1 Pedro 1:1-25
1 Ponto, Galacia, Capadocia, Asia y Bitinia provinciakunacho kaykaq wawqi panikuna:
Noqa Pedro, Jesucristupa *apostolnin karmi, kay patsacho qorpanöla kapäkuptiki kay cartata qamkunaman apaykätsimü.
2 Tayta Dios unaypita patsa *reqishushpaykimi Espíritu Santuwan akrashushqanki Jesucristuta cäsukärinaykipaq y yawarninta jichashqanpita perdonashqa kanaykipaq. Tayta Dios kuyapäshushpayki ali kawapäkunaykipaq yanapaykuläshunki.
Tayta Diosman yärakur kushishqa kawanantsipaq nishqan
3 ¡Señor Jesucristupa Papänin Tayta Diosta alabaykuläshun! Kuyapämashpantsimi mushuq kawayta qomashqantsi yapay yurishqanöna kanantsipaq.* Jesucristo kawarimushqa kaptinmi musyantsi noqantsipis kawarirkamur gloriaman chayanantsipaq kashqanta.
4 Gloriaman chayarnami Tayta Dios shuyaraykätsimashqantsi herenciata chaskishunpaq. Tsay herenciaqa manami imaypis ushakanqatsu, ismunqatsu ni elqanqatsu.
5 Tayta Diosman yärakäriptikimi munayninwan yanapaykäshunki Jesucristo kutimuptin kamarishqan salvacionta chaskipäkunaykipaq.
6 Tsayta musyarmi kay patsacho kashqaykiyaq ima nakaycho karpis kushishqala kawarkaykanki.
7 Qorita ninawan tsulutsirraq *püru kashqanta musyashqantsinömi qamkunapis nakaykunawanraq musyapäkunki Tayta Diosman rasunpa yärakärishqaykita. Yärakuynikikunaqa qoripitapis masmi välin. Tsaymi imano nakarpis Tayta Diosman yärakäriptikiqa Jesucristo kay patsaman kutimur alabashunki, ali rikashunki y aliman churapäkushunki.
8 Mana rikashqa kaykarpis Jesucristuta kuyarkaykankimi.* Tsaymi payman yärakur pasaypa kushishqa kawarkaykanki. Tsayno kushikushqaykitaqa manami imanöpa tantiyatsiytapis kamäpakunkitsu.
9 Tsayno kushikurkaykanki Jesucristuman yärakur salvacionta tarishqaykipitami.
10 Tayta Dios kuyapämashpantsi salvamänantsipaq kashqantaqa profëtankunapis shumaq tapukuykurmi wilakärirqan.
11 Tsayno wilakunanpaqmi Jesucristupa Espïritun paykunata tantiyatsirqan Cristo nakar wanunanpaq kashqanta y kawarirkamur lapanpaq munayniyuq kananpaq kashqanta. Tsayno tantiyatsiptinmi profëtakuna musyayta munarqan Cristo pï kashqanta y imay shamunanpaq kashqantapis.
12 Tsay profëtakunatami Espíritu Santu tantiyatsirqan paykuna kawashqan witsan shamunanpa trukanqa shamuq watakunachöraq shamunanpaq kashqanta.
Jesucristo shamushqana kaptinmi kananqa jana patsapita shamuq Espíritu Santupa munayninwan Jesucristupa ali wilakuyninta wilakurkaykan. Jesucristo noqantsi rayku wanur salvamashqantsitami *angilkunapis imanöpapis tantiyayta munarkaykan.
Jutsata mana ruraypa kawanantsipaq tantiyatsishqan
13 Tsawraqa shumaq tantiyakärishpayki Tayta Dios munashqanno kawapäkuy. Ama qonqapäkuytsu Jesucristo kutimur Tayta Diospa nawpanman pushamänantsipaq kashqanta.
14 Tayta Diospa wamrankuna kaykarqa payta cäsukur munashqanno kawapäkuy. Jesucristuta manaraq chaskikur kawashqaykinöqa ama kawapäkuytsu.
15 Tsaypa trukanqa akramaqnintsi Tayta Dios *santu kashqanno qamkunapis santu kapäkuy.
16 Tayta Diospa palabranchöpis kaynömi qelqaraykan: “Noqaqa santumi kä. Qamkunapis santu kapäkuy”.*
17 Pitapis mana jananpaypa juzgaq Tayta Diosta “Papä” niykarqa kay patsacho qorpanöla kawashqaykiyaq payta *mantsakur kawapäkuy.
18 Unay ayluykikuna kawashqannömi qamkunapis jutsata rurar kawapäkurqayki. Tsayno karkaykaptiki manami qellaywantsu ni qoriwantsu Tayta Dios rantishushqanki,
19 sinöqa Jesucristupa yawarninwanmi. Sänu carnishta sacrificiupaq pishtaptin yawarninta jichashqannömi Jesucristupis noqantsi rayku yawarninta jichashqa.
20 Kay patsata manaraq kamar Tayta Dios destinashqa kaptinmi noqantsi kawashqantsi witsanraq Jesucristo kuyamashpantsi shamushqa.
21 Pay kayninpami Tayta Diosman yärakurkaykanki. Wanushqanpita kawarirkatsimurmi gloriacho munayniyuq kananpaq Tayta Dios shuntakushqa.
22 Wilakuyninta* cäsukäriptikimi Tayta Dios purificashushqanki kuyanakur kawapäkunaykipaq. Tsayno kaykaptinqa lapan shonquykiwan jukniki juknikipis kuyanakur kawapäkuy.
23 Tsayno kawapäkunaykipaqmi yapay yurishqano karkaykanki.* Manami mamaykipitatsu ni taytaykipitatsu tsay kawayta chaskikärishqanki, sinöqa Diospa palabranta chaskikärishqaykipitami. Paypa palabranqa kawaq karmi imaypis ushakanqatsu.
24 “Lapan runakunapis qewano ushakaqlami.Munayniyuq kashqanpis waytano pasaqlami.Qewapis tsakinmi y waytapis shushunmi.
25 Tayta Diospa palabranmi itsanqa imayyaqpis kaykanqa”.*
Tsay palabratami Jesucristupa wilakuqninkuna wilapäshushqanki.
Ichic wilacuycuna
^ apóstol Apóstol ninanqa “wilakunanpaq kachashqan runa” ninanmi. Apostolkunataqa Jesucristumi kacharqan maytsaymanpis aywar wilakuyninta wilakunanpaq. Tsay apostolkunaqa karqan chunka ishkaymi. Jesucristo wanushqanpita kawarirkamurmi Pablutapis yuriparkur churarqan apóstol kananpaq (Mar. 3.14; Luc. 6.13-16; 1Cor. 9.1-2). Apostolkunatami Jesucristo nirqan Espíritu Santu shamur lapanta yachatsinanpaq kashqanta y Jesucristo yachatsishqanta yarpätsinanpaq kashqanta (Juan 14.25-26; 16.12-15). Tsaynöpami Jesucristupa apostolninkuna y paykuna autorizashqan runakuna Mushuq Testamentuta qelqapäkurqan.
^ reqiy, Diosta reqiy Tayta Diosta reqirqa payman yärakuntsi y pay munashqanno kawar kushikuntsi. Tsaynöpis tantiyantsi kuyakuq kashqanta, munayniyuq kashqanta, jutsaynaq santu kashqanta, juzgakuq kashqanta, alilata ruraq kashqanta y promitishqanta imaypis cumpliq kashqanta.
^ 1.3 Juan 3.3-7; 1Ped. 1.23.
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ 1.8 Juan 20.29.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 1.16 Lev. 11.44-45; 19.2.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ 1.22 Wakin qepa kaq griego copiakunaqa Espïritupa yanapayninwan nirmi yapapäkun.
^ 1.23 Juan 3.3-7; 1Ped. 1.3.
^ 1.24-25 Isa. 40.6-8.
