1 Corintios 6:1-20
6 Qamkuna imalapitapis rimanakur ¿imanirtaq Tayta Diosta mana cäsukuq autoridäkunaman quejakuq aywarkaykanki? ¿Imanirtaq kikikipura mana arreglapäkunkitsu?
2 ¿Manaku musyapäkunki Jesucristuta mana yärakuq runakunata juzganantsipaq Tayta Dios churamänantsipaq kashqanta? Tsayno kaykaptinqa ima problëmapis kaptin ¿imanirtaq kikikipura mana arreglapäkunkitsu?
3 ¿Manaku musyapäkunki *angilkunatapis juzganantsipaq kashqanta? Tsayno kanantsipaq kaykaptinqa ¿imanirtaq wawqi panikuna rimanakuptin arreglashwantsu?
4 Mayqan yärakuq mayikiwanpis rimanakushpayki ¿imanirtaq Jesucristuman mana yärakuq autoridäkunamanraq aywarkaykanki?
5 ¿Manaku qamkuna penqakärinki? ¿Manaku qamkunacho pilapis kan Jesúsman yärakuqpura rimanakuptiki arreglashunaykipaq?
6 Kikikipura arreglanaykipa trukanqa Jesucristuman mana yärakuq autoridäkunamanraq quejakuq aywapäkushqayki manami alitsu.
7 Yärakuqpura quejanakurqa mana alitami rurarkaykanki. Quejanakunaykipa trukanqa rabyanätsishuptikipis ¿imanirtaq mana upälakärinkitsu? Suwapäshuptikipis ¿imanirtaq “jina apakutsunpis” nipäkunkitsu?
8 Qamkunaqa kikikipurami penqaypaq quejanakurkaykanki y suwapänakurkaykanki.
9 ¿Manaku musyapäkunki jutsata rurar kawaq runakunaqa Tayta Dios *mandaykashqanman mana yaykunanpaq kashqanta? Shumaq tantiyakäriy: Tayta Dios mandaykashqanman manami yaykunqatsu *fornicación jutsata ruraqkuna, ïdulukunaman yärakuqkuna, runanta y warminta jarukuqkuna, *wayrapakuq warmino puriq mözukuna,* olqupura kakuqkuna, suwakuqkuna, codiciösukuna, borrächukuna, wasarimakuna y sakyapakuqkunapis.
10 -
11 Qamkunapis wakinnikiqa nawpata tsaynömi jutsata rurar kawapäkurqayki. Kananmi itsanqa Señor Jesucristupa jutincho Diosnintsipa Espïritunwan jutsaykikunapita maylashqana karkaykanki, *santuna karkaykanki y jutsaynaqna karkaykanki.
Fornicación jutsapita witikunantsipaq nishqan
12 Qamkuna nirkaykanki munashqaykita ruranaykipaq librina karkaykashqaykitami. Tsayno kaptinpis manami lapantatsu rurapäkunkiman.* Manami jutsata rurar kawanantsipaqtsu libri kaykantsi, sinöqa Tayta Dios munashqanno kawanantsipaqmi.
13 Wakinnikiqa kayno nirkaykanki: “Mikuyqa pachantsipaqmi y pachantsipis mikuypaqmi”. Tsayno nipäkuptikipis Tayta Diosmi pachantsitapis mikuytapis ushakätsinqa. Tsaynöpis cuerpuntsi manami *fornicación jutsata ruranantsipaqtsu kaykan, sinöqa Señor Jesucristo munashqanno kawanantsipaqmi.
14 Tayta Dios payta kawaritsimushqannömi noqantsitapis munayninwan kawaritsimäshunpaq.
15 ¿Manaku musyapäkunki Jesucristuwan juklaylano kashqaykita? ¿Paywan juklaylano kaykartsuraq *wayrapakuq warmiwan kakunkiman? Tsaynöqa ama kapäkuytsu.
16 ¿Manaku musyapäkunki juk runa wayrapakuq warmiwan kakurqa paywan juk cuerpunölana kashqanta? Tayta Diospa palabranchöpis kaynömi niykan: “Ishkaq karpis juklaylanömi kanqa”.*
17 Tsay nishqannölami Jesucristuman yärakurqa Jesucristuwan juklaylanöna kaykantsi.
18 ¡Fornicación jutsapita witikäriy! Wakin jutsakunata rurarqa manami cuerpuykita qanrataykankitsu. Fornicación jutsata rurarmi itsanqa cuerpuykita qanrataykanki.
19 ¿Manaku musyapäkunki Tayta Dios qoshushqayki Espíritu Santu tashqan templu karkaykashqaykita? Tsayno kaykaptinqa cuerpuykikuna manami qamkunapatsu kaykan, sinöqa Tayta Diospami.*
20 Qamkunataqa Tayta Diosmi rantishushqanki.* Tsawraqa jutsata mana ruraypa pay munashqanno kawapäkuy.*
Ichic wilacuycuna
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ fornicación jutsa Fornicación jutsaqa kaykan majalanwan kakunanpa trukan jukwan kakushqan, mana ashinakuylapa kakushqan, uywakunawan kakushqan, olqupura kakushqan, warmipura kakushqan, wayrapakuq warmiwan kakushqan, aylunwan kakushqan y jukwan jukwan lutala kakushqanpis (Lev. 18.6-23; 1Cor. 5.1; 6.12-20; Efe. 5.5).
^ wayrapakuq warmi Wayrapakuq warmiqa pägupaq rayku jukwan jukwan kakuq warmimi kaykan. Tsayno warmikunata Tayta Dios imaypis mana perdonananpaq kashqanta runakuna yarpaptinpis Jesucristuqa nirqan jutsankunata kacharir Tayta Dios munashqanno kawarqa perdonashqa kananpaq kashqantami (Mat. 21.31-32; Heb. 11.31).
^ 6.9-10 Wayrapakuq warmino puriq mözukunataqa runakuna päganmi wayrapakuq warmiwanno kakunanpaq.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 6.12 1Cor. 10.23.
^ fornicación jutsa Fornicación jutsaqa kaykan majalanwan kakunanpa trukan jukwan kakushqan, mana ashinakuylapa kakushqan, uywakunawan kakushqan, olqupura kakushqan, warmipura kakushqan, wayrapakuq warmiwan kakushqan, aylunwan kakushqan y jukwan jukwan lutala kakushqanpis (Lev. 18.6-23; 1Cor. 5.1; 6.12-20; Efe. 5.5).
^ wayrapakuq warmi Wayrapakuq warmiqa pägupaq rayku jukwan jukwan kakuq warmimi kaykan. Tsayno warmikunata Tayta Dios imaypis mana perdonananpaq kashqanta runakuna yarpaptinpis Jesucristuqa nirqan jutsankunata kacharir Tayta Dios munashqanno kawarqa perdonashqa kananpaq kashqantami (Mat. 21.31-32; Heb. 11.31).
^ 6.19 1Cor. 3.16; 2Cor. 6.16.
^ 6.20 1Cor. 7.23; Apoc. 5.9.
^ 6.20 Wakin qepa kaq griego copiakunachöqa kaynömi niykan: Tayta Diosta cuerpuykicho y espïrituykicho glorificay. Tsaykunaqa Diospami karkaykan.
