1 Reyes 15:1-34
15 Nabatpa tsurin Jeroboam chunka pusaq wata Israel nacioncho rey kaykaptinmi Judá nacioncho Abiam rey kayta qalaykurqan.
2 Jerusaléncho rey karqan kimsa watami. Mamanmi karqan Abisalompa tsurin Maaca.
3 Rey Abiamqa manami unay aylun Davidnötsu TAYTA DIOSTA lapan shonqunwan cäsukurqan, sinöqa papänin jutsata rurashqannömi jutsata rurarqan.
4 Tsayno kaptinpis Davidta kuyashqa karmi Abiamta TAYTA DIOS mana qarqurqantsu rey kashqanpita.* Tsaynölami Abiam wanuptin tsurintana TAYTA DIOS churarqan Jerusaléncho rey kananpaq.
5 Rey Davidqa TAYTA DIOS munashqanno kawarmi lapan mandamientunkunata cumplirqan. Itsanqa Davidpa jutsan karqan Betsabéwan kakur runan Uríasta wanutsishqanmi.
6 Jeroboamwan Roboam chikinakur cadala guërrata rurashqannömi Abiampis Jeroboamwan imaypis guërrata rurapäkuq.
7 Abiam imata rurashqankunapis lapanmi qelqaraykan Judá nacionpa mandaqnin reykunapa acta libruncho.
8 Abiam wanuykuptinmi *Davidpa Markanman pampapäkurqan. Paypa trukannami tsurin Asana rey karqan.
Judá nacioncho Asa rey kashqan
2 Crónicas 14.1-5; 15.16-19
9 Jeroboam ishkay chunka (20) wata Israel nacioncho rey kaykaptinmi Judá nacioncho Asa rey kayta qalaykurqan.
10 Asami Jerusaléncho rey karqan chusku chunka juk (41) wata. Paypa awilanmi karqan Abisalompa tsurin Maaca.
11 Rey Asami itsanqa unay aylun Davidno TAYTA DIOS munashqanno kawarqan.
12 Tsay witsanmi wakin runakuna y warmikuna diosninkunata adorar *altarkuna kashqancho jukwan jukwan kakuq. Tsay runakunata y warmikunatami Judá nacionpita rey Asa qarqurqan. Tsaynölami taytan, awkilun y awkilunpa taytan ruratsishqan ïdulukunatapis lapanta ushakätsirqan.*
13 *Asera diösapaq awilan Maaca jawitsishqan qerutapis Cedrón raqraman apaykurmi rupatsirqan. Nirkurmi tsay ïduluta ruratsishqanpita Maacatapis reina kashqanpita qarqurqan.
14 Tsayno rurarpis markakunacho kaykaq altarkunataqa Asa manami juchutsirqantsu. Asaqa wanunanyaqmi TAYTA DIOS munashqanno kawarqan.
15 Tsaynölami papäninpis y kikinpis TAYTA DIOSPAQ rakishqankunata templuman aparqan qorita, qellayta y alhäjakunata.
Rey Ben-adadwan rey Asa parlakushqan
2 Crónicas 16.1-10
16 Israel runakunapa mandaqnin rey Baasawan rey Asa guërrata cadala rurapäkuq.
17 Tsaymi rey Baasa Judá nacioncho kaykaq Ramá markata vincirkur tsay markaman soldädunkunata churarqan Judápita tsayman pipis mana yaykunanpaq ni tsaypita Judáman pipis mana yarqunanpaq.
18 Tsaymi Asaqa TAYTA DIOSPA wayincho y palaciuncho churaraykaq qorita y qellayta jorqurir Siria nacionpa mandaqnin rey Ben-adadman apatsirqan. Ben-adadqa karqan Tabrimónpa tsurin y Heziónpa wilkanmi. Payqa Damascuchömi taykarqan. Apatsirmi encargakurqan kayno ninanpaq:
19 “Rey Asami kayno nishunki: ‘Pipis atacaptin taytaykiwan taytä yanapanakunanpaq *pactuta rurashqanno noqantsipis yanapanakunantsipaq pactuta rurashun. Tsaymi yanapamänaykipaq apaykätsimü qorita y qellayta. Tsaynöpis manana atacamänanpaq Israel nacionpa mandaqnin rey Baasata ama yanapaynatsu’ ”.
20 Tsayno manakuptinmi rey Ben-adad awnishpan soldädunkunata y capitanninkunata kacharqan Israel nacioncho kaykaq markakunata atacananpaq. Atacarmi acapararqan Ijón, Dan y Abel-bet-maaca markakunata, Cineret particho kaq markakunata y Neftalí particho kaq markakunatapis.
21 Tsay markakunata atacashqanta musyaykurmi rey Baasaqa Ramá markacho cuartilta sharkatsinanpaq shuntatsishqankunata kachariykur Tirsaman kutikärirqan.
22 Tsaymi rey Asaqa lapan Judá runakunata Ramáman qayatsirqan. Chayaptinmi Ramá markata corralaraq rumikunata y qerukunata apapäkurqan Benjamíncho kaykaq Geba y Mizpa markakunaman. Tsaykunawanmi tsay markakunata altsatsirqan.
Rey Asa wanushqan
2 Crónicas 16.11-14
23 Rey Asa rurashqankuna, guërrakunacho vincishqankuna y markakunata sharkatsishqankunapis lapanmi qelqaraykan Judá nacionpa mandaqnin reykunapa acta libruncho. Awkinna kaykarmi chaki nanaywan Asa qeshyarqan.
24 Asa wanuykuptinmi *Davidpa Markancho unay aylunkuna pamparaykashqan kaqman pampapäkurqan. Paypa trukannami tsurin Josafatna rey karqan.
Israel nacioncho Nadab rey kashqan
25 Ishkay watana Judá nacioncho Asa rey kaykaptinmi Israel nacioncho Jeroboampa tsurin Nadab rey kayta qalaykurqan. Nadabqa ishkay watalami rey karqan.
26 Paymi TAYTA DIOSTA mana cäsukur taytan Jeroboamno Israel runakunata jutsata ruratsirqan.*
27 Juk kutimi lapan Israel soldädunkunata shuntarkur Nadab aywarqan Filistea nacioncho kaykaq Gibetón marka runakunata atacananpaq. Tsayno atacar markata jiruruypa tsapaykaptinmi Ahíaspa tsurin Baasa contran sharkur Nadabta wanutsirqan. Baasaqa karqan Isacar trïbu runami.
28 Tsayno wanutsirqan Judá nacioncho kimsa wata Asa rey kaykaptinmi. Nirkur Baasanami Israel nacioncho rey karqan.
29 Rey kaykarnami Jeroboampita miraqkunataqa lapanta wanutsir usharqan. Lapanta tsayno wanutsirqan TAYTA DIOS nishqanta profëta Ahías Silucho wilakushqannölami.*
30 Tsayno pasarqan Israel runakunata kuyaq TAYTA DIOSTA Jeroboam rabyanätsishqanpitami. Tsayno rabyanätsirqan jutsata rurar y Israel runakunatapis jutsata ruratsirmi.
31 Rey Nadab wakin rurashqankuna qelqaraykan Israel nacionpa mandaqnin reykunapa acta librunchömi.
32 Israel runakunapa mandaqnin rey Asami rey Baasawan guërrata imaypis rurapäkuq.
Israel nacioncho Baasa rey kashqan
33 Judá nacioncho Asa kimsa watana rey kaykaptinmi Israel nacioncho Ahíaspa tsurin Baasa rey kayta qalaykurqan. Paymi Tirsa markapita Israel runakunata mandarqan ishkay chunka chusku (24) wata.
34 Baasaqa TAYTA DIOSTA mana cäsukurmi Jeroboamno Israel runakunata jutsata ruratsirqan.*
Ichic wilacuycuna
^ 15.4 1Rey. 11.36.
^ Davidpa Markan Davidpa Markanqa manami David yurishqan Belén markatsu karqan, sinöqa Sión jirkancho kaykaq Jerusalén markami. Tsayno jutin karqan jebuseo runakunata tsaypita David qarqushqa kaptinmi (2Sam. 5.6-7). Tsaychömi reypa palaciunta y templuta sharkatsipäkurqan. Jerusalén marka jatunyaptinpis Sión jirkancho kaykaq partilatami Davidpa Markan kashqanta nipäkun.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 15.12 2Crón. 15.8.
^ Asera Aseraqa cananeo runakuna adorashqan diösami karqan. Paykunaqa yarpapäkurqan tsay diösa imatapis miratsiq kashqantami. Aserata adorananpaqmi raku qerukunata jawipäkuq. Cananeo runakunaqa yarpapäkurqan tsay jawishqan qerukunacho Asera kashqantami (Éxo. 34.13; Deut. 7.5; 12.3; 16.21; 1Rey. 16.33; 18.19; 2Rey. 13.6).
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ Davidpa Markan Davidpa Markanqa manami David yurishqan Belén markatsu karqan, sinöqa Sión jirkancho kaykaq Jerusalén markami. Tsayno jutin karqan jebuseo runakunata tsaypita David qarqushqa kaptinmi (2Sam. 5.6-7). Tsaychömi reypa palaciunta y templuta sharkatsipäkurqan. Jerusalén marka jatunyaptinpis Sión jirkancho kaykaq partilatami Davidpa Markan kashqanta nipäkun.
^ 15.26 Ima jutsa kashqantapis musyanaykipaq liyinki 1Rey. 12.28-33.
^ 15.29 1Rey. 14.10-11.
^ 15.34 1Rey. 12.28-33.
