïbupitami karqan qanchis waranqa pachak (7,100) soldädukuna. Paykunapis guërracho pelyananpaq listu kamarikushqami karqan.
26 (27) Leví trïbupita karqan chusku waranqa soqta pachak (4,600) soldädukuna.
27 (28) Tsaynölami kimsa waranqa qanchis pachak (3,700) soldädukunawan karqan Aarón aylupita Joiada
28 (29) y ishkay chunka ishkay (22) aylunkunawan geniuyuq mözu Sadocpis. Sadocwan kaykaq runakunaqa aylunkunapa mandaqninkunami karqan.
29 (30) Benjamín trïbupitapis Saúlpa trïbu mayinkuna karqan kimsa waranqa (3,000) soldädukunami. David manaraq rey kaptinmi paykunaqa karqan Saúlpa soldädunkuna.
30 (31) Efraín trïbupita karqan ishkay chunka waranqa pusaq pachak (20,800) ali geniuyuq soldädukuna. Paykunaqa karqan lapan trïbucho mas respitashqa runakuna.
31 (32) Tsaynölami pulan kaq Manasés trïbupita karqan chunka pusaq pachak waranqa (18,000) soldädukuna. Paykunatami kachapäkurqan Davidta rey kayman churapäkunanpaq.
32 (33) Isacar trïbupita karqan ishkay pachak (200) mandaqkuna. Paykunaqa tantiyakuq runakuna karmi Israel runakunata imata rurananpaqpis shumaq yätsirqan. Tsaymi paykuna nishqanta Israel mayinkuna rurapäkuq.
33 (34) Zabulón trïbupita karqan pitsqa chunka waranqa (50,000) soldädukuna. Paykunapis tukuy niraq armakunawan Davidpa favornin pelyananpaq kamarikushqa karqan.
34 (35) Neftalí trïbupita karqan waranqa (1,000) capitankuna. Paykunawanmi karqan kimsa chunka qanchis waranqa (37,000) soldädukuna escüdunkuna y lanzankuna kamarikushqa.
35 (36) Dan trïbupita karqan ishkay chunka pusaq waranqa soqta pachak (28,600) soldädukuna pelyananpaq listu kamarikushqa.
36 (37) Aser trïbupita karqan chusku pachak waranqa (40,000) soldädukuna pelyananpaq listu kamarikushqa.
37 (38) Jordán mayu wak tsimpapita karqan pachak ishkay chunka waranqa (120,000) soldädukuna. Paykuna karqan Rubén trïbupita, Gad trïbupita y pulan Manasés trïbupita. Paykunapis tukuy niraq armankunawan listumi karqan guërracho pelyananpaq.
38 (39) Tsay soldädukunaqa arman aptashqami Hebrónman aywapäkurqan Davidta rey churananpaq. Tsaynölami wakin kaq Israel runakunapis munapäkurqan David rey kananta.
39 (40) Aylunkuna kamaripashqan socörruta mikurmi paykunaqa Davidwan tsaycho kimsa junaq mikur upur qoyarqan.
40 (41) Tsaynölami Isacar trïbu, Zabulón trïbu y Neftalí trïbu runakunapis tsay fiestacho mikupäkunanpaq apapäkurqan harinakunata, hïgus tantakunata*, päsaskunata, vïnukunata, aceitita, törukunata, uyshakunata y cabrakunatapis. Tsay mikuykunatami apapäkurqan bürrukunawan, *camëllukunawan, mulakunawan y törukunawan. Davidta mandaqnin rey kananpaq churarmi intëru Israel nacioncho runakuna pasaypa kushikärirqan.
Ichic wilacuycuna
^ 12.40 Tsay tantakunaqa manami harinapitatsu karqan, sinöqa hïguspitami.
^ camëllu Camëlluqa jatunkaray uywami kaykan. Camëllukunataqa ashmapäkun maypapis aywar cargakunanpaq y muntakunanpaqmi. Tsaynöpis camëllupa milwanta putskarkurmi awapäkuq. Camëllupa milwanpitami Bautizaq Juanpa röpanpis karqan (Mat. 3.4; Mar. 10.25).
