1 Reyes 21:1-29
21 Jezreel markapitami Nabot jutiyuq juk runa karqan. Paypa üva chakranmi karqan Samariapa mandaqnin rey Acabpa palaciun nawpancho.
2 Juk kutichömi Nabotta Acab kayno nirqan: “Huertäta ruranäpaq palaciü nawpancho kaykaq üva chakraykita alinnin kaq chakräwan trukaykushun. Qellaycho niptikiqa qellaychömi pägashayki”.
3 Tsayno niptinmi Nabot kayno nirqan: “TAYTA DIOS manami munantsu aylükunapita chaskishqä herenciata rantikunäta”.*
4 Tsayno niptinmi rey Acabqa fiyupa lakishqa y rabyashqa wayinpa kutikurqan. Chayaykurmi cämanman jitakakuykur perqa kaqpa tikrakurkurqan. Tsayno karmi mikuytapis mana munarqantsu.
5 Tsayno kaykaqta rikaykurmi warmin Jezabel tapurqan kayno nir: “¿Imapitataq lakishqa kaykanki? ¿Imanirtaq mikuytapis mana munankitsu?”
6 Tsawraqa Acab kayno nirqan: “Jezreelpita kaq Nabottami nishqä üva chakranta qellaychöpis o trukaypapis rantikamänanpaq. Tsayno niptïpis manami awnimashqatsu”.
7 Tsayno niptinmi warmin Jezabel kayno nirqan: “Israel nacionpa mandaqnin rey kaykarqa rabyanänaykipa trukan mikuyna. Nabotpa üva chakrantaqa noqami entregashayki”.
8 Nirkurmi juk cartata Acabpa jutincho Jezabel qelqarqan. Nirkurnami sëllunwan sëllarkur apatsirqan Nabotpa markan Jezreelcho taq mayor runakunaman y autoridäkunaman.
9 Tsay qelqashqan cartachömi kayno nirqan: “Lapayki juntakaykur ayunashpayki runakunapa nawpanman Nabotta jamatsinki.
10 Nirkurna ishkay lulakuq runakunata yachatsipäkunki Nabotpa contran kayno ninanpaq: ‘Kay runaqa Tayta Diospa contran y mandamaqnintsi reypa contranmi rimashqa’. Yachatsishqaykino manakaqta jitapaptin markapita juk läduman jorqurir Nabotta saqmaypa wanutsipäkunki”.
11 Cartacho Jezabel nishqannölami lapan autoridäkuna, mayor runakuna y marka runakuna rurapäkurqan.
12 Tsawraqa ayünuman juntakarkur lapan runakunapa nawpanman Nabotta jamatsirqan.
13 Tsaymanmi ishkay lulakuq runakunapis jamaykur Nabotta manakaqta jitapar lapan runakunapa nawpancho kayno nipäkurqan: “Kay runaqa Tayta Diospa contran y mandamaqnintsi reypa contranmi rimashqa”.
Tsayno nipäkushqanta mayaykurmi markapita juk läduman jorqurir saqmaykälar Nabotta wanutsipäkurqan.
14 Nirkurmi Jezabelta wilapäkurqan Nabotta saqmaypa wanutsishqanta.
15 Jezabel tsayta mayaykurmi runan Acabta kayno nirqan: “Üva chakranta rantikuyta mana munaq Nabot wanushqanami. Kananqa jukla aywaykur tsay chakrata tsariy”.
16 Nabot wanushqanta niptinmi Acabqa jukla aywashpan Nabotpa üva chakranta acapararqan.
17 Tsaymi Elíasta TAYTA DIOS kayno nirqan:
18 “Israel nacionpa mandaqnin rey Acabman ayway. Payqa Samariachömi kaykan. Kanan höraqa Nabotpa üva chakranta acaparaqmi aywashqa.
19 Chayaykur kayno ninki: ‘TAYTA DIOSMI kayno nin: ¿Imanirtaq Nabotta wanurkatsir üva chakranta qechushqanki? Tsayno rurashqaykipitami Nabotpa yawarninta alqukuna laqwashqanno qampa yawarnikitapis alqukuna laqwanqapaq’ ”.
20 Tsayno niptinmi Acabman Elías aywarqan. Payta rikaykurmi Acab kayno nirqan: “Conträ kaykarqa ¿imapaqtaq shamushqanki?”
Niptinmi Elías kayno nirqan: “TAYTA DIOSTA mana cäsukur lutankunalata ruraptikimi shamushqä.
21 TAYTA DIOSMI kayno nin: ‘Desgraciawanmi castigashayki. Tsaymi qampita miraq lapan olqu kaqkunata ushakätsishaq, ashmay kaptinpis o mana ashmay kaptinpis. Noqaqa paykunata ushakätsishaq qanrakunata ushakätsiqnömi.
22 Israel runakunata jutsata ruratsir rabyanätsimashqaykipitami Nabatpa tsurin Jeroboamta y Ahíaspa tsurin Baasata tsurintinta ushakätsishqäno qamtapis tsurintinta ushakätsishayki’.
23 Tsaynölami Jezabelpaqpis Tayta Dios kayno nin: ‘Jezreel marka murälla waqtanchömi Jezabelpa ayantapis alqukuna mikunqa’.*
24 “Tsaynölami markacho wanuq ayluykikunatapis alqukuna mikunqa. Markapita juk läducho wanuqkunatanami wiskulkuna mikupäkunqa”.
25 Acabnöqa manami pipis warmin nishqankunata cäsukur TAYTA DIOSTA rabyanätsirqantsu.
26 Tsaymi pasaypa jutsata rurar Acabqa amorreo runakuna adorashqan ïdulukunata adorarqan. Tsay ïdulukunata adorashqanpitami amorreo runakunata TAYTA DIOS Israel nacionpita qarqushqa karqan.
27 TAYTA DIOS nishqanta Elías wilaptinmi rey Acab röpanta rachirir qachqa röpata jatikurqan. Nirkurmi ayunashpan pasaypa lakikur tsay röpan jatishqala punurqan.
28 Tsaymi Elíasta TAYTA DIOS kayno nirqan:
29 “Acab lutanta rurashqanpita lakikuykashqanta ¿tantiyashqankiku? Tsayno lakikur perdonta manakamashqanpitami kawashqanyaqqa nishqä castïgukuna mana kanqaraqtsu. Pay wanurkuptin tsurin mandaq kaykaptinraqmi castïgukuna kanqa”.
Ichic wilacuycuna
^ 21.3 Tsay witsan chakrata rantirqa yupashqa watalapaqmi rantipäkuq. Tsaypitanami punta kaq duëñun shuntarqan. Nabot yapay shuntananta Acab mana munaptinmi rantikuyta mana munarqantsu. Tsaypita masta musyanaykipaq liyinki Lev. 25.23-28.
^ 21.23 2Rey. 9.36-37.
