1 Corintios 13:1-13
13 Kay patsacho lapan idiömakunata parlarpis y *angilkunapa idiömanta parlarpis kuyakuynï mana kaptinqa platïlluta lutala tukashqan chinchinyaqnölami parlashqäkuna kaykan.
2 Profëta karpis, Tayta Dios yarpashqanta musyarpis y pïmay runapita mas yacharpis kuyakuynï mana kaptinqa manami imapaqpis välïtsu. Tayta Diosman yärakur jirka witikunanpaq niptï witikuptinpis kuyakuynï mana kaptinqa manami imapaqpis välïtsu.*
3 Waktsakunata lapan imaykäkunata rakiparpis y Diosman yärakushqäpita rupatsimaptinpis kuyakuynï mana kaptinqa manami imapaqpis välïtsu.
4 Kuyakuq karqa ima kaptinpis pacienciakuntsimi y pïmaytapis alimi rikantsi. Tsaynöpis runa mayintsita manami chikintsitsu, manami alabakuntsitsu, manami pitapis manakaqman churantsitsu,
5 manami manakaqkunata rimantsitsu, manami munashqalantsita rurananpaq obligantsitsu, manami rabyanantsitsu y pitapis manami nanaq nawintsipa rikapantsitsu.
6 Mana alikunata ruraptin kushikunantsipa trukanqa alikunata ruraptinmi kushikuntsi.
7 Kuyakuq karqa ima kaptinpis perdonantsimi. Imaypis criyintsimi, imaypis shuyarantsimi y lapantapis awantakuntsimi.
8 Profëtakuna wilakushqanpis ushakanqami. Mana yachashqan idiömacho parlashqankunapis ushakanqami. Yachaq kashqantsipis ushakanqami. Kuyanakuymi itsanqa imaypis mana ushakanqatsu.
9 Manami lapantatsu musyantsi. Manami lapantatsu wilakuntsi.
10 Tsayno karpis Jesucristo kutimuptinnaqa kanan musyashqantsikunata ni wilakushqantsikunata manami nistashunpaqnatsu.
11 Noqapis wamra karqa wamranölami parlarqä, wamranölami yarpachakurqä y wamranölami tantiyarqä. Awkinyarnaqa mananami wamranönatsu parlä ni yarpä.
12 Tsaynöpis kananqa makwa espëjuwan rikakuqno shumaqqa manaraqmi tantiyantsiraqtsu. Kay patsapita aywakurmi itsanqa kikin Tayta Dioswan tinkushunpaq. Tsaymi kanan ichiklata musyarpis tsay junaqqa pay reqimashqantsino noqantsipis payta reqishunpaq.*
13 Kananqa yärakuntsi, shuyarantsi y kuyanakuntsi. Lapanpitapis mas aliqa kaykan kuyanakushqantsimi.
Ichic wilacuycuna
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 13.2 Mat. 17.20; 21.21; Mar. 11.23.
