1 Crónicas 18:1-17
18 Tsaypitanami filisteo runakunata vincirkur Gat markata y nawpankunacho kaykaq markakunatapis David qechurqan.
2 Tsaynölami Moab nación runakunatapis soldädunkunawan vincirqan. Mana wanutsishqan moabita runakunami Davidpa munaynincho kashpan impuestuta imaypis pägapäkurqan.
3 Tsaynöpis Soba nacionpa mandaqnin rey Hadad-ezerta soldäduntinta Hamat particho David vincirqan. Tsayno vincirqan Éufrates mayu nawpancho kaykaq markakunata Hadad-ezer shuntaq aywaptinmi.
4 Paykuna kaqpitami David prësu tsaritsimurqan qanchis waranqa (7,000) cawallun muntashqa soldädukunata y ishkay chunka waranqa (20,000) chakilapa puriq soldädukunata. Waranqa (1,000) carrëtakunata y pachak (100) carrëtata tsutananpaq cawallukunatapis shuntarqan. Wakin kaq cawallukunatanami itsanqa ankunkunata kutsur usharqan.
5 Davidwan pelyaptinmi Soba nacionpa mandaqnin rey Hadad-ezerta yanapananpaq Siria nacionpita soldädukuna chayarqan. Jina kaqtami paykunatapis ishkay chunka ishkay waranqa (22,000) soldädukunata wanutsipäkurqan.
6 Nirkurnami Davidqa Siria nación runakunata impuestuta pägatsinanpaq Damascuman soldädunkunata churarqan. Tsaynölami maypa aywaptinpis Davidta TAYTA DIOS yanaparqan contrankunata vincinanpaq.
7 Hadad-ezerta vincirkurmi soldädunkunapa capitanninkuna puritsishqan qori escüdunkunata shuntarkur Jerusalénman David apatsirqan.
8 Tsaynölami Tibhat y Cun markakunapita tsaytsika broncitapis apatsirqan. Tibhat y Cun markakunaqa Hadad-ezerpa munayninchömi karqan. Tsay broncipitami templupaq Salomónqa ruratsirqan lamar nishqan jatun lavatoriuta, columnakunata y manëjukunata.*
9 Tsaypitanami Hamat markapa mandaqnin rey Toi mayarqan Sobapa mandaqnin rey Hadad-ezerpa soldädunkunata David vincishqanta.
10 Toiqa Hadad-ezerwan contra contrami rikanakurqan. Tsaymi kushikushpan tsurin Adoramta kacharqan Davidta felicitananpaq. Qoripita, qellaypita y broncipita rurashqa tukuy niraq qarakuykunata qaraptinmi*
11 TAYTA DIOSPAQ David churarqan. Tsaynöpis churarqan lapan vincishqan nacionkunapita shuntashqan qorita, yoraq qellayta y broncita. Tsay shuntashqankuna karqan edomita runakunapita, moabita runakunapita, amonita runakunapita, filisteo runakunapita y amalecita runakunapitami.
12 Tsaynöpis Kachi Pampa nishqancho pelyarmi Sarviapa wawan Abisai soldädunkunawan wanutsipäkurqan chunka pusaq waranqa (18,000) edomita runakunata.
13 Nirkurnami intëru Edom markakunacho soldädunkunata David churarqan tsaycho taqkuna paypa munaynincho kananpaq. Davidtami TAYTA DIOS yanaparqan maychöpis pelyar vincinanpaq.
Davidpa soldädunkunapa capitanninkuna pï pï kashqanpis
2 Samuel 8.15-18; 20.23-26
14 Israel runakunapa mandaqnin rey kar lapanta David alimi mandarqan y pitapis alimi juzgarqan.
15 Soldädunkunapa capitanninmi karqan Sarviapa wawan Joab. Ahiludpa tsurin Josafatmi karqan Israelcho ima pasashqankunatapis qelqaq.
16 Cürakunami karqan Ahitobpa tsurin Sadoc y Abiatarpa tsurin Ahimelec. Davidpa secretariunmi karqan Seraías.
17 Tsaynöpis Joiadapa tsurin Benaía karqan cereteo soldädukunapa y peleteo soldädukunapa capitanninmi. Davidpa tsurinkunaqa mandäshiqninkunami karqan.
Ichic wilacuycuna
^ 18.8 1Rey. 7.40-47; 2Crón. 4.11-18.
^ 18.10 Wakin runakunaqa regälukunata regalaptinmi nipäkun.
