1 Reyes 16:1-34
16 Tsaymi Hananipa tsurin profëta Jehúta TAYTA DIOS nirqan Baasata kayno nir wilananpaq:
2 “Pipitapis mana cäsushqa kaykaptikimi qamta churarqä kuyashqä Israel runakunapa mandaqnin rey kanaykipaq. Tsayno churaykaptïpis qamqa Jeroboamnömi Israel runakunata shimita jatipashqanki jutsata rurapäkunanpaq. Tsayno rurarmi pasaypa rabyatsimashqanki.*
3 Tsaymi Nabatpa tsurin Jeroboamta ushakätsishqäno qamtapis y qampita miraqkunatapis ushakätsishaykipaq.
4 Markacho wanuqkunataqa alqukunami mikunqapaq. Markapita juk läducho wanuqkunataqa wiskulkunami y condorkunami mikunqapaq”.
5 Baasa rurashqankuna y guërrakunacho vincishqankuna lapanmi qelqaraykan Israel nacionpa mandaqnin reykunapa acta libruncho.
6 Baasa wanuykuptinmi Tirsa markacho pampapäkurqan. Paypa trukannami tsurin Elana rey karqan.
7 Jeroboamno y tsurinno TAYTA DIOSTA rabyanätsir jutsata rurashqanpita y Jeroboampa aylunkunata wanutsishqanpitami Hananipa tsurin profëta Jehú TAYTA DIOS tantiyatsishqanno Baasapa y aylunkunapa contran wilakurqan.
Israel nacioncho Ela rey kashqan
8 Judá nacioncho Asa ishkay chunka soqta (26) wata rey kaykaptinmi Baasapa tsurin Ela Tirsa markapita Israel runakunata mandayta qalaykurqan. Payqa ishkay watalami mandarqan.
9 Elapa soldädunkunapa juk capitannin karqan Zimri. Paymi guërra carrëtakunata pulanta munaynincho tsarararqan. Capitannin kaykarmi rey Elapa contran sharkurqan. Juk kutimi Tirsa markacho rey Ela palaciuta rikaq Arsapa wayincho upyaykarqan. Tsaycho pasaypa shinkashqa kaykaptinmi
10 Zimri chayaykur wanutsirqan. Nirkurmi kikinna rey karqan. Tsay pasarqan Judá nacioncho ishkay chunka qanchis (27) wata Asa rey kaykaptinmi.
11 Rey karnami Zimriqa Baasapa tsurinkunata, aylunkunata y amïgunkunata lapanta wanutsir usharqan. Manami juklaylapis olqukunaqa kawarqannatsu.
12 Lapanta tsayno wanutsirqan TAYTA DIOSPA wilakuqnin profëta Jehú wilakushqannölami.
13 Rey Baasapa contran Jehú tsayno wilakurqan Baasa y tsurin Ela jutsata rurapäkushqanpita y jutsata rurapäkunanpaq Israel mayinkunata shakyätsishqanpitami. Tsaynöpami ïdulukunata adorar Israel runakunata kuyaq TAYTA DIOSTA pasaypa rabyanätsirqan.
14 Ela imata rurashqankunapis lapanmi qelqaraykan Israel nacionpa mandaqnin reykunapa acta libruncho.
Israel nacioncho Zimri rey kashqan
15 Ishkay chunka qanchis (27) wata Judá nacioncho Asa rey kaykaptinmi Tirsa markacho Zimri rey kayta qalaykurqan. Itsanqa rey karqan qanchis junaqlami. Tsay junaqkunami Israel soldädukuna Filistea nacioncho kaq Gibetón markata atacaykarqan.
16 Tsaychömi Israel soldädukuna musyapäkurqan rey Elata wanurkatsir Zimrina paypa trukan rey kaykashqanta. Tsayta musyaykurmi jinan höra capitannin Omrita churapäkurqan rey kananpaq.
17 Tsayno churapäkuptinmi Omriqa Gibetón markata manana atacashpan lapan Israel soldädukunawan Tirsa markaman aywapäkurqan atacananpaq.
18 Zimriqa tashqan markata atacarkaykashqanta rikaykurmi palaciucho kaykaq törri rurinman yaykukuykurqan. Nirkurmi tsay törrita rupatsiptin kikintapis nina rupar usharqan.
19 Tsayno wanurqan TAYTA DIOSTA rabyanätsir jutsata rurashqanpitami. Ïdulukunata adorapäkunanpaq Israel runakunata Jeroboam shakyätsishqannömi Zimripis shakyätsirqan.*
20 Zimri rurashqankuna y Elapa contran sharkur wanutsishqanpis Israel nacionpa mandaqnin reykunapa acta librunchömi qelqaraykan.
Israel nacioncho Omri rey kashqan
21 Tsaypitanami Israel nacioncho wakin runakuna munapäkurqan Ginatpa tsurin Tibni rey kananta y wakinnami munapäkurqan Omri rey kananta.
22 Tsaymi Omripa favornin kaqkuna pelyar vincirqan Ginatpa tsurin Tibnipa favornin kaqkunata. Tibnita wanutsiptinmi Omrina paypa trukan rey karqan.
23 Judá nacioncho kimsa chunka juk (31) wata Asa rey kaykaptinmi Israel nacioncho Omri rey kayta qalaykurqan. Payqa chunka ishkay watami Israel runakunapa mandaqnin rey karqan. Soqta watami Tirsa markapita mandarqan.
24 Tsaypita juk markata sharkatsinanpaqmi Samaria jirkanta Semer runapita Omri rantirqan. Tsay jirkanta soqta chunka soqta (66) kïlu qellaywanmi rantirqan. Tsaycho markata sharkarkatsirmi jiruruypa corralatsirqan. Jirkanpa punta kaq duëñunpa jutin Semer kaptinmi tsay markapa jutinta churaparqan Samaria jutin kananpaq.
25 Omriqa TAYTA DIOSTA mana cäsukurmi punta kaq reykunapitapis mas peor jutsata rurarqan.
26 Nabatpa tsurin Jeroboam jutsata rurashqannömi paypis jutsata rurarqan. Tsaymi ïdulukunata adorapäkunanpaq Israel runakunata Jeroboam shakyätsishqanno shakyätsirqan. Tsaynöpami TAYTA DIOSTA pasaypa rabyanätsirqan.
27 Omri rurashqankuna y guërrakunacho vincishqankuna qelqaraykan Israel nacionpa mandaqnin reykunapa acta librunchömi.
28 Wanuykuptinmi pampapäkurqan Samaria markaman.
Israel nacioncho Acab rey kashqan
29 Judá nacioncho kimsa chunka pusaq (38) wata Asa rey kaykaptinmi Israel nacioncho Omripa tsurin Acab rey kayta qalaykurqan. Paymi Israel runakunata Samaria markapita mandarqan ishkay chunka ishkay (22) wata.
30 Acabqa TAYTA DIOSTA mana cäsukur punta kaq reykunapitapis mas peormi jutsata rurarqan.
31 Nabatpa tsurin Jeroboam jutsata rurashqannömi paypis jutsata rurarqan. Tsaynöpis Sidón runakunapa mandaqnin rey Et-baalpa tsurin Jezabelta jorqurqan warmin kananpaq. Tsaynölami *Baal diostapis adorarqan.
32 Tsaymi Baalpaq templuta y *altartapis Samariacho sharkatsirqan.
33 *Asera diösapaqpis qeruta jawitsirmi wakin kaq reykunapitapis masraq Israel runakunata kuyaq TAYTA DIOSTA rabyanätsirqan.
34 Acab mandaq kaykashqan witsanmi Bet-elcho taq Hiel jutiyuq runa Jericó markata yapay altsatsirqan. Cimientukunata perqayta qalaykuptinmi qechpa tsurin Abiram wanurqan. Marka punkuta tanarkatsiptinnami nunush kaq tsurin Segubna wanurqan. Lapanpis tsaykuna pasarqan Nunpa tsurin Josué nishqannölami.*
Ichic wilacuycuna
^ 16.2 1Rey. 12.28-33.
^ 16.19 1Rey. 12.28-33.
^ Baal Baalqa cananeo runakuna adorashqan diosmi karqan. Juk dios kashqanta yarpaptinpis manami rasunpatsu dios karqan. Cananeo runakuna yarpapäkurqan tsay diosta adoraptin uywankuna mirananpaq kashqanta y chakrankuna ali wayunanpaq kashqantami. Tsaynöpis yarpapäkurqan löcu tamyata y ali tamyatapis kachamushqantami.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ Asera Aseraqa cananeo runakuna adorashqan diösami karqan. Paykunaqa yarpapäkurqan tsay diösa imatapis miratsiq kashqantami. Aserata adorananpaqmi raku qerukunata jawipäkuq. Cananeo runakunaqa yarpapäkurqan tsay jawishqan qerukunacho Asera kashqantami (Éxo. 34.13; Deut. 7.5; 12.3; 16.21; 1Rey. 16.33; 18.19; 2Rey. 13.6).
