1 Corintios 8:1-13
8 Kanan tantiyatsishayki ïdulukunapa jutincho pishtashqan aytsakunapita tapukamashqaykita.* Musyämi kayno nipäkushqaykita: “Lapanïmi yachaq kapäkü”. Tsayno nipäkuptikipis wakin yachaqkunaqa orgullösumi rikakun. Kuyapäkuq kaqkunami itsanqa runa mayinta ali yanapan.
2 Yachaq kashqaykita yarparpis manami rasunpaqa yachaqtsu kaykanki.
3 Rasunpa yachaq runaqa Tayta Diostami *kuyan. Tsayno runataqa Tayta Diospis reqinmi.
4 Ïdulukunapa jutincho pishtashqan uywakunata mikunantsipaq o mana mikunantsipaq kashqantapis kanan tantiyatsishayki. Musyashqantsinöpis ïdulukunaqa manami kawantsu ni munayniyuqtsu kaykan. Tsaynöpis musyantsimi Tayta Dios juklayla kashqanta.
5 Tsayno kaptinpis wakin runakuna yarpan jana patsachöpis y kay patsachöpis tsaytsika dioskuna kashqantami.
6 Tsayno yarpaptinpis noqantsipaqmi itsanqa juklayla Dios kaykan. Payqa Tayta Diosmi kaykan. Lapantapis paymi kamashqa. Noqantsipis payta sirvinantsipaqmi kawantsi. Señor Jesucristupis juklaylami kaykan. Paywanmi Tayta Dios lapantapis kamarqan. Paymi kawaytapis qomantsi.*
7 Tsayno kaptinpis manami lapan wawqi panikunatsu tsaykunata tantiyapäkun. Wakinkunaqa ïdulukunata nawpata adorashqa karmi ïdulukunapaq pishtashqan aytsata mikuyta mana munannatsu. Tsay aytsata mikurqa jutsata rurashqantami yarparkaykan.
8 Manami aytsata mikushqantsipitatsu Tayta Dios mas kuyamantsi y aytsata mana mikushqantsipitatsu mënus kuyamantsi, sinöqa mikuptintsipis mana mikuptintsipis iwalmi kuyamantsi.
9 Ïdulupaq pishtashqan aytsata mikunaykipaq libri kaykarpis cuidädu mikushpayki manaraq shumaq tantiyaq wawqi panikunata jutsata ruratsipäkunkiman.
10 Yachaq kashqaykita yarparmi wakinnikiqa ïdulukunapa templuncho aytsata mikurkaykanki. Tsay aytsata mikuykaqta rikashushpayki ¿manatsuraq shumaq manaraq tantiyaq wawqi panikunapis tsay aytsata mikuyta munanqa?
11 Tsaynöpami yachaq kashqaykita yarparpis tsay wawqi panikunata jutsata ruraykätsinki. Tsayno jutsata ruraykätsinki paykuna rayku Jesucristo wanushqa kaykaptinpis.
12 Mana tantiyaq wawqi panikunata tsayno jutsata ruratsirqa Jesucristupa contranmi rurarkaykanki.*
13 Aytsata mikushqantsipita yärakuq mayintsi ïduluta yapay adoraptinqa aytsata imaypis ama mikushunnatsu.
Ichic wilacuycuna
^ 8.1 Tsay witsanqa ïdulukunapa jutinchömi mikunanpaq uywata pishtapäkuq. Jesucristuman wakin yärakuqkuna yarparqan tsay aytsata mikur jutsata rurapäkushqantami. Wakinnami yarparqan jutsata mana rurapäkushqanta. Tsayno kashqanpitami apóstol Pabluta tapupäkurqan.
^ kuyay, Diosta kuyay Tayta Diosta kuyarqa lapan nishqankunatami cäsukuntsi (Deut. 6.5; 11.1; Juan 14.15, 21; 1Juan 5.3). Tsaynöpis Tayta Diosta kuyarqa runa mayintsitapis kuyantsimi (1Juan 4.20-21; 5.1).
^ 8.12 Mat. 25.45.
