1 Reyes 14:1-31
14 Tsay witsanmi Jeroboampa tsurin Abías antsa jitaraykarqan.
2 Tsaymi Jeroboamqa warminta kayno nirqan: “Warmï kashqaykita pipis mana tantiyananpaq jukniraq röpata jatikuy. Nirkur ayway Silo markacho kaykaq profëta Ahíasman. Paymi nimarqan kay nacionpa mandaqnin rey kanäpaq.
3 Paypaq chunka tantata, tortillakunata y puyñuwan abëjapa mishkinta apakurkur ayway. Tsaykunata qoykur tapunki wamrantsi aliyänanpaq o antsänanpaq kashqantapis”.
4 Tsayno niptin Jeroboampa warmin Silo markaman runan yätsishqannöla aywarmi chayarqan profëta Ahíaspa wayinman. Ahíasqa pasaypa awkinna karmi manana reqikurqannatsu.
5 Tsawraqa Ahíasta TAYTA DIOS kayno nirqan: “Jeroboampa warminmi mana reqinaykipaq jukniraq röpan jatishqa shamunqa. Paymi qeshyaykaq wamranpaq tapukushunkipaq. Chayamuptin yätsishqänöla ninki”.
6 Tsawraqa tsay warmi chayaykuptin Ahías kayno nirqan: “Pasakalämuy, Jeroboampa warmin. ¿Imanirtaq pipis mana reqishunaykipaq jukniraq röpata jatikurkur shamushqanki? TAYTA DIOSMI nimashqa pasaypa desgracia pasashunaykipaq kashqanta.
7 Tsawraqa kaypita kutiykur runayki Jeroboamta wilanki Israel runakunata kuyaq TAYTA DIOS kayno nishqanta: ‘Qamtami akrarkur churashqä Israel runakunapa mandaqnin rey kanaykipaq.
8 Tsayno churarmi Davidpita miraqta jorqushqä Israel nacionpa mandaqnin rey kaykashqanpita. Mandaq rey kanaykipaq churaykaptïpis qamqa manami sirvimaqnï rey Davidnötsu mandamientükunata y leynïkunata lapan shonquykiwan cumplishqanki.
9 Cäsukamänaykipa trukanqa manakaqman churamar runa fundishqan ïdulukunata adorashpaykimi pasaypa rabyanätsimashqanki. Tsayno rurarqa wakin reykunapita mas peormi jutsata rurashqanki.
10 “ ‘Tsayta rurashqaykipitami kananqa qampita miraq lapan olqu kaqkunata ushakätsishaq, ashmay kaptinpis o mana ashmay kaptinpis.* Noqaqa qanrakunata jitaqnömi paykunata elqätsishaq.
11 Markacho wanuqkunataqa alqukunami mikunqa. Markapita juk läducho wanuqkunataqa wiskulkunami y condorkunami mikunqa’ ”.
Tsayno nirkushpanmi Ahías kayno nirqan: “Tsayno pasananpaq kashqantaqa kikin TAYTA DIOSMI nimashqa”.
12 Tsayno wilaparkurmi Jeroboampa warminta Ahías kayno nirqan: “Qamqa markaykipa jukla kutikuy. Markaman yaykuykaptikimi wawayki wanunqa.
13 Lapan Israel runakunami lakikushpan waqar payta pampapäkunqa. Jeroboampa lapan tsurinkunapita tsay wamra japalanmi Israel runakunata kuyaq TAYTA DIOS munashqanno kawashqa. Tsaymi Jeroboampa tsurinkunapita paylata tsayno pampapäkunqa.
14 Tsaypita juk reytanami TAYTA DIOS churanqa Israel runakunata mandananpaq. Paymi Jeroboampita miraqkunata lapanta ushakätsinqa. Lapan tsay nishqäkunaqa kanan junaqmi cumpliyta qalaykuykan.
15 “*Asera diösapaq jawishqan raku qerukunata adorar TAYTA DIOSTA Israel runakuna pasaypami rabyanätsin. Tsaymi fiyupa castigar paykunata qarqunqa unay aylunkunata qoykushqan ali nacionpita Éufrates mayu mas washa lädunyaq.
16 Tsayno qarqunqa Jeroboam jutsata rurar Israel runakunatapis jutsata ruratsishqanpitami”.
17 Tsayno wilaykuptinmi Jeroboampa warmin kutikurqan tashqan Tirsa markaman. Wayinman yaykuykaptinmi wawan pasarpurqan.
18 Tsawraqa TAYTA DIOSPA sirviqnin profëta Ahías wilakushqannölami Israel runakuna waqar Jeroboampa tsurinta pampapäkurqan.
19 Jeroboam guërrata rurashqankuna y Israel runakunata lapan mandashqankunapis Israel nacionpa mandaqnin reykunapa acta librunchömi qelqaraykan.
20 Ishkay chunka ishkay (22) watami Israel runakunapa mandaqnin rey Jeroboam karqan. Pay wanuykuptinnami tsurin Nadabna rey karqan.
Judá nacioncho Roboam rey kashqan
2 Crónicas 12.1-16
21 Judáchöqa Salomónpa tsurin Roboammi rey kaykarqan. Mandayta qalaykushqan witsan chusku chunka juk (41) watayuqmi kaykarqan. TAYTA DIOS akrashqan Jerusalénpita chunka qanchis watami mandarqan. Israel runakunapa lapan trïbunkunacho kaykaq markakunapitami Jerusalénta TAYTA DIOS akrarqan payta tsaycho adorapäkunanpaq. Roboampa mamanpa jutinmi karqan Naama. Paymi karqan Amón nacionpita.
22 Roboam rey kashqan witsanmi TAYTA DIOSTA mana cäsukur Judá runakuna jutsata rurapäkurqan unay aylunkunapita mas peor.
23 Tsaymi jirkankunachöpis y copösu yörakuna sikinchöpis wankakunata ichirkatsir y *Asera diösapaq raku qerukunata jawirkur *altarkunata sharkatsipäkurqan.*
24 Tsaychömi diosninkunata adorar runakunapis y warmikunapis altarkuna kashqancho jukwan jukwan kakuq.* Tsaynöpami TAYTA DIOS unay qarqushqan mana Israel runakunanöla pasaypa melanaypaq jutsata rurapäkurqan.
25 Roboam pitsqa wata rey kaykaptinmi Egiptupa mandaqnin rey Sisac soldädunkunawan Jerusalénman aywarqan atacananpaq.*
26 Markaman yaykurmi TAYTA DIOSPA templunpita y reypa palaciunpita lapan tesörunkunata apakärirqan. Tsaynöpis apakärirqan rey Salomón ruratsishqan qori escüdukunata.*
27 Apakushqan escüdukunapa trukantami broncipitana escüdukunata Roboam ruratsirqan. Nirkurmi palaciu punku täpaq soldädukunapa mandaqninkunata entregarqan.
28 Templuman rey aywaptinmi soldädunkuna payta imaypis yanaqarqan tsay escüdunkuna aptashqa. Palaciunman rey kutiykuptinnami soldädukunaqa tsay escüdukunata sälaman kutitsipäkuq.
29 Roboam imata rurashqankunapis lapanmi qelqaraykan Judá nacionpa mandaqnin reykunapa acta libruncho.
30 Roboam mandashqan witsanmi Jeroboamwan chikinakur guërrata imaypis rurapäkuq.
31 Roboam wanuykuptinmi *Davidpa Markancho unay aylunkuna pamparaykashqan kaqman pampapäkurqan. Roboampa mamanmi karqan Amón nacionpita Naama. Roboampa trukanmi tsurin Abiamna rey karqan.
Ichic wilacuycuna
^ 14.10 1Rey. 15.29.
^ Asera Aseraqa cananeo runakuna adorashqan diösami karqan. Paykunaqa yarpapäkurqan tsay diösa imatapis miratsiq kashqantami. Aserata adorananpaqmi raku qerukunata jawipäkuq. Cananeo runakunaqa yarpapäkurqan tsay jawishqan qerukunacho Asera kashqantami (Éxo. 34.13; Deut. 7.5; 12.3; 16.21; 1Rey. 16.33; 18.19; 2Rey. 13.6).
^ Asera Aseraqa cananeo runakuna adorashqan diösami karqan. Paykunaqa yarpapäkurqan tsay diösa imatapis miratsiq kashqantami. Aserata adorananpaqmi raku qerukunata jawipäkuq. Cananeo runakunaqa yarpapäkurqan tsay jawishqan qerukunacho Asera kashqantami (Éxo. 34.13; Deut. 7.5; 12.3; 16.21; 1Rey. 16.33; 18.19; 2Rey. 13.6).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 14.23 2Rey. 17.9-10.
^ 14.24 Deut. 23.17.
^ 14.25 2Crón. 12.2-8.
^ 14.26 1Rey. 10.16-17; 2Crón. 9.15-16.
^ Davidpa Markan Davidpa Markanqa manami David yurishqan Belén markatsu karqan, sinöqa Sión jirkancho kaykaq Jerusalén markami. Tsayno jutin karqan jebuseo runakunata tsaypita David qarqushqa kaptinmi (2Sam. 5.6-7). Tsaychömi reypa palaciunta y templuta sharkatsipäkurqan. Jerusalén marka jatunyaptinpis Sión jirkancho kaykaq partilatami Davidpa Markan kashqanta nipäkun.
