1 Crónicas 26:1-32
26 Kaychömi qelqaraykan templu punkuta täpaqkuna mayqan aylukuna kashqan.
Corépita miraqkunapitami templu punkuta täpaq karqan Meselemías aylu runakuna. Meselemíasmi karqan Corépa tsurin y Asafpa wilkan.
2 Meselemíaspa qechpa tsurinmi karqan Zacarías. Paypa qepanmanmi yurirqan Jediael, Zebadías, Jatniel,
3 Elam, Johanán y Elioenai.
4 Tsaynölami Corépita miraqkunapita templu punkuta täpaq karqan Obed-edom aylu runakuna. Obed-edompa qechpa tsurinmi karqan Semaías. Semaíaspa shulka wawqinkunami karqan Jozabad, Joa, Sacar, Natanael,
5 Amiel, Isacar y Peultai. Tayta Diospa bendicionninwanmi Obed-edom atska tsuriyuq karqan.*
6 Obed-edompa tsurin Semaíaspa tsurinkunapis templu punkuta täpaqmi karqan. Paykuna ali chölu karmi aylunkunapa mandaqninkuna karqan.
7 Paykunami karqan Otni, Rafael, Obed y Elzabad. Aylun Eliú y Samaquíaspis ali chölumi karqan.
8 Obed-edompa tsurinkunata y wilkankunata yupaptin karqan soqta chunka ishkaymi (62). Paykunaqa lapan karqan ali chölu y valienti runakunami.
9 Meselemíaspa tsurinkuna y wawqinkuna karqan chunka pusaqmi. Paykunapis ali chölu runakunami karqan.
10 Meraripita miraqkunapitanami templu punkuta täpaq karqan Hosa y tsurinkuna. Hosapa tsurin Simritami qechpa mana kaykaptinpis mandaq kananpaq papänin churarqan.
11 Simripa qepanmanmi yurirqan Hilcías, Tebalías y Zacarías. Hosaqa karqan wawqinkunawan tsurinkunawan chunka kimsami.
12 Meselemías aylu runakuna, Obed-edom aylu runakuna y Hosa aylu runakuna mandaq karpis mana mandaq karpis lapanmi templu punkuta täpapäkurqan.
13 Cada punkuta juk aylu runakunami täpaq. Täpananpaqmi suertita jitapäkuq. Suerti mayqanpaqpis yarqamuptinmi mayor karpis shulka karpis punkuta täpaq.
14 Meselemías aylu runakunata töcarqan inti jeqamunan kaq lädu punkuta täpananpaq. Tsurin Zacaríastanami töcarqan norti kaq punkuta täpananpaq. Zacarías karqan shumaq yätsikuq runami.
15 Obed-edom aylu runakunata töcarqan sur kaq punkuta täpananpaq. Tsurinkunatana töcarqan templucho kaykaq churakuna cuartukunata täpananpaq.
16 Supimta y Hosatanami töcarqan inti jeqanan kaq Salequet jutiyuq punkuta täpananpaq. Tsay punkuqa karqan witsaypa aywaq cällichömi.
Cada punkuta ayka *levitakuna täpashqanpis kaynömi karqan:
17 Inti jeqamunan kaq lädu punkutami cada junaq soqta runakuna täparqan.Norti kaq lädu punkutami cada junaq chusku runakuna täparqan.Sur kaq lädu punkutami cada junaq chusku runakuna täparqan.Churakuna wayikunatanami ishkay ishkay runakuna täparqan.
18 Inti jeqanan kaq lädu punkutami chusku runakuna täparqan (tsay punkuqa karqan witsaypa aywaq cällichömi).Templu patiutanami ishkay runakuna täparqan.
19 Coré aylu y Merari aylumi templu punkukunata täparqan.
Templucho cuartukunata täpaqkuna pï pï kashqanpis
20 Wakin *levitakunanami karqan templucho tesörukuna churaraykashqan cuartukunata täpaq y Tayta Diospaq ofrendata churashqan cuartukunata täpaq.
21 Paykunami karqan Gersónpa tsurin Laadán aylu runakuna. Cada ünunmi karqan aylunkunapa mandaqnin. Tsaynöpis karqan Jehielpita miraqkuna,
22 Jehielpa tsurin Zetampita miraqkuna y Zetampa wawqin Joelpita miraqkuna. Paykunami templucho kaykaq tesörukunata täpaq.
Levita runakunapa wakin mandaqninkuna
23 Kaychömi qelqaraykan wakin mandaqkunapa jutinkuna. Tsay mandaqkuna karqan Amram aylupita, Izhar aylupita, Hebrón aylupita y Uziel aylupitami.
Amram aylupita mandaqkuna
24 Amram aylupitami mandaq karqan Sebuel. Sebuelqa Moiséspa tsurin Gersónpita miraqmi karqan. Paymi encargädu karqan tesöru churaraykashqan cuartukunaman täpaqkunata churananpaq.
25 Moiséspa jukaq tsurin Eliezerpa tsurinmi karqan Rehabías, Rehabíaspa tsurinmi karqan Jesaías, Jesaíaspa tsurinmi karqan Joram, Jorampa tsurinmi karqan Zicri y Zicripa tsurinnami karqan Selomit.
26 Selomit aylu runakunami täparqan Tayta Diospaq churashqan tesörukunata. Tsay tesörukunata ofrendarqan rey David, Israel runakunapa aylunkunapa mandaqninkuna, waranqa (1,000) soldädukunapa capitanninkuna, pachak (100) soldädukunapa capitanninkuna y soldädukunapa mas mandaqnin capitankuna.
27 Tsay tesörukuna karqan contrankunata guërracho vincirkur apamushqanmi. Tsaytami churapäkurqan TAYTA DIOSPA wayinta shumaq altsatsinanpaq.
28 Tsay cuartukunamanmi churapäkurqan TAYTA DIOSPAQ wakin ofrendakunatapis. Tsay ofrendakunata churapäkurqan profëta Samuel, Cispa tsurin Saúl, Nerpa tsurin Abner, Sarviapa wawan Joab y wakin runakunapis. Selomit aylu runakunami TAYTA DIOSPAQ lapan churashqan ofrendakunata täparqan.
Izhar aylupita mandaqkuna
29 Izhar aylupitami mandaq karqan Quenanías y tsurinkuna. Paykunami juk lädu nacioncho taq Israel runakunapa gobernadorninkuna y juezninkuna karqan.
Hebrón aylupita mandaqkuna
30 Hebrón aylupitami mandaq karqan Hasabías y paypita miraqkuna. Paykunami Jordán mayu inti jeqanan kaq lädupa taq Israel runakunapa mandaqninkuna karqan. Paykunami encargädu karqan TAYTA DIOS nishqanta y rey nishqanta cumplitsinanpaq. Hasabíaspita miraq runakuna karqan juk waranqa qanchis pachak (1,700) ali chölu runakunami.
31 Tsaynöpis Hebrón aylupitami mandaq karqan Jerías. Chusku chunka (40) wata rey kaykarmi David musyayta munarqan Hebrón aylu runakuna mayqan markakunacho tashqantapis. Tsaymi mandarqan unay qelqaraykashqan librukunata liyir Hebrón aylu runakuna tashqan markakuna mayqan kashqantapis musyapäkunanpaq. Tsaynöpami musyapäkurqan Hebrón aylu ali chölu runakuna Galaad particho kaykaq Jezercho kashqanta. Tsaynöpis musyapäkurqan Jezercho taq Hebrón aylu runakunapa mandaqnin Jerías unay kashqanta.
32 Hebrón aylu Jeríaspita miraq runakunaqa karqan ishkay waranqa qanchis pachak (2,700) runakunami. Paykunatami David churarqan Jordán mayu inti jeqamunan kaq lädupa taq Israel runakunapa mandaqninkuna kananpaq. Paykunami encargädu karqan TAYTA DIOS nishqanta y rey nishqanta cumplitsinanpaq. Tsaymi encargädu karqan Rubén trïbu runakunapaq, Gad trïbu runakunapaq y pulan kaq Manasés trïbu runakunapaqpis.
Ichic wilacuycuna
^ 26.4-5 2Sam. 6.11; 1Crón. 13.14.
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
