1 Crónicas 6:1-81
6 (5.27) Levípa tsurinkunami karqan Gersón, Coat y Merari.
2 (5.28) Coatpa tsurinkunami karqan Amram, Izhar, Hebrón y Uziel.
3 (5.29) Amrampa tsurinkunami karqan Aarón, Moisés y María.Aarónpa tsurinkunami karqan Nadab, Abiú, Eleazar y Itamar.
4 (5.30a) Eleazarpa tsurinmi karqan Finees.Fineespa tsurinmi karqan Abisúa.
5 (5.30b) Abisúapa tsurinmi karqan Buqui.Buquipa tsurinmi karqan Uzi.
6 (5.31) Uzipa tsurinmi karqan Zeraías.Zeraíaspa tsurinmi karqan Meraiot.
7 (5.32) Meraiotpa tsurinmi karqan Amarías.Amaríaspa tsurinmi karqan Ahitob.
8 (5.33) Ahitobpa tsurinmi karqan Sadoc.Sadocpa tsurinmi karqan Ahimaas.
9 (5.34) Ahimaaspa tsurinmi karqan Azarías.Azaríaspa tsurinmi karqan Johanán.
10 (5.35) Johanánpa tsurinmi karqan Azarías. Azaríasmi mandaq cüra Jerusaléncho karqan rey Salomón sharkatsishqan templucho.
11 (5.36) Azaríaspa tsurinmi karqan Amarías.Amaríaspa tsurinmi karqan Ahitob.
12 (5.37) Ahitobpa tsurinmi karqan Sadoc.Sadocpa tsurinmi karqan Salum.
13 (5.38) Salumpa tsurinmi karqan Hilcías.Hilcíaspa tsurinmi karqan Azarías.
14 (5.39) Azaríaspa tsurinmi karqan Seraías.Seraíaspa tsurinmi karqan Josadac.
15 (5.40) Josadactami Nabucodonosor prësu apakurqan Judá nación runakunata y Jerusaléncho taq runakunata munayninman TAYTA DIOS entregaptin.
Levípita miraqkuna
16 (1) Levípa tsurinkunami karqan Gersón, Coat y Merari.
17 (2) Gersónpa tsurinkunami karqan Libni y Simei.
18 (3) Coatpa tsurinkunami karqan Amram, Izhar, Hebrón y Uziel.
19 (4) Meraripa tsurinkunami karqan Mahli y Musi.
Paykunami Levípita miraqkuna karqan.*
20 (5) Gersónpa tsurinmi karqan Libni, Libnipa tsurinmi karqan Jahat, Jahatpa tsurinmi karqan Zima,
21 (6) Zimapa tsurinmi karqan Joa, Joapa tsurinmi karqan Iddo, Iddupa tsurinmi karqan Zera y Zerapa tsurinmi karqan Jeatrai.
22 (7) Coatpa tsurinmi karqan Aminadab, Aminadabpa tsurinmi karqan Coré, Corépa tsurinmi karqan Asir,
23 (8) Asirpa tsurinmi karqan Elcana, Elcanapa tsurinmi karqan Ebiasaf, Ebiasafpa tsurinmi karqan Asir,
24 (9) Asirpa tsurinmi karqan Tahat, Tahatpa tsurinmi karqan Uriel, Urielpa tsurinmi karqan Uzías y Uzíaspa tsurinmi karqan Saúl.
25 (10) Elcanapa tsurinmi karqan Amasai y Amasaipa tsurinmi karqan Ahimot.
26 (11) Ahimotpa tsurinmi karqan Elcana, Elcanapa tsurinmi karqan Zofai, Zofaipa tsurinmi karqan Nahat,
27 (12) Nahatpa tsurinmi karqan Eliab, Eliabpa tsurinmi karqan Jeroham y Jerohampa tsurinmi karqan Elcana.
28 (13) Samuelpa tsurinkunami karqan Vasni y Abías. Vasni karqan qechpa tsurin.
29 (14) Meraripa tsurinmi karqan Mahli, Mahlipa tsurinmi karqan Libni, Libnipa tsurinmi karqan Simei, Simeipa tsurinmi karqan Uza,
30 (15) Uzapa tsurinmi karqan Simea, Simeapa tsurinmi karqan Haguía y Haguíapa tsurinmi karqan Asaías.
Cantaqkunata rey churashqan
31 (16) Babulta TAYTA DIOSPA wayinman churaykurmi cantaqkunatapis tsayman rey David churarqan cantatsinanpaq.
32 (17) Paykunami Tinkuna Tolducho imaypis cantatsipäkurqan Jerusaléncho templuta Salomón sharkatsinanyaq. Templuchöpis paykunalami cantatsirqan.
33 (18) Tsay cantaqkuna karqan Hemán, Asaf y Etán. Paykunapa tsurinkunapis cantaqlami karqa.
Hemán karqan Coat aylu runami. Taytan karqan Joel. Joelpa taytanmi karqan Samuel.
34 (19) Samuelpa taytanmi karqan Elcana. Elcanapa taytanmi karqan Jeroham. Jerohampa taytanmi karqan Eliel. Elielpa taytanmi karqan Toa.
35 (20) Toapa taytanmi karqan Zuf. Zufpa taytanmi karqan Elcana. Elcanapa taytanmi karqan Mahat. Mahatpa taytanmi karqan Amasai.
36 (21) Amasaipa taytanmi karqan Elcana. Elcanapa taytanmi karqan Joel. Joelpa taytanmi karqan Azarías. Azaríaspa taytanmi karqan Sofonías.
37 (22) Sofoníaspa taytanmi karqan Tahat. Tahatpa taytanmi karqan Asir. Asirpa taytanmi karqan Ebiasaf. Ebiasafpa taytanmi karqan Coré.
38 (23) Corépa taytanmi karqan Izhar. Izharpa taytanmi karqan Coat. Coatpa taytanmi karqan Leví. Levípa taytanmi karqan Israel.
39 (24) Hemánpa alawqa kaq nawpanchömi Asaf cantayta yanaparqan. Asafpa taytanmi karqan Berequías. Berequíaspa taytanmi karqan Simea.
40 (25) Simeapa taytanmi karqan Micael. Micaelpa taytanmi karqan Baasías. Baasíaspa taytanmi karqan Malquías.
41 (26) Malquíaspa taytanmi karqan Etni. Etnipa taytanmi karqan Zera. Zerapa taytanmi karqan Adaía.
42 (27) Adaíapa taytanmi karqan Etán. Etánpa taytanmi karqan Zima. Zimapa taytanmi karqan Simei.
43 (28) Simeipa taytanmi karqan Jahat. Jahatpa taytanmi karqan Gersón. Gersónpa taytanmi karqan Leví.
44 (29) Hemánpa itsuq kaq nawpanchönami Merari aylu Etán cantayta yanaparqan. Etampa taytanmi karqan Quisi. Quisipa taytanmi karqan Abdi. Abdipa taytanmi karqan Maluc.
45 (30) Malucpa taytanmi karqan Hasabías. Hasabíaspa taytanmi karqan Amasías. Amasíaspa taytanmi karqan Hilcías.
46 (31) Hilcíaspa taytanmi karqan Amsi. Amsipa taytanmi karqan Bani. Banipa taytanmi karqan Semer.
47 (32) Semerpa taytanmi karqan Mahli. Mahlipa taytanmi karqan Musi. Musipa taytanmi karqan Merari. Meraripa taytanmi karqan Leví.
48 (33) Hemánpa, Asafpa y Etánpa trïbu mayinkunami wakin ruraykunata Tayta Diospa wayincho rurapäkurqan.
49 (34) Aarón y paypita miraqkunalami sacrificiuta rupatsina *altarcho sacrificiukunata rupatsipäkuq. Tsaynölami inciensuwan qoshtatsikuna altarchöpis inciensuwan qoshtatsipäkuq. Lugar Santïsimucho lapan rurananpaq kaqkunatami paykuna rurapäkuq. Tsaynöpami Diospa sirviqnin Moisés mandashqankunata cumplipäkurqan. Tsayno cumpliptinmi Israel runakunapa jutsankunata Tayta Dios perdonarqan.
Aarónpita miraqkuna
50 (35) Aarónpa tsurinmi karqan Eleazar, Eleazarpa tsurinmi karqan Finees, Fineespa tsurinmi karqan Abisúa,
51 (36) Abisúapa tsurinmi karqan Buqui, Buquipa tsurinmi karqan Uzi, Uzipa tsurinmi karqan Zeraías,
52 (37) Zeraíaspa tsurinmi karqan Meraiot, Meraiotpa tsurinmi karqan Amarías, Amaríaspa tsurinmi karqan Ahitob,
53 (38) Ahitobpa tsurinmi karqan Sadoc y Sadocpa tsurinmi karqan Ahimaas.
Levitakuna tänanpaq rikatsishqan markakuna
Josué 21.1-42
54 (39) Coat aylu Aarónpita miraqkunami tashqan markakunata chaskipäkurqan suertita jitaypa.
55 (40) Tsaynöpami Hebrón markata y cercancho kaykaq chakrakunatapis uywankunata mitsikunanpaq chaskipäkurqan. Hebrónqa karqan Judá trïbu runakuna chaskishqan posisionchömi.
56 (41) Jefonipa tsurin Calebtami itsanqa töcarqan Hebrónpa caseriunkuna y tsay caseriukuna nawpancho kaykaq chakrakuna.
57 (42) Tsaymi Coat aylu Aarónpita miraq runakuna chaskishqan markakuna karqan Hebrón (Hebrónqa amparakuna markami karqan), Libna, Jatir, Estemoa,
58 (43) Hilén, Debir,
59 (44) Asán y Bet-semes. Tsaynölami cada markapa cercancho kaykaq jalqakunatapis uywankunata mitsikunanpaq chaskipäkurqan.
60 (45) Benjamín trïbu runakunapita chaskishqan markakunami karqan Geba, Alemet y Anatot. Tsaynölami cada markapa cercancho kaykaq jalqakunatapis uywankunata mitsikunanpaq chaskipäkurqan. Tsaymi Judá trïbupita y Benjamín trïbupita chaskishqan markakuna karqan chunka kimsa. Tsay markakunatami Coat aylu Aarónpita miraq runakuna aylunpa aylunpa rakipänakurqan.
61 (46) Aarónpita miraq runakuna chaskishqannölami Coat aylu wakin runakunapis aylunpa aylunpa suertita jitaypa markakunata chaskipäkurqan. Pulan Manasés trïbu runakunapita chaskishqan markakunami karqan juk chunka.
62 (47) Gersón aylu runakunami chunka kimsa markakunata aylunpa aylunpa chaskipäkurqan. Tsay markakunatami chaskipäkurqan Isacar trïbupita, Aser trïbupita, Neftalí trïbupita y Basáncho kaykaq pulan Manasés trïbupita.
63 (48) Merari aylu runakunanami suertita jitaypa chunka ishkay markakunata aylunpa aylunpa chaskipäkurqan. Tsay markakunata chaskipäkurqan Rubén trïbupita, Gad trïbupita y Zabulón trïbupita.
64 (49) Tsaynölami *levitakuna tänanpaq markakunata Israel mayinkuna rikatsirqan. Cada markapa cercancho kaykaq jalqakunatapis rikatsirqan uywankunata mitsikunanpaq.
65 (50) Judá trïbupita, Simeón trïbupita y Benjamín trïbupita rikatsishqan markakunataqa suertita jitaypami rikatsipäkurqan. Tsay markakuna mayqan mayqan kashqanpis jana läduchömi qelqaraykan.*
66 (51) Tsaynölami Efraín trïbu runakunapita Coat aylu runakuna chaskipäkurqan markakunata y jalqakunata.
67 (52) Tsaymi Efraín jalqakunacho chaskipäkurqan Siquemta (Siquemqa amparakuna markami karqan), Gezerta,
68 (53) Jocmeamta, Bet-horónta,
69 (54) Ajalónta y Gat-rimónta. Tsaynölami cada markapa cercancho kaykaq jalqakunatapis chaskipäkurqan uywankunata mitsikunanpaq.
70 (55) Coat aylu wakin kaq runakunami pulan Manasés trïbu runakunapita chaskipäkurqan Aner y Bileam markakunata. Tsaynölami cada markapa cercancho kaykaq jalqakunatapis chaskipäkurqan uywankunata mitsikunanpaq.
71 (56) Gersón aylu runakunami chaskipäkurqan pulan Manasés trïbu runakunapita Basáncho Golán markata y Astarot markata. Tsaynölami cada markapa cercancho kaykaq jalqakunatapis chaskipäkurqan uywankunata mitsikunanpaq.
72 (57) Isacar trïbu runakunapitami chaskipäkurqan Cedes, Daberat,
73 (58) Ramot y Anem markakunata. Tsaynölami cada markapa cercancho kaykaq jalqakunatapis chaskipäkurqan uywankunata mitsikunanpaq.
74 (59) Aser trïbu runakunapitami chaskipäkurqan Masal, Abdón,
75 (60) Hucoc y Rehob markakunata. Tsaynölami cada markapa cercancho kaykaq jalqakunatapis chaskipäkurqan uywankunata mitsikunanpaq.
76 (61) Neftalí trïbu runakunapitami chaskipäkurqan Galileacho kaykaq Cedes, Hamón y Quiriataim markakunata. Tsaynölami cada markapa cercancho kaykaq jalqakunatapis chaskipäkurqan uywankunata mitsikunanpaq.
77 (62) Merari aylu wakin runakunami Zabulón trïbu runakunapita chaskipäkurqan Rimón y Tabor markakunata. Tsaynölami cada markapa cercancho kaykaq jalqakunatapis chaskipäkurqan uywankunata mitsikunanpaq.
78 (63) Jordán mayu tsimpanchöpis Merari aylu runakuna markakunata chaskipäkurqan. Tsay tsimpaqa Jericópa frentincho y inti jeqamunan kaq läduchömi kaykan. Tsay wak tsimpancho Rubén trïbu runakunapita chaskipäkurqan chunyaq tsaki jirkacho kaykaq Beser markata. Tsaynöpis chaskipäkurqan Jaza,
79 (64) Cademot y Mefaat markakunata. Tsaynölami cada markapa cercancho kaykaq jalqakunatapis chaskipäkurqan uywankunata mitsikunanpaq.
80 (65) Gad trïbu runakunapitami chaskipäkurqan Galaadcho kaykaq Ramot, Mahanaim,
81 (66) Hesbón y Jazer markakunata. Tsaynölami cada markapa cercancho kaykaq jalqakunatapis chaskipäkurqan uywankunata mitsikunanpaq.
Ichic wilacuycuna
^ 6.16-19 Éxo. 6.16-19.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ 6.65 1Crón. 6.57-60.
