1 Crónicas 15:1-29
15 *Davidpa Markancho palaciunkunata David ruratsirmi toldutapis sharkatsirqan Tayta Diospa babulnin churaränanpaq.
2 Nirkurmi David kayno nirqan: “TAYTA DIOSMI *levitakunata akrarqan babulninta apapäkunanpaq y payta imayyaqpis sirvipäkunanpaq. Tsayno kaptinqa Tayta Diospa babulninta levitakunalami umrumunqa”.*
3 Tsayno nirkurmi ruratsishqan tolduman TAYTA DIOSPA babulninta apapäkunanpaq lapan Israel runakunata Jerusalénman qayatsirqan.
4 Tsaymi Jerusaléncho juntakarqan Aarón aylu cürakuna y wakin aylu levitakuna.
5 Coat aylu runakuna juntakarqan pachak ishkay chunka (120). Paykunapa mandaqninmi karqan Uriel.
6 Merari aylu runakuna juntakarqan ishkay pachak ishkay chunka (220). Paykunapa mandaqninmi karqan Asaías.
7 Gersón aylu runakuna juntakarqan pachak kimsa chunka (130). Paykunapa mandaqninmi karqan Joel.
8 Elizafán aylu runakuna juntakarqan ishkay pachak (200). Paykunapa mandaqninmi karqan Semaías.
9 Hebrón aylu runakunami juntakarqan pusaq chunka (80). Paykunapa mandaqninmi karqan Eliel.
10 Uziel aylu runakunami juntakarqan pachak chunka ishkay (112). Paykunapa mandaqninmi karqan Aminadab.
11 Tsaypitanami David qayatsirqan Sadoc y Abiatar cürakunata. Tsaynöpis qayatsirqan Uriel, Asaías, Joel, Semaías, Eliel y Aminadab levitakunata.
12 Paykunatami David kayno nirqan: “Levitakunapa mandaqnin kar levita mayikikunawan purificakäriy ruratsishqä tolduman TAYTA DIOSPA babulninta apapäkamunaykipaq.
13 Nawpataqa manami TAYTA DIOSNINTSITA tapukushqantsitsu babulninta imano apamunantsipaq kashqantapis. Tsaymi levitakuna mana apamuptin TAYTA DIOS rabyashpan Uzata wanutsishqa”.
14 Tsayno niptinmi cürakuna y levitakuna purificakurqan Israel runakunata kuyaq TAYTA DIOSPA babulninta Jerusalénman apapäkamunanpaq.
15 Aparnami Moisésta TAYTA DIOS nishqannöla ishkay largu qeruwan wintuypa apapäkurqan.*
16 Tsaynöpis levita mayor runakunata David nirqan cantaqkunata levita mayinkunapita akrapäkunanpaq y tsay akrashqan runakuna *salteriukunata, arpakunata y platïllukunata tukaraykar kushishqa alabar aywapäkunanpaq.
17 Tsawraqa levita mayinkunapita akrapäkurqan Joelpa tsurin Hemánta, Berequíaspa tsurin Asafta y Cusaíaspa tsurin Etánta. Etánqa karqan Merari aylu runami.
18 Yanapaqninkuna kananpaq churapäkurqan Zacaríasta, Jaazielta, Semiramotta, Jehielta, Unita, Eliabta, Benaíata, Maasíasta, Matatíasta, Elifelehuta y Micníasta. Tsaynöpis babul churarashqan toldu punkuta täpaqkunapita churapäkurqan Obed-edomta y Jeielta.
19 Broncipita rurashqan platïllukunata tukar cantananpaq churapäkurqan Hemánta, Asafta y Etánta.
20 Salteriuta tukananpaq churapäkurqan Zacaríasta, Azielta, Semiramotta, Jehielta, Unita, Eliabta, Maasíasta y Benaíata.
21 Arpata tukananpaq churapäkurqan Matatíasta, Elifelehuta, Micníasta, Obed-edomta, Jeielta y Azazíasta.
22 Levitakunapa mandaqnin Quenaníastanami cantayta yachaq kaptin churapäkurqan cantaqkunapa directornin kananpaq.
23 Tayta Diospa babulninta umrunanpaq churapäkurqan Berequíasta y Elcanata.
24 Babulpa puntanta *cornëtata tukaraykar aywananpaq churapäkurqan Sebaníasta, Josafatta, Natanaelta, Amasaita, Zacaríasta, Benaíata y Eliezerta. Paykunaqa karqan cürakunami. Tsaynölami Obed-edompis y Jehíaspis babulta umrunanpaq karqan.
25 Tsaypitanami Obed-edompa wayinman aywapäkurqan David, Israel mayor runakuna y waranqa (1,000) soldädukunapa capitanninkuna TAYTA DIOSPA *Pactu Babulninta Jerusalénman kushishqa apapäkunanpaq.
26 Pactu Babulta apananpaq Tayta Dios ali yanapaykashqanta tantiyarmi qanchis turitukunata y qanchis carnikunata pishtarkur *altarcho rupatsipäkurqan.
27 David aywaykarqan fïnu lïnupita rurashqa tünican jatishqami. Tsaynölami jatikärirqan babulta apaq levitakuna, alabaqkuna y cantaqkunapa directornin Quenaníaspis. Jatirashqan jananmanmi David jatikurqan lïnupita rurashqa *efodta.
28 Uyshapa waqranta, cornëtata, platïllukunata, salteriuta y arpakunata tukaraykarmi TAYTA DIOSPA Pactu Babulninta Israel runakuna Jerusalénman kushishqa apapäkurqan.
29 TAYTA DIOSPA Pactu Babulninta Davidpa Markanman* yaykaykätsiptinmi wayi ventänapita watqaykur Saúlpa tsurin Mical rikarqan Davidta qatswaraykar kushishqa aywaykaqta. Rey kaykar saltaypa saltar qatswaykaqta rikarmi shonqulancho jamurparqan.
Ichic wilacuycuna
^ Davidpa Markan Davidpa Markanqa manami David yurishqan Belén markatsu karqan, sinöqa Sión jirkancho kaykaq Jerusalén markami. Tsayno jutin karqan jebuseo runakunata tsaypita David qarqushqa kaptinmi (2Sam. 5.6-7). Tsaychömi reypa palaciunta y templuta sharkatsipäkurqan. Jerusalén marka jatunyaptinpis Sión jirkancho kaykaq partilatami Davidpa Markan kashqanta nipäkun.
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ 15.2 Deut. 10.8.
^ 15.15 Éxo. 25.13-15.
^ salteriu Salteriuqa taksha arpa niraqmi kaykan (1Sam. 10.5; 2Sam. 6.5; 1Rey. 10.12; 1Crón. 13.8; 15.28; 2Crón. 5.12; Sal. 33.2; 57.8; 81.2; Isa. 5.12).
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ efod Efodqa cüra jatikunan mandilmi karqan. Tsaytaqa Israelcho mas mandaq cürami röpan jananman jatikuq (Éxo. 28.6-14). Tsay efodchömi laqararqan chunka ishkay rumikuna. Cada rumichömi kaykarqan Israel trïbupa juk jutin. Wakin runakunapis mas jukniraq efodta jatikuqmi. Tsay runakuna karqan Samuel (1Sam. 2.18), David (2Sam. 6.14), Nobpita kaq cürakuna (1Sam. 22.18) y Micaía (Jue. 17.5).
