1 Corintios 7:1-40
7 Kanan tantiyatsishayki cartata apatsimushqaykicho tapupäkamashqaykipita. Alimi kanman warmiwan runa mana kakuptin.
2 Tsayno kaptinpis jukwan jukwan mana purikärinanpaq cada ünu warmiyuq y runayuq katsun.
3 Runanta warmin cuerpunta ama michätsuntsu. Tsaynöla warminta runanpis cuerpunta ama michätsuntsu.
4 Runayuq kaptinnaqa warmipa cuerpun manami kikinpanatsu, sinöqa runanpanami. Runanpa cuerpunpis manami kikinpanatsu, sinöqa warminpanami.
5 Tsayno kaykaptinqa cuerpuykita ama michänakäriytsu.
Wakinkunaqa warminwan wilanakärin Tayta Diosta manakunanpaq kaq junaqkuna pasashqanyaq mana yatapänakunanpaqmi. Tsayno wilanakurqa wilanakushqayki junaqyaqla ama yatapänakunkitsu. Wilanakushqayki junaq cumplirkuptin yapay yatapänakärinki. Tsayno mana rurapäkuptikiqa *Satanásmi mayqanikitapis jutsaman tunitsishunkipaq.
6 Manami majaykiwan pununaykipaq michartsu tsayno niykä, sinöqa wakinkuna tsayno rurayta munaptinmi.
7 Noqapa yarpaynïpitaqa alimi kanman lapaykipis noqano japalayki täkäriptiki. Imano kaptinpis Tayta Diosmi kamakätsin wakinnintsi warmiyuq kanantsipaq y wakinnintsi warmiynaq kanantsipaqpis.
8 Warmiynaqkunata, runaynaqkunata y viüdakunataqa noqa yätsï noqano japalan täkunanpaqmi.
9 Warmiynaq o runaynaq täkuyta mana kamäpakur imarqa warminta o runanta ashikutsun. Jukwan jukwan purikunanpa trukanqa mas alimi kanman warmiyuq o runayuq kaptin.
10 Warmiyuqkunata y runayuqkunata Señor Jesucristo kaynömi nirqan: “Runanpita warmi ama rakikätsuntsu”.*
11 Tsaymi runanpita rakikar imarqa mana yapapakuylapa täkutsun. Runayuq kayta munarqa runanwan amistakutsun. Tsaynöla runa kaqpis warminpita ama rakikätsuntsu.
12 Mayqan wawqipa warminpis rakikayta mana munaptinqa Jesucristuman mana yärakuptinpis warminpita ama rakikätsuntsu. Tsaypita Señor Jesucristo mana yachatsishqa kaptinpis mana rakikänanpaqmi tsayno nï.
13 Tsaynöla mayqan panipa runanpis rakikayta mana munaptinqa Jesucristuman mana yärakuptinpis runanpita ama rakikätsuntsu.
14 Ama yarpapäkuytsu Jesucristuman majayki mana yärakuq kaptin paywan tashqayki mana ali kashqanta. Jesucristuman warmi yärakuptinqa runanwan tashqan alimi kaykan. Tsaynölami Jesucristuman runa yärakuptin warminwan tashqan ali kaykan. Tsayno mana kaptinqa wamrankunata Tayta Dios manami yanapanmantsu. Itsanqa wamrankunata kuyaparmi Tayta Dios yanapaykan.
15 Jesucristuman mana yärakuq warmi o runa rakikayta munarqa rakikäkutsun. Rakikaptinqa majan librinami kaykan. Tayta Dios manami munantsu majayuqkuna mana ali kawapäkunanta.
16 Wawqikuna, tantiyakäriy. Mana rakikaptikiqa capazchari warmiki tantiyakur salvakunqa. Panikuna, qamkunapis tantiyakäriy. Mana rakikaptikiqa capazchari runayki tantiyakur salvakunqa.
Señalakushqa o mana señalakushqa karpis, ashmay o libri karpis Tayta Diosta sirvinanpaq nishqan
17 Maytsaychöpis wawqi panikunata kayno nirmi tantiyaykätsï: Salvashunaykipaq Tayta Dios qayashuptikiqa *señalakushqa o mana señalakushqa karpis, ashmay o libri karpis Tayta Diosta sirvipäkuy.
18 Cuerpuyki señalakushqa kaykaqta qayashuptikiqa señalakushqala kakäriy. Cuerpuykikuna mana señalakushqata qayashuptikiqa ama señalakäriytsu.
19 Señalakushqa kashqayki y mana señalakushqa kashqaykipis Tayta Diospaq iwalmi kaykan. Payqa munan imano karpis mandamientunkunata cumplinaykitami.
20 Salvashunaykipaq Tayta Dios qayashuptiki señalakushqa o mana señalakushqa kashqaykinöla kawapäkuy.
21 Ashmay kaykaqta qayashuptikipis ama lakikäriytsu. Tsayno kaptinpis ashmay kaykashqaykipita pilapis jorqushuptiki alimi kanman.
22 Jesucristo kayninpa Tayta Dios qayashuptiki ashmay kashqa karpis Jesucristuman yärakur librinönami karkaykanki. Tsaynölami Tayta Dios qayashuptiki libri kashqa karpis Jesucristuta sirvinaykipaq paypa ashmaynin karkaykanki.
23 Tayta Diosmi salvashushpayki rantishushqanki. Tsayno kaykaptinqa señalakunaykipaq nishuptiki o ashmay kashqaykipita yarqukunaykipaq nishuptiki ama cäsupäkuytsu. Cäsurqa paykunapa ashmayninno rikakärinki.
24 Wawqi panikuna, tsayno kaykaptinqa señalakushqa o mana señalakushqa karpis, ashmay o libri karpis Tayta Diosta sirvipäkuy.
Majayuq kananpaq o japala täkunanpaq yachatsishqan
25 Kananqa japala kaqkunapaq tantiyatsishayki. Paykunapaqqa Señor Jesucristo manami imatapis parlakushqatsu. Tsayno kaptinpis Tayta Dios kuyapämar yachayta qomaptin yätsishqäkunata chaskikäriy.
26 Kanan witsan aläpa nakaykuna kaptin noqapa tantiyaynïpitaqa majaynaq kaqkunaqa japala täkutsun.
27 Majayuq karqa majaykipita ama rakikaytsu. Japala karqa warmita ama ashiytsu.
28 Tsayno kaptinpis warmita ashir jutsata manami rurarkaykankitsu. Tsaynölami jipashpis runawan tarqa jutsata mana ruraykantsu. Itsanqa majayuq rikakur kanan witsan aläpa nakaykuna kaptin masraqmi nakanqa. Tsayno kananta manami munätsu.
29 Wawqi panikuna, walkalanami kay patsa ushakänanpaq pishiykan. Tsayno kaykaptinqa majayuq karpis japala kashqanno kawapäkutsun.*
30 Lakishqa kaykarpis mana lakishqa kaykaqno kawapäkutsun. Kushishqa kaykarpis mana kushishqa kaykaqno kawapäkutsun. Imata rantirpis tsaykunaman ama atiënikäritsuntsu.*
31 Rïcu karpis tsaykunaman uman churakashqa ama katsuntsu. Kay rikaykashqantsi patsaqa ushakänanpaqnami kaykan.
32 Manami munätsu yarpachakular kawapäkunaykita. Warmiynaq runakunaqa Señor Jesucristo munashqanta rurananpaqmi mas yarpachakärin.
33 Warmiyuqkunami itsanqa warminwan ali kawananpaq mas yarpachakärin.
34 Tsayno karqa warminta rikananpaq y Jesucristuta sirvinanpaqpis yarpachakärinmi.
Tsaynölami viüdakunapis* y jipashkunapis Señor Jesucristo munashqanno lapanchöpis *santu kawananpaq yarpachakärin. Runayuq warmikunami itsanqa runanwan ali kawananpaq mas yarpachakärin.
35 Tsayta nï manami majayuq kanaykita michartsu, sinöqa majayuq kanaykipaq o majaynaq kanaykipaqpis shumaq yarpachakärinaykita munarmi. Tsaynöpis munaykä shumaq kawar Señor Jesucristuta lapan shonquykiwan sirvipäkunaykitami.
36 Pï runapa warmi tsurinpis runayuq kananpaq edäninchöna kaptinqa y runayuq kayta munaptinqa tätsitsun. Tätsirqa manami jutsata ruraykantsu.
37 Tsayno kaptinpis tätsiyta mana munarqa ama tätsitsuntsu. Itsanqa manami pipis tätsinanpaq o mana tätsinanpaqpis obliganmantsu.
38 Tsaymi tsurinta tätsir alita ruraykan. Tsayno kaptinpis mana tätsir mas alitami ruraykan.
39 Runayuq warmi runan kawaykaptinqa [ley nishqannöla] runalanwan täkutsun. Runan wanuptinmi itsanqa librina kaykan jukwan tänanpaq. Tsayno kaptinpis Jesucristuta mana chaskikuq runawanqa ama tanmantsu.
40 Tänanpaq libri kaptinpis noqapa yarpaynïpitaqa viüda mananami yapapakunmannatsu. Tsayno niykä noqapis Espíritu Santuta chaskikushqa karmi.
Ichic wilacuycuna
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ 7.10 Mar. 10.12.
^ señalakushqan Señalakuyqa chiwlakunanpa punta qaranta kutsurir jorqushqanmi kaykan. Abrahamwan Tayta Dios pactuta rurashqanta yarpashpanmi Israel runakunaqa tsayno señalakärin. Tsaymi olqu wamrakunata yurishqanpita pusaq junaqniyuq kaykaptin señalapäkun. Tsaytami castellänucho “circuncisión” nipäkun (Gén. 17.9-14; Col. 2.11; 1Cor. 7.18-20).
^ 7.29 Manami warminta kacharinanpaqtsu niykan, sinöqa Tayta Diosta mas sirvir kawananpaqmi.
^ 7.30 Tsayno nirqa tantiyatsirqan lakishqa karpis kushishqa karpis imata rantishqa karpis Tayta Dios munashqanno kawananpaq kashqantami.
^ 7.34 Wakin griego copiakunaqa warmikunapis ninmi.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
