1 Crónicas 14:1-17
14 Tsaypitami Tiro markapa mandaqnin rey Hiram Davidman runakunata kacharqan imachöpis yanapanakunanpaq. Tsaynölami carpintërukunata y rumi laqlaqkunata kacharqan Davidpa palaciunta sharkatsinanpaq. Tsaynölami cedru qerukunatapis apatsirqan.
2 Tsawraqa David tantiyakurqan TAYTA DIOS Israel runakunata kuyar rey kananpaq churashqanta.
Davidpa tsurinkuna Jerusaléncho yurishqan
2 Samuel 5.13-16; 1 Crónicas 3.5-9
3 Jerusaléncho tarnami mas warmikunata David ashirqan. Tsay warminkunachömi olqupis warmipis tsurinkuna yurirqan.
4 Tsay tsurinkunami karqan Samúa, Sobab, Natán, Salomón,
5 Ibhar, Elisúa, Elpelet,
6 Noga, Nefeg, Jafía,
7 Elisama, Beeliada y Elifelet.
Filisteo runakunata David vincishqan
2 Samuel 5.17-25
8 Israel nacionpa mandaqnin rey David kashqanta mayaykurmi lapan filisteo runakuna wanutsinanpaq ashiq aywapäkurqan. Tsayta mayaykurmi Davidqa aywarqan paykunawan pelyananpaq.
9 Manaraq chayaptinmi filisteo runakuna Refaim pampaman chayaykur tsaycho taqkunata atacayta qalaykurqan.
10 Tsaymi Tayta Diosta manakur David kayno nirqan: “¿Aywämanku filisteo runakunata atacanäpaq? ¿Paykunata vincinäpaq yanapamankimanku?”
Tsayno manakuptin Tayta Dios kayno nirqan: “Aw, yanapashaykimi”.
11 Tsaymi Davidqa soldädunkunawan Baal-perazimman chayaykur filisteo runakunata vincirqan. Vincirkurmi David kayno nirqan: “Juchu shamur imaykatapis apakushqanno conträkunata vincinäpaqmi Tayta Dios yanapamashqa”.
Tsaypitami tsay pampapa jutinta churaparqan Baal-perazim jutin kananpaq.
12 Tsaychömi filisteo runakuna ïdulunkunata kachariykur aywakärirqan. Tsaykunata shuntarkur rupatsinanpaqmi soldädunkunata David nirqan.
13 Tsaypita yapaymi filisteo runakuna Refaim pampaman kutiykur tsaycho taqkunata atacayta qalaykurqan.
14 Tsaychöpis David yapay tapukuptin Tayta Dios kayno nirqan: “Nawpaqpaqa ama yaykapäkuytsu. Tsaypa trukanqa balsamu yörakuna kashqanpa tumashpayki qepanpa aywapäkuy.
15 Tsaycho pakakuykur shuyarpanki. Balsamu yörakuna puntankunapa puriqtano mayar musyanki nawpaykita filisteo runakunata ushakätsinäpaq aywaykashqäta. Tsawraqa jukla yaykapäkunki atacanaykipaq”.
16 Tsaymi Tayta Dios mandashqanno rurashpan filisteo runakunata David vincirqan. Gabaón markapita Gezer markayaqmi qati qatiykur wanutsipäkurqan.
17 Filisteo runakunata David ushakätsishqantami maytsaychöpis runakuna mayapäkurqan. Tsaypita patsami maytsay nacioncho taq runakunapis Davidta mantsakurqan.
