1 Juan 2:1-29
2 Kuyay wamräkuna, kay cartata apaykätsimü jutsata mana rurapäkunaykipaqmi.* Jutsata ruraptintsiqa Tayta Diospa nawpancho favornintsi sharkunanpaq abogäduntsi kaykanmi. Tsay abogäduntsiqa alilata ruraq Jesucristumi.
2 Paymi sacrificiu kashqa jutsantsikunata Tayta Dios perdonamänantsipaq.* Manami noqalantsipaqtsu wanurqan, sinöqa lapan runakuna perdonashqa kananpaqmi.
3 Tayta Diosta *reqishqantsita musyantsi mandamientunkunata cumplirmi.*
4 Mayqantsipis Tayta Diosta reqishqantsita niykarpis mandamientunkunata mana cäsukurqa manami rasun kaqtatsu parlantsi, sinöqa lulakuykantsimi.
5 Mandamientunkunata cumplirmi itsanqa Tayta Diosta rasunpa *kuyantsi. Tsaynöpami musyantsi Tayta Diospa makincho kashqantsita.
6 Pipis Tayta Diospa makincho kawashqanta niykarqa Jesucristo kawashqanno kawatsun.
Mushuq mandamientu
7 Kuyay wamräkuna, jukniki juknikipis kuyanakärinki. Kay mandamientu manami mushuq mandamientutsu kaykan, sinöqa unaypita patsa musyashqantsi mandamientumi. Tsay mandamientuta maynami musyapäkunki.
8 Mushuq mana kaptinpis kananqa musyapäkunki Jesucristo kuyamashqantsino kuyanakunaykipaq kashqantami. Tsaymi tsay mandamientu mushuq kaykan. Jesucristo kuyakuq kashqannömi qamkunapis kuyanakurkaykanki. Tsayno kuyanakurmi tsakaypita atsikyaqman yarquqno karkaykanki.
9 Pï runapis “atskichömi kaykä” niykar runa mayinta chikirqa tsakaycho kaykaqnömi kaykan.
10 Runa mayinta kuyarmi itsanqa atskicho kaykaqno kaykan.* Tsayno kawaptinqa pïmaypis payta rikakurmi ali kawanqa.
11 Runa mayinta chikiq kaqqa tsakaycho kaykaqnömi kaykan. Qapra runa maypa aywashqantapis mana tantiyashqannömi Tayta Dios munashqanno kawananpaqpis mana tantiyantsu.
Cartata imanir Juan apatsishqan
12 Kuyay wamrakuna, qamkunapaq kay cartata apaykätsimü Jesucristo noqantsi rayku wanushqanpita perdonashqa kaptikimi.
13 Taytakuna, qamkunapaq kay cartata apaykätsimü qalaykunanpita patsa kawaq Jesucristuta *reqishqa kaptikimi.Mözukuna y jipashkuna, qamkunapaq kay cartata apaykätsimü *Satanásta vincishqa kaptikimi.
14 Kuyay wamrakuna, qamkunapaq kay cartata apaykätsimü Tayta Diosta reqishqa kaptikimi.Taytakuna, qamkunapaq kay cartata apaykätsimü qalaykunanpita patsa kawaq Jesucristuta reqishqa kaptikimi.Mözukuna jipashkuna, qamkunapaq kay cartata apaykätsimü kalpayuq kashqaykipitami y Diospa wilakuyninta cäsukushpayki Satanásta vincishqa kaptikimi.
Diosta mana cäsukuq runakuna kawashqanno mana kawanantsipaq nishqan
15 Diosta mana cäsukuq runakunanöqa ama kawapäkuytsu. Paykunano kawarqa Tayta Diosta manami *kuyarkaykankitsu.
16 Diosta mana cäsukuq runakunaqa shonqun munashqanno lutantami rurarkaykan, imatapis rikashqantami munaparkaykan y lapanpitapis ali rikashqa kaytami munarkaykan. Paykunano kawarqa manami Tayta Dios munashqannötsu kawarkaykanki, sinöqa jutsasapa runakunanömi.
17 Kay patsapis y runakuna munapashqankunapis ushakanqami. Tayta Dios munashqanno kawaq runakunami itsanqa *mana ushakaq kawayta taripäkunqa.
Anticristukuna yurimunanpaq nishqan
18 Kuyay wamräkuna, ultimu tiempuchönami kaykantsi. *Anticristo shamunanpaq kashqanta musyashqaykinöpis kananqa atska anticristukunami yurimushqa. Tsaynöpami musyantsi ultimu tiempuchöna kaykashqantsita.
19 Tsay runakunaqa nawpata noqantsiwan juntakashqa karpis kananqa manami noqantsiwan juntakannatsu. Paykunaqa manami Jesucristuta rasunpatsu chaskikärishqa. Jesucristuta rasunpa chaskikushqa karqa noqantsiwanmi kaykanman karqan. Noqantsipita yarqushqa kaptinmi musyantsi Jesucristuta mana chaskikärishqanta.
20 Qamkunamanqa Jesucristumi Espíritu Santuta kachamushqa. Tsaymi tantiyapäkunki mayqan yachatsikuykuna ali kashqanta y mayqan mana ali kashqantapis.*
21 Tsaynöpis tantiyapäkunki lulakuqkuna Tayta Diospa wilakuyninta wilakunanpa trukanqa lutankunata yacharkaykätsishqanta. Rasun kaq yachatsikuyta tantiyapäkushqaykita musyarmi kay cartata apaykätsimü.
22 Tsay lulakuqkunaqa kayno nirmi yacharkaykätsin: “Jesúsqa manami Tayta Dios kachamushqan Cristutsu”. Tsayno yachatsiqkunaqa anticristumi karkaykan. Paykunaqa Tayta Diostapis y Jesucristutapis ñëganmi.
23 Jesucristo Tayta Diospa Tsurin kashqanta pipis ñëgarqa Tayta Diostapis ñëganmi. “Jesucristuqa Diospa Tsurinmi kaykan” nirqa Tayta Diostapis chaskikunmi.
24 Tsayno kaykaptinqa Jesucristupa wilakuyninta yachakushqaykita ama qonqapäkuytsu. Mana qonqarqa Tayta Diospa y Tsurin Jesucristupa makinchömi kawarkaykanki.
25 Paymi promitimashqantsi gloriacho imayyaqpis kawanantsipaq.
26 Kay cartata apaykätsimü lutan yachatsikuqkunata mana chaskipänaykipaqmi.
27 Jesucristupita chaskishqayki Espíritu Santu qamkunawanmi kaykan. Paymi rasun kaqlata lapantapis tantiyaykätsishunki. Manami imaypis lulapäshunkitsu. Tsayno kaykaptinqa lutan yachatsikuykunata ama chaskipäkuytsu. Espíritu Santu tantiyatsishushqaykinöla Jesucristuman yärakur imaypis kawapäkuy.
28 Kuyay wamräkuna, Jesucristupa makincho imaypis kawapäkuy. Tsaymi Jesucristo kutimuptin mana mantsakuypa y mana penqakuypa nawpancho kapäkunkipaq.
29 Musyantsimi Jesucristo imaypis alilata ruraq kashqanta. Tsaymi pipis alilata rurarqa Tayta Diospa wamran kaykan.
Ichic wilacuycuna
^ 2.1 Rom. 6.11-14.
^ 2.2 1Juan 4.10.
^ reqiy, Diosta reqiy Tayta Diosta reqirqa payman yärakuntsi y pay munashqanno kawar kushikuntsi. Tsaynöpis tantiyantsi kuyakuq kashqanta, munayniyuq kashqanta, jutsaynaq santu kashqanta, juzgakuq kashqanta, alilata ruraq kashqanta y promitishqanta imaypis cumpliq kashqanta.
^ 2.3 Juan 14.15, 21, 23.
^ kuyay, Diosta kuyay Tayta Diosta kuyarqa lapan nishqankunatami cäsukuntsi (Deut. 6.5; 11.1; Juan 14.15, 21; 1Juan 5.3). Tsaynöpis Tayta Diosta kuyarqa runa mayintsitapis kuyantsimi (1Juan 4.20-21; 5.1).
^ 2.10 Rom. 13.12-13.
^ reqiy, Diosta reqiy Tayta Diosta reqirqa payman yärakuntsi y pay munashqanno kawar kushikuntsi. Tsaynöpis tantiyantsi kuyakuq kashqanta, munayniyuq kashqanta, jutsaynaq santu kashqanta, juzgakuq kashqanta, alilata ruraq kashqanta y promitishqanta imaypis cumpliq kashqanta.
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ kuyay, Diosta kuyay Tayta Diosta kuyarqa lapan nishqankunatami cäsukuntsi (Deut. 6.5; 11.1; Juan 14.15, 21; 1Juan 5.3). Tsaynöpis Tayta Diosta kuyarqa runa mayintsitapis kuyantsimi (1Juan 4.20-21; 5.1).
^ mana ushakaq kaway Mana ushakaq kawayqa Tayta Diospa nawpancho imayyaqpis kawanantsipaqmi kaykan. Tsay kawayta tarirqa Tayta Diosta reqintsimi (Juan 17.3). Mana ushakaq kawayqa kay patsachömi qalaykun (Juan 5.24). Tsay kawayta tarintsi Jesucristuta chaskikurmi (Juan 3.16, 36; 6.40, 47; 14.6; 20.31).
^ anticristo Anticristuqa Jesucristupa contran runami kaykan. Tsay runami Señor Jesucristo kutimunanpaqna kaptin yurimunqa. Nirkurmi runakunata lulapar kayno ninqa: “Noqami Cristo kaykä”. Milagrukunatapis rurarmi Jesucristuman yärakuqkunata engañanqa. Jesucristo kutimurnami azufriwan talushqa nina rupaykaq qochaman anticristuta qaykunqa (Mat. 24.4-5; Mar. 13.5-6; Luc. 21.8; 2Tes. 2.8-10; Apoc. 13.2; 13.13-14; 16.13; 19.20).
^ 2.20 1Cor. 2.10-16.
