1 Juan 1:1-10
1 Kawatsikuq Palabrapitami* qamkunapaq qelqamü. Payqa imapis manaraq kaptin maynami kaykarqan.* Paytami rikapäkushqä, yatapäkushqä y parlashqantapis mayapäkushqä.
2 Tsay Kawatsikuqta Tayta Dios kachamuptinmi rikapäkurqä.* Tsaymi qamkunata wilapaykä *mana ushakaq kawayta qomaqnintsi kashqanta. Paymi Tayta Dioswan kaykashqanpita noqantsiman shamushqa.
3 Rikapäkushqäta y mayapäkushqätami qamkunata wilaparkaykä. Tsaynöpami Tayta Diospa y Tsurin Jesucristupa nawpancho kawapäkushqäno qamkunapis paypa nawpancho kawapäkunkipaq.
4 Tsaykunata qelaykämü kushishqa kawanantsipaqmi.
Jutsata mana ruraypa kawanantsipaq nishqan
5 Jesucristo yachatsimashqalantami qamkunata kayno wilapaykä: Tayta Diosqa atskimi. Paychöqa manami ima tsakaypis kantsu.*
6 Tsaymi mayqantsipis “Tayta Dios munashqannömi kawaykä” niykar jutsata rurarqa lulakuykantsi. Tsayno kawarqa manami rasunpatsu Tayta Dios munashqanno kawaykantsi.
7 Tayta Dios atsikyaqcho kashqanno noqantsipis atsikyaqcho kawarmi* juknintsi juknintsi kuyanakuykantsi. Tsaynöpis Tsurin Jesucristumi yawarninwan lapan jutsa rurashqantsita maylamashqantsi.
8 Mayqantsipis “noqaqa jutsaynaqmi kä” nirqa manami rasun kaqtatsu parlaykantsi, sinöqa lulakuykantsimi.
9 Jutsata rurashqantsipita perdonta manakuptintsimi itsanqa promitimashqantsita cumplir Tayta Dios perdonamäshun. Payqa alilata ruraq karmi lapan jutsantsita maylamäshun.
10 Jutsaynaq tukurqa pay nishqankunata manakaqmanmi churaykantsi. Tsayno karqa manaraqmi wilakuyninta chaskikushqantsiraqtsu.*
Ichic wilacuycuna
^ 1.1 Kawatsikuq Palabraqa Jesucristumi kaykan.
^ 1.1 Juan 1.1; 1Juan 2.13-14.
^ 1.2 Juan 1.14, 18.
^ mana ushakaq kaway Mana ushakaq kawayqa Tayta Diospa nawpancho imayyaqpis kawanantsipaqmi kaykan. Tsay kawayta tarirqa Tayta Diosta reqintsimi (Juan 17.3). Mana ushakaq kawayqa kay patsachömi qalaykun (Juan 5.24). Tsay kawayta tarintsi Jesucristuta chaskikurmi (Juan 3.16, 36; 6.40, 47; 14.6; 20.31).
^ 1.5 Tayta Dios atski kar paycho ima tsakaypis mana kashqanta nirqa jutsaynaq kashqantami niykan.
^ 1.7 Tayta Dios atsikyaqcho kashqanta nirqa Tayta Dios rasun kaqlata nishqanta y jutsaynaq kashqantami niykan. Noqantsipis atsikyaqcho kawanantsipaq nirqa Tayta Dios munashqanno kawanantsipaqmi niykan.
^ 1.8-10 Prov. 20.9.
