1 Crónicas 5:1-26
5 Israelpa qechpa tsurinmi karqan Rubén. Qechpa karpis mädistanwan punushqanpitami qechpa kay derëchunta papäninpita mana chaskirqantsu.* Tsaymi qechpa kay derëchunta qonanpa trukanqa Josépa tsurinkunatana papänin Israel qoykurqan.
2 Tsay derëchuta chaskirpis manami Josépa tsurinkunatsu wakin Israel trïbukunapita mas munayniyuq karqan, sinöqa Judá trïbu runakunami mas munayniyuq rikakurqan. Tsaymi Israel nacionpa mandaqnin reypis Judá trïbupita karqan.*
3 Israelpa qechpa tsurinmi karqan Rubén. Rubénpa tsurinkunami karqan Hanoc, Falú, Hezrón y Carmi.
4 Joelpa tsurinmi karqan Semaías. Semaíaspa tsurinmi karqan Gog. Qoqpa tsurinmi karqan Simei.
5 Simeipa tsurinmi karqan Micaía. Micaíapa tsurinmi karqan Reaía. Reaíapa tsurinmi karqan Baal.
6 Baalpa tsurinmi karqan Beera. Beerami karqan Rubén trïbu runakunapa mandaqnin. Tsay witsanmi Asiria nacionpa mandaqnin Tiglat-pileser paykunata prësu apakurqan.*
7 Beerapita miraqkunapa jutinkunami aylunpa aylunpa kayno qelqaraykan: Jeiel (Jeielqa mas mandaqmi karqan), Zacarías
8 y Bela. Bela karqan Azazpa tsurin. Azaz karqan Semapa tsurin. Semanami karqan Joelpa tsurin. Rubén trïbu runakunami tarqan Aroer partipita hasta Nebo markayaq y tsaypita hasta Baal-meónpa lindërunyaq.
9 Galaad particho uywankuna miraptinmi inti jeqamunan kaq lädupapis Rubén trïbu runakuna aywarqan tänanpaq. Tsaymi tsaychöpis tarqan hasta chunyaq tsaki jirka qalaykunanyaq. Tsay chunyaq tsaki jirkaqa hasta Éufrates mayuyaqmi kaykan.
10 Saúl rey kashqan witsanmi Rubén trïbu runakunaqa agareno runakunata atacarqan. Agareno runakunaqa Galaad parti inti jeqamunan kaq läduchömi tarqan. Paykunata vincirkurmi agareno runakunapa markankunacho Rubén trïbu runakuna tarqan.
Gad trïbu runakuna
11 Rubén trïbu runakuna tashqan lädunchömi Gad trïbu runakuna tarqan. Paykunami Basán particho tarqan hasta Salca partiyaq.
12 Basánchöqa Joelmi mandaq karqan. Joelpa mandäshiqninmi karqan Safán. Safánpa mandäshiqninmi karqan Jaanai. Jaanaipa yanapaqninmi karqan Safat.
13 Paykunapa wakin trïbu mayinkunami mandarqan Gad trïbucho kaykaq qanchis aylukunata. Tsay mandaqkuna karqan Micael, Mesulam, Seba, Jorai, Jacán, Zía y Heber.
14 Tsay qanchis mandaqkunaqa karqan Abihailpita miraqkunami. Abihail karqan Huripa tsurin. Huri karqan Jaroapa tsurin. Jaroa karqan Galaadpa tsurin. Galaad karqan Micaelpa tsurin. Micael karqan Jesisaipa tsurin. Jesisai karqan Jahdupa tsurin. Jahdo karqan Buzpa tsurin.
15 Ahí karqan Abdielpa tsurin y Gunipa wilkanmi. Paymi karqan lapan Gad aylukunapa mandaqnin.
16 Gad trïbu runakuna tarqan Galaad particho, Basán particho kaykaq markakunacho y uywankunata mitsikunan Sarón partichömi.
17 Lapan tsay jutikunata acta librumanmi qelqarqan Judá nacionpa mandaqnin rey Jotam kaykaptin. Tsay witsan Israel nacionpa mandaqnin rey kaykarqan Jeroboammi.
Agareno runakunawan pelyapäkushqan
18 Rubén trïbu, Gad trïbu y pulan Manasés trïbu pelyayta yachaq karqan chusku chunka chusku waranqa qanchis pachak soqta chunka (44,760) runakunami. Paykunami espädatapis escüdutapis flëchatapis guërracho shumaq manijayta yachapäkuq.
19 Tsaymi guërrata rurapäkurqan agareno runakunawan. Agareno runakunatami yanaparqan Jetur runakuna, Nafis runakuna y Nodab runakuna.
20 Pulan guërracho kaykarmi Rubén trïbu, Gad trïbu y pulan Manasés trïbu runakunaqa Tayta Diosta manakurqan yanapananpaq. Tsayno yärakur manakuptinmi paykunata Tayta Dios yanaparqan. Tsaymi agareno runakunata y yanapaqninkunatapis lapanta vincipäkurqan.
21 Tsayno vincirkurmi uywankunata apakärirqan pitsqa chunka waranqa (50,000) *camëllukunata, ishkay pachak pitsqa chunka waranqa (250,000) uyshakunata y ishkay waranqa (2,000) bürrukunata. Tsaynölami prësu apakärirqan pachak waranqa (100,000) runakunatapis.
22 Tayta Dios yanapaptinmi tsay guërracho tsaytsika contran runakunata wanutsipäkurqan. Nirkurmi Rubén trïbu runakuna, Gad trïbu runakuna y pulan Manasés trïbu runakunaqa agareno runakuna tashqancho tarqan Babiloniaman prësu apakushqanyaq.
Pulan Manasés trïbu runakuna
23 Pulan Manasés trïbu runakuna aläpa mirarmi tarqan Basánpita hasta Baal-hermónyaq y Senirpita hasta Hermón jirkayaq.
24 Tsay pulan Manasés trïbu aylukunapa mandaqninkuna karqan Efer, Isi, Eliel, Azriel, Jeremías, Hodavías y Jahdiel. Paykuna lapanpis ali chölulantaq y maytsaychöpis reqishqami karqan.
Rubén trïbu, Gad trïbu y pulan Manasés trïbu runakunata prësu apakushqan
25 Rubén trïbu, Gad trïbu y pulan Manasés trïbu runakunaqa unay aylunkuna adorashqan Tayta Diosta cäsukunanpa trukan juk dioskunatami adorapäkurqan. Tsay dioskunami karqan Tayta Dios ushakätsishqan jäpa runakuna adorashqan dioskuna.
26 Tsay dioskunata adoraptinmi Israel runakunata kuyaq Tayta Dios pasaypa rabyakur Asiria nacionpa mandaqnin Pul jutiyuq Tiglat-pileserta* valuratsirqan paykunata atacar prësu apakärinanpaq. Tsaymi wakinta apakärirqan Halahman, wakinta apakärirqan Haborman, wakinta apakärirqan Haraman y wakintana apakärirqan Gozán mayu nawpanman.* Tsaychömi paykunaqa hasta kananyaq tarkaykan.
Ichic wilacuycuna
^ 5.1 Gén. 35.22; 49.3-4.
^ 5.2 Gén. 49.8-10.
^ 5.4-6 2Rey. 15.29.
^ camëllu Camëlluqa jatunkaray uywami kaykan. Camëllukunataqa ashmapäkun maypapis aywar cargakunanpaq y muntakunanpaqmi. Tsaynöpis camëllupa milwanta putskarkurmi awapäkuq. Camëllupa milwanpitami Bautizaq Juanpa röpanpis karqan (Mat. 3.4; Mar. 10.25).
^ 5.26a 2Rey. 15.19, 29.
^ 5.26b 2Rey. 17.6.
