1 Corintios 1:1-31
1 Jesucristupa *apostolnin kanäpaq Tayta Dios qayamashqa kaptinmi noqa Pablo wawqintsi Sósteneswan kay cartata apaykätsimü.
2 Corinto markacho* Tayta Dios kuyashqan wawqi panikuna: Qamkunapaqmi Tayta Dios kayno nirqan: “Paykunaqa Jesucristucho *santumi karkaykan”. Tsayno kaptikimi qayashushqanki pay munashqanno santu kawapäkunaykipaq. Tsaynölami maycho taqkunatapis payman lapan yärakuqkunata qayashqa. Tsaymi Jesucristuqa paykunapapis y noqantsipapis Señornintsi kaykan.
3 Papänintsi Tayta Dios y Señor Jesucristo kuyapäshushpayki ali kawapäkunaykipaq yanapaykuläshunki.
Tayta Diosta Pablo agradëcikushqan
4 Tayta Diostami qamkunapita imaypis agradëcikü. Jesucristuwan juklaylano kaptikimi kuyapäshushpayki imaypis yanapaykäshunki.
5 Lapanchöpis yanapashuptikimi tantiyakurkaykanki y ali wilakurkaykanki.
6 Jesucristupa wilakuyninta chaskikunaykipaq yanapashushqaykinölami kananpis yanapaykäshunki.
7 Tsaymi Señor Jesucristo kutimunanyaq shuyarpaptiki ima yachaynikikunapis pishïshunkitsu.
8 Paymi yanapaykäshunki kutimur pay munashqanno kawaykaqta tarishunaykipaq.
9 Tayta Diosqa promitishqanta imaypis cumplinmi. Paymi Tsurin Señornintsi Jesucristuwan juklaylano kawapäkunaykipaq qayashushqanki.
Juk shonqula kawananpaq yachatsishqan
10 Wawqi panikuna, Señor Jesucristupa jutinchömi ruwakü mana apänakuypa juk shonqula y juk yarpayla kawapäkunaykipaq.
11 Panintsi Cloépa aylunkuna shamurmi wilamashqa kikikikunapura chikinakur y rimanakur kawarkaykashqaykita.
12 Wakinnikishi noqata qatirämashqaykita nirkaykanki, wakinnikishi Apolusta* qatirashqaykita nirkaykanki, wakinnikishi Cefasta* qatirashqaykita nirkaykanki y wakinnikinashi Jesucristuta qatirashqaykita nirkaykanki.
13 Tsayno nirqa manakaqkunatami nirkaykanki. ¿Jesucristuqa atskaman rakikashqatsuraq kaykan? ¿Noqatsuraq qamkuna rayku cruzcho wanushqä? ¿Noqapa jutïchötsuraq *bautizakärishqanki?
14 Tayta Diostami agradëcikü qamkuna kaqcho kar Crisputa* y Gayulata* bautizashqäpita.
15 Tsayno kaptin manami mayqanikipis nipäkunkimantsu noqapa jutïcho bautizakushqaykita.
16 Tsaynöpis Estéfanaspa* aylulantami bautizashqä. Tsaypita mastaqa manami pita bautizashqätapis yarpätsu.
17 Manami runakunata bautizar purinäpaqtsu Jesucristo kachamashqa, sinöqa ali wilakuyninta wilakur purinäpaqmi. Wilakuyninta wilakurqa manami yachaq kashqäta runakuna yarpänanpaqtsu wilakü. Yachaq tukur wilakurqa Jesucristo cruzcho wanushqantami manakaqman churäman.
Jesucristupa wilakuyninta chaskikuqkunata Tayta Dios salvashqan
18 Jesucristo cruzcho wanushqanta wilakuptïmi infiernuman qaykushqa kananpaq kaqkunaqa nipäkun manakaqkunata wilakushqäta. Tsayno niptinpis salvashqa kaqkunapaqqa tsay wilakuy Tayta Diospa poderninmi kaykan.*
19 Tayta Diospa palabranchöpis kaynömi qelqaraykan:“Yachaq runakunapa yarpayninkunatami upatakätsishaq.Tantiyakuqkunatapis manana tantiyakärinanpaqmi pantakätsishaq”.*
20 Tsayno kaptinqa yachaqkuna yachashqanpis ¿imapaqtaq välin? Ley yachatsiqkuna yachashqanpis ¿imapaqtaq välin? Kay patsacho yachaqkuna apänakushqanpis ¿imapaqtaq välin?* Jesucristuta mana chaskikuq runakuna yachashqanpis Tayta Diospaqqa manakaqlami kaykan.*
21 Paymi yachaq kar kamakätsirqan runakuna mayjina yachaq karpis payta mana *reqipäkunanpaq. Tsaymi wilakuynin manakaq kashqanta yarpapäkuptinpis wilakuyninta chaskikuqkunataraq salvan.
22 Israel runakunaqa Jesucristuta chaskikärinanpaq milagrukunataraqmi rikayta munapäkun. Griego runakunanami munapäkun yachaqkuna nishqanno Diospa wilakuynin kananta.
23 Tsayno munaptinpis noqakunaqa Jesucristo noqantsi rayku cruzcho wanushqantami wilakärï. Tsayno wilakäriptïmi Israel runakuna rabyakärin.* Mana Israel runakunanami manakaqkunata wilakushqäta yarpapäkun.
24 Tayta Dios qayashqan kaqkunami itsanqa Israel runa karpis y mana Israel runa karpis tantiyakärin Jesucristo Tayta Diospa podernin y yachaynin kashqanta.*
25 Tsaymi wilakushqä upa runakunalapaq kashqanta yarpapäkuptinpis mas ali kaykan yachaq runakunapa yarpayninpitapis. Tsaynömi Jesucristo cruzcho wanushqanta manakaqman churaptinpis payman yärakuqkunataqa Tayta Dios munayninwan salvaykan.
26 Wawqi panikuna, Tayta Dios qayashushqayki witsan imano kashqaykitapis yarpapäkuy. Qamkunaqa juk ishkaylami yachaq karqayki, juk ishkaylami munayniyuq karqayki y juk ishkaylami rïcu karqayki.
27 Mana yachaq kashqaykita runakuna yarpaptinpis qamkunatami Tayta Dios akrashushqanki yachaqkuna tantiyakur penqakärinanpaq. Tsaynölami munayniynaq kashqaykita yarpapäkuptinpis Tayta Dios akrashushqanki munayniyuq runakuna tantiyakur penqakärinanpaq.*
28 Manakaqman churashqan runakunata salvananpaq Tayta Dios tsayno akraptinmi musyantsi pipis yachaq kashqanpitaqa ni munayniyuq kashqanpitaqa mana salvakunanpaq kashqanta.
29 Tsayno kaptinqa Tayta Diospa nawpancho manami pipis alabakunqatsu.
30 Qamkunataqa Jesucristucho kanaykipaqmi Tayta Dios salvashushqanki. Noqantsi raykumi Jesucristuta Tayta Dios churarqan yachaynintsi kananpaq, salvamaqnintsi kananpaq, perdonamaqnintsi kananpaq y rantimaqnintsi kananpaq.
31 Tsayno kaykaptinqa ama alabakushuntsu. Tayta Diospa palabranchöpis kaynömi qelqaraykan: “Pipis alabakunanpa trukanqa Tayta Diosta alabatsun”.*
Ichic wilacuycuna
^ apóstol Apóstol ninanqa “wilakunanpaq kachashqan runa” ninanmi. Apostolkunataqa Jesucristumi kacharqan maytsaymanpis aywar wilakuyninta wilakunanpaq. Tsay apostolkunaqa karqan chunka ishkaymi. Jesucristo wanushqanpita kawarirkamurmi Pablutapis yuriparkur churarqan apóstol kananpaq (Mar. 3.14; Luc. 6.13-16; 1Cor. 9.1-2). Apostolkunatami Jesucristo nirqan Espíritu Santu shamur lapanta yachatsinanpaq kashqanta y Jesucristo yachatsishqanta yarpätsinanpaq kashqanta (Juan 14.25-26; 16.12-15). Tsaynöpami Jesucristupa apostolninkuna y paykuna autorizashqan runakuna Mushuq Testamentuta qelqapäkurqan.
^ 1.2 Hech. 18.1.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 1.12 Hech. 18.24.
^ 1.12 Cefasqa Pedrupa jukaq jutinmi karqan.
^ bautizay Jesucristuta chaskikuqkuna bautizakurqa runakunata musyatsipäkun jutsankunata kacharishqanta, Jesucristuman yärakärishqanta y Jesucristuta cäsukärinanpaq kashqantami. Discïpulunkunatami Jesucristo nirqan payta chaskikuqkunata bautizananpaq (Mat. 28.19; Mar. 16.16).
^ 1.14a Hech. 18.8.
^ 1.14b Hech. 19.29; Rom. 16.23.
^ 1.16 1Cor. 16.15.
^ 1.19 Isa. 29.14.
^ 1.20a Job 12.17; Isa. 19.12.
^ 1.20b Isa. 44.25.
^ reqiy, Diosta reqiy Tayta Diosta reqirqa payman yärakuntsi y pay munashqanno kawar kushikuntsi. Tsaynöpis tantiyantsi kuyakuq kashqanta, munayniyuq kashqanta, jutsaynaq santu kashqanta, juzgakuq kashqanta, alilata ruraq kashqanta y promitishqanta imaypis cumpliq kashqanta.
^ 1.23 Israel runakuna yarparqan Dios kachamushqan Cristo imayyaqpis mandaq kananpaq kashqantami. Wanushqanta wilakäriptinmi rabyakärirqan.
^ 1.24 Jesucristo Tayta Diospa podernin kashqanta nirqa Jesucristuta chaskikuqkunata Tayta Dios munayninwan salvashqantami niykan. Jesucristo Tayta Diospa yachaynin kashqanta nirqa Jesucristo cruzcho wanushqanpita payta chaskikuqkunata Tayta Dios salvashqantami niykan.
^ 1.27 Manami yachaq kashqanpitatsu ni munayniyuq kashqanpitatsu runakunata Tayta Dios salvan, sinöqa Jesucristuman yärakushqanpitami. Tsayta tantiyarmi runakuna penqakärinqa yachaq kashqanman y munayniyuq kashqanman atiënikushqanpita.
^ 1.31 Jer. 9.23-24.
