1 Crónicas 27:1-34
27 Israel soldädukunapa tröpankunaqa karqan chunka ishkaymi. Cada tröpachömi karqan ishkay chunka chusku waranqa (24,000) soldädukuna. Paykunami watacho cada killa trukanakuypa reyta sirvipäkuq. Tsay tröpakunachömi wakin capitankuna karqan waranqa (1,000) soldädukunapa mandaqninkuna y wakinnami karqan pachak (100) soldädukunapa mandaqninkuna. Kaychömi qelqaraykan soldädukunapa capitanninkunapa y yanapaqninkunapa jutinkuna.
2 Punta kaq killacho turnu töcarqan Zabdielpa tsurin Jasobeamta. Payqa karqan ishkay chunka chusku waranqa (24,000) soldädukunapa capitanninmi.
3 Jasobeam karqan Farespita miraq runami. Pay karqan punta kaq killacho turnu töcaq capitankunapa mandaqninmi.
4 Ishkay kaq killacho turnu töcarqan Dodaita. Pay karqan Ahoapita miraq runami. Paypis karqan ishkay chunka chusku waranqa (24,000) soldädukunapa capitanninmi. Dodaipa yanapaqninmi karqan Miclot.
5 Kimsa kaq killacho turnu töcarqan mandaq cüra Joiadapa tsurin Benaíata. Paypis karqan ishkay chunka chusku waranqa (24,000) soldädukunapa capitanninmi.
6 Benaíaqa karqan Kimsa Chunka nishqan alinnin kaq soldäducho mandaqmi. Benaíapa yanapaqninmi karqan tsurin Amisabad.
7 Chusku kaq killacho turnu töcarqan Joabpa wawqin Asaelta. Paypa trukannami mandaq karqan tsurin Zebadías. Paypis karqan ishkay chunka chusku waranqa (24,000) soldädukunapa capitanninmi.
8 Pitsqa kaq killacho turnu töcarqan Samhutta. Payqa karqan Izrapita miraq runami. Paypis karqan ishkay chunka chusku waranqa (24,000) soldädukunapa capitanninmi.
9 Soqta kaq killacho turnu töcarqan Irata. Payqa karqan Tecoa markapita Iquespa tsurinmi. Paypis karqan ishkay chunka chusku waranqa (24,000) soldädukunapa capitanninmi.
10 Qanchis kaq killacho turnu töcarqan Pelón markapita kaq Helesta. Payqa karqan Efraín trïbupitami. Paypis karqan ishkay chunka chusku waranqa (24,000) soldädukunapa capitanninmi.
11 Pusaq kaq killacho turnu töcarqan Sibecaita. Payqa karqan Husa markapita Zera aylumi. Paypis karqan ishkay chunka chusku waranqa (24,000) soldädukunapa capitanninmi.
12 Isqun kaq killacho turnu töcarqan Abiezerta. Payqa karqan Anatot markapita Benjamín trïbu runami. Paypis karqan ishkay chunka chusku waranqa (24,000) soldädukunapa capitanninmi.
13 Chunka kaq killacho turnu töcarqan Maharaita. Payqa karqan Netofa markapita Zera aylumi. Paypis karqan ishkay chunka chusku waranqa (24,000) soldädukunapa capitanninmi.
14 Chunka juk kaq killacho turnu töcarqan Benaíata. Payqa karqan Piratón markapita Efraín trïbu runami. Paypis karqan ishkay chunka chusku waranqa (24,000) soldädukunapa capitanninmi.
15 Chunka ishkay kaq killacho turnu töcarqan Heldaita. Payqa karqan Netofa markapita Otoniel aylumi. Paypis karqan ishkay chunka chusku waranqa (24,000) soldädukunapa capitanninmi.
Israel trïbukunapa mandaqninkuna pï pï kashqanpis
16 Israel trïbukunapa mandaqninkuna pï kashqanpis kaychömi qelqaraykan:Rubén trïbupa mandaqninmi karqan Zicripa tsurin Eliezer.Simeón trïbupa mandaqninmi karqan Maacapa tsurin Sefatías.
17 Leví trïbupa mandaqninmi karqan Kemuelpa tsurin Hasabías.Aarónpita miraq aylukunapa mandaqninmi karqan Sadoc.
18 Judá trïbupa mandaqninmi karqan Davidpa wawqin Eliú.Isacar trïbupa mandaqninmi karqan Micaelpa tsurin Omri.
19 Zabulón trïbupa mandaqninmi karqan Abdíaspa tsurin Ismaías.Neftalí trïbupa mandaqninmi karqan Azrielpa tsurin Jerimot.
20 Efraín trïbupa mandaqninmi karqan Azazíaspa tsurin Oseas.Pulan Manasés trïbupa mandaqninmi karqan Pedaíaspa tsurin Joel.
21 Galaadcho kaykaq pulan Manasés trïbupana mandaqninmi karqan Zacaríaspa tsurin Iddo.Benjamín trïbupa mandaqninmi karqan Abnerpa tsurin Jaasiel.
22 Dan trïbupa mandaqninmi karqan Jerohampa tsurin Azareel.
Tsaynömi karqan cada trïbu Israel runakunapa mandaqninkuna.
23 Juk kutimi Israel runakunata rey David censatsirqan. Itsanqa Israel runakuna qoylarkunano atska kananpaq TAYTA DIOS nishqanno atska kaptinmi ishkay chunka (20) watayuqpita uraman kaqkunata mana censatsirqantsu.*
24 Censu kanantaqa Tayta Dios manami munarqantsu. Tsaymi Sarviapa wawan Joab censaykaptin Tayta Dios rabyakur Israel runakunata castigarqan.* Tsayno castigaptinmi censayta Joab mana usharqannatsu. Tsaynöpami Israel runakuna ayka kashqantapis rey Davidpa acta librunman mana apuntarqantsu.
Rey Davidpa yanapaqninkuna pï pï kashqanpis
25 Adielpa tsurin Azmavetmi encargädu karqan rey Davidpa palaciuncho lapan tesörukuna kaykashqanman täpaqkunata churananpaq.
Uzíaspa tsurin Jonatánmi encargädu karqan tesörukuna churaraykashqan wayikunaman täpaqkunata churananpaq. Tsay wayikuna karqan chakrakunacho, markakunacho, caseriukunacho y murallashqa markakunachömi.
26 Quelubpa tsurin Ezrimi encargädu karqan rey Davidpa chakrankunata arutsinanpaq.
27 Ramat markapita Simeimi encargädu karqan rey Davidpa üva chakrankunata arutsinanpaq.
Sifma markapita Zabdimi encargädu karqan rey Davidpa vïnu churakuna wayinkunaman täpaqkunata churananpaq.
28 Geder markapita Baal-hanánmi encargädu karqan rey Davidpa olïvu chakrankunaman y hïgus chakrankunaman täpaqkunata churananpaq. Tsay chakrakunaqa karqan *Sefelachömi.
Joásmi encargädu karqan rey Davidpa aceiti churakuna wayinkunaman täpaqkunata churananpaq.
29 Sarónpita Sitraimi encargädu karqan Sarón pampacho rey Davidpa wäkankunata mitsiqta churananpaq.
Adlaipa tsurin Safatmi encargädu karqan Jezreel pampacho rey Davidpa wäkankunata mitsiqta churananpaq.
30 Ismael runa Obilmi encargädu karqan rey Davidpa *camëllunkunata mitsiqta churananpaq.
Meronotpita Jehedíasmi encargädu karqan rey Davidpa bürrunkunata mitsiqta churananpaq.
31 Agarpita Jazizmi encargädu karqan rey Davidpa uyshankuna y cabrankuna mitsiqta churananpaq.
Lapan tsay runakunami rey Davidpa capatazninkuna karqan.
32 Davidpa tiyun Jonatánmi ali tantiyaq y yachaq runa kar Davidpa yätsiqnin y secretariun karqan.
Hacmonipa tsurin Jehielmi karqan rey Davidpa tsurinkunata ashmaq.
33 Ahitofelpis rey Davidpa yätsiqninmi karqan.
Arac markapita Husaimi rey Davidpa amïgun karqan.
34 Ahitofelpa trukanmi karqan Benaíapa tsurin Joiada y Abiatar.
Joabnami karqan rey Davidpa soldädunkunapa capitannin.
Ichic wilacuycuna
^ 27.23 Gén. 15.5; 22.17; 26.4.
^ 27.24 2Sam. 24.1-15; 1Crón. 21.1-14.
^ Sefela Sefelaqa Israel nacioncho jirkan jirkan partimi kaykan. Sefelapita inti jeqanan lädupami Mediterraneo lamar kaykan. Sefelapita inti jeqamunan lädupanami jirkakuna kaykan. Norti lädupita sur kaq läduyaqmi Sefela kaykan chusku chunka pitsqa kilömetruno. Inti jeqamunan lädupita inti jeqanan läduyaqmi chunka soqta kilömetruno kaykan. Sefelacho chakrakuna ali kaptinmi mikuykuna ali wayun. Filisteo runakunawan pelyarmi Israel runakuna Sefelacho kaykaq markakunata y chakrakunata qechunakärirqan (Jos. 10.40; 12.8; 1Rey. 10.27; 2Crón. 28.18).
^ camëllu Camëlluqa jatunkaray uywami kaykan. Camëllukunataqa ashmapäkun maypapis aywar cargakunanpaq y muntakunanpaqmi. Tsaynöpis camëllupa milwanta putskarkurmi awapäkuq. Camëllupa milwanpitami Bautizaq Juanpa röpanpis karqan (Mat. 3.4; Mar. 10.25).
