1 Crónicas 17:1-27
17 Palaciunchöna rey David taykarmi profëta Natánta qayaykatsir kayno nirqan: “Cedru qerupita kuyaylapaq rurashqa palaciucho taptïpis TAYTA DIOSPA *Pactu Babulninqa toldu rurilanchömi kaykan”.
2 Tsayno niptinmi Natán kayno nirqan: “Tayta Dios yanapaykäshuptikiqa alichari kanman yarpashqaykita ruraptiki”.
3 Tsayno niptinpis tsay tsakaymi Natánta Tayta Dios kayno nirqan:
4 “David kaqman kutiykur kayno ninki: ‘Tayta Diosmi kayno nin: Noqa tänäpaq wayitaqa manami qamtsu sharkatsinki, sinöqa jukmi sharkatsinqapaq.
5 Egiptupita Israel runakunata jorqamushqä junaqpita patsa hasta kananyaq manami wayichötsu tashqä. Tsaypa trukanqa juk läduman juk läduman puritsikuna toldulachömi tashqä.
6 Kaytsika watana kuyashqä Israel runakunawan purirpis churapashqä autoridäninkunata manami imaypis manakushqätsu cedru qerupita wayita rurapämänanpaq’.
7 “Tsaymi sirvimaqnï Davidta kayno ninki: ‘Lapanta mandaq TAYTA DIOSMI nin: Uyshata mitsikur puriykaptiki qamta akrashqä Israel runakunapa mandaqnin rey kanaykipaq.
8 Tsaymi maypa aywaptikipis qamta yanapar contraykikunatapis lapanta ushakätsishqä. Tsaynölami yanapashayki kay patsacho mas munayniyuq runakunano qampis kanaykipaq.
9 “ ‘Kuyashqä Israel runakunatapis yanapashaq nacionnincho pitapis mana mantsakuypa jawka kawapäkunanpaqmi. Tsaycho taptinmi contrankuna unaynöqa mana atacanqanatsu ni qarqunqanatsu.
10 Churashqä juezkuna mandashqan witsanpita patsami kuyashqä Israel runakunata atacarqan. Qamtami yanapashayki lapan chikishuqnikikuna achäquita mana ashipäshunaykipaq.
“ ‘Mastapis TAYTA DIOS kaynömi nin: Kanan qamta promitï qampita miraqkuna imaypis reykuna kananpaq.
11 Tsaymi wanur unay ayluykikunawan tinkuq aywaptikipis juk tsurikita churashaq rey kananpaq.
12 Paymi noqapaq wayita sharkatsinqa. Paypita miraqkunami imaypis reykuna kanqa.
13 Noqami paypa taytan kashaq. Paynami noqapa tsurï kanqa.* Rey Saúlta mana yanapashqa karpis paytaqa imaypis yanapashaqmi.
14 Tsaymi makïcho kaykaq runakunapa mandaqnin rey imayyaqpis kanqa. Pay y paypita miraqkuna imayyaqpis reykuna kanqa’ ”.
Tayta Diosta David manakushqan
2 Samuel 7.17-29
15 Revelacioncho Tayta Dios tsayno nishqanta mayashqannölami Davidman aywaykur lapanta Natán wilarqan.
16 Wilaptinmi TAYTA DIOSPA nawpanman aywaykur David kayno nirqan: “Yusulpäki, TAYTA DIOS. Kananyaqpis yanapamänaykipaq manami noqapis ni aylükunapis merecipäkütsu.
17 Tsaynöpis nimashqanki noqapita miraqkuna imaypis reykuna kananpaq kashqanta. Tsayno promitimarqa ali respitädu runatanömi rikaykämanki.
18 “Qamqa imano kashqätapis musyankimi. ¡Imatanataq masta manaküman!
19 TAYTA DIOS, kuyamashpaykimi musyatsimashqanki lapan tsay promitimashqaykita cumplinaykipaq kashqanta.
20 “Manami pipis kantsu qamno munayniyuqqa, TAYTA DIOS. Tsaynöpis qampita masqa manami ima diospis kantsu. Japalayki Dios kashqaykitami unay aylükunapis wilapäkamarqan.
21 Kuyashqayki Israel runakunatanöqa manami pitapis yanapashqankitsu. Israel runakunata Egiptucho ashmay kaykashqanpita jorqamushqaykinöqa manami mayqan nación runakunatapis sirvishunaykipaq jorqamushqankitsu. Kuyashqayki runakunata jorqamushpaykimi lapanpaq munayniyuq kashqaykita musyatsishqanki. Tsaynöpis munayniyuq karmi contran sharkuq nacionkunata ushakätsishqanki.
22 TAYTA DIOS, Israel runakunatami akrashqanki kuyashqayki runakuna imayyaqpis kananpaq. Tsaynöpis nishqanki paykunapa Diosnin imayyaqpis kanaykipaqmi.
23 “TAYTA DIOS, noqapaq y noqapita miraqkunapaq promitimashqaykikunata imaypis cumpliykulay.
24 Tsayno cumpliptikimi pïmaypis alabashushpayki imayyaqpis kayno nipäkunqa: ‘Lapanta mandaq TAYTA DIOSQA Israel runakunapa Diosninmi kaykan’. Tsaynömi noqapita miraqkuna qampa nawpaykicho imaypis rey kanqa.
25 “Tayta Diosnilä, qammi tantiyatsimashqanki noqapita miraqkuna imaypis reykuna kananpaq kashqanta. Tsayno kaptinmi sirvishuqniki kar tsay promitimashqaykita cumplinaykipaq mana mantsakuypa qamta manakamü.
26 TAYTA DIOS, qampita mas juk Dios manami kantsu. Tsaymi musyä tsay promitimashqaykikunata cumplinaykipaq kashqanta.
27 Kanan nimashqanki noqapita miraqkuna makikicho kananpaq kashqanta y imaypis reykuna kananpaq kashqantami. TAYTA DIOS, musyämi pitapis yanapanaykipaq promitirqa imaypis cumplinaykipaq kashqanta”.
Ichic wilacuycuna
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
^ 17.13 2Cor. 6.18; Heb. 1.5.
