1 Reyes 4:1-34
4 Salomónqa lapan Israel runakunapa mandaqnin reymi karqan.
2 Paypa yanapaqninkuna kaykunami karqan:Sadocpa tsurin Azaríasmi karqan cüra.
3 Sisapa tsurinkuna Elihoref y Ahíasmi karqan secretariun.Ahiludpa tsurin Josafatmi karqan Israelcho ima pasashqankunatapis qelqaq.
4 Joiadapa tsurin Benaíami karqan soldädukunapa capitannin.Sadoc y Abiatarmi karqan cürakuna.
5 Natánpa tsurin Azaríasmi karqan gobernadorkunapa mandaqnin.Natánpa tsurin Zabudmi karqan cüra y Salomónpa yätsiqnin.
6 Ahisarmi karqan palaciucho kaqkunata rikaq.Abdapa tsurin Adonirammi karqan faynacho aruqkunapa capataznin.
7 Intëru Israel nacionchömi Salomónpa chunka ishkay gobernadorninkuna karqan. Paykunami cada ünun watacho juk killayaq rey Salomónpaq, Salomónpa aylunkunapaq y yanapaqninkunapaq mikuyta kamaripaq.
8 Tsay gobernadorkunaqa kaykunami karqan:Ben-hurmi gobernador karqan Efraín jalqakunacho.
9 Ben-decarmi gobernador karqan Macazcho, Saalbimcho, Bet-Semescho, Elóncho y Bet-hanáncho.
10 Ben-hesedmi gobernador karqan Arubotcho, Socucho y intëru Hefer particho.
11 Ben-abinadabmi gobernador karqan intëru Dor provinciacho. Paypa warminmi karqan Salomónpa tsurin Tafat.
12 Ahiludpa tsurin Baanami gobernador karqan Taanaccho, Meguiducho y intëru Bet-seáncho. Bet-seán karqan Saretán cercancho y Jezreelpa uraqancho. Tsaynöpis gobernador karqan Bet-seánpita hasta Abel-meholayaq y Jocmeam washa lädunyaq.
13 Ben-gebermi gobernador karqan Galaadcho kaykaq Ramotcho. Paypa munayninchömi karqan Manaséspa tsurin Jair sharkatsishqan markakuna. Tsay markakunapis Galaadchömi karqan. Tsaynömi Basáncho Argob provinciapis paypa munaynincho karqan. Tsaychömi soqta chunka (60) corralashqa jatusaq markakuna karqan. Tsay markakunaman yaykuna punkunkunapa trancankuna karqan broncipita rurashqami.
14 Iddupa tsurin Ahinadabmi gobernador karqan Mahanaimcho.
15 Ahimaasmi gobernador karqan Neftalícho. Paypa warminmi karqan Salomónpa tsurin Basemat.
16 Husaipa tsurin Baanami gobernador karqan Asercho y Alotcho.
17 Parúapa tsurin Josafatmi gobernador karqan Isacar particho.
18 Elapa tsurin Simeimi gobernador karqan Benjamín particho.
19 Uripa tsurin Gebermi gobernador karqan Galaad particho. Galaad partitaqa amorreo runakunapa mandaqnin rey Sehón y Basáncho rey Ogmi munaynincho unay tsarararqan.
Tsaynöpis lapan gobernadorkunapa mandaqninmi juk gobernador karqan.
Salomón rïcu y yachaq kashqan
20 Judácho taq y Israelcho taq runakunaqa lamar kuchuncho aquyshanöraq yupaytapis mana atipaypaqmi karqan. Atska kaptinpis mikunanpaq y upunanpaq putsuy putsuymi karqan. Tsaynöpami lapanpis kushishqa kawapäkuq.
21 (5.1) Salomónpa munayninchömi karqan Éufrates mayupita hasta Filistea nacionpa lindërunyaq y Egipto nacionpa lindërunyaq.* Tsaycho taq runakuna lapanmi impuestuta pägapäkuq. Salomón kawashqanyaqqa lapanpis tsay runakuna paypa munayninchömi karqan.
22 (5.2) Salomónpaqqa cada junaq mikuyta shuntapäkuq soqta waranqa soqta pachak (6,600) kïlu alinnin kaq harinata, chunka kimsa waranqa ishkay pachak (13,200) kïlu corrienti kaq harinata,
23 (5.3) cëbashqa chunka törukunata, qewalawan uywashqa ishkay chunka (20) törukunata y pachak (100) uyshakunata. Tsaynöpis shuntapäkuq tukuy casta luychukunata, wera walpakunata y wera pätukunatapis.
24 (5.4) Éufrates mayupita inti jeqanan kaq lädupaqa Salomón mandarqan Tifsapita hasta Gazayaqmi. Tsaycho taq reykunaqa lapanpis karqan Salomónpa munayninchömi. Tsaynöpami pay mandashqan kaqkunachöqa ima guërrapis mana karqantsu.
25 (5.5) Salomón kawashqanyaqqa Judácho y Israelcho taq runakuna Danpita Beersebayaq kushishqami kawapäkurqan. Tsaymi üva yöranpa y hïgus yöranpa sikincho jawkala jamarparqan.
26 (5.6) Salomónpa carrëtankunata tsutaq chusku waranqa (4,000) cawallukunapaq ramädakunapis karqan. Cawallukunata muntaraq soldädukunapis karqan chunka ishkay waranqami (12,000).*
27 (5.7) Mana qonqaypami rey Salomónpaq y paypa mësancho mikuqkunapaqpis gobernadorkuna töcashqan killa trukanakuypa mikuyta apapäkuq. Tsaymi imapis mana pishiqtsu.
28 (5.8) Tsaynömi turnun chayamuptin carrëtata tsutaq cawallukunapaq y wakin cawallukunapaqpis cebädata y punshata apapäkuq.
29 (5.9) Tayta Diosmi Salomónta yachayta qorqan shumaq tantiyakuq kananpaq. Tsaymi sasa tantiyay kaqkunatapis payqa tantiyarqan.
30 (5.10) Salomónqa mas yachaq karqan Egiptucho taq yachaq runakunapita y inti jeqamunan läducho taq yachaq runakunapitapis.
31 (5.11) Pïmay runapitapis mas yachaq kaptinmi Etánpis payman mana tinkurqantsu. Etánqa Zerapita miraqmi karqan. Tsaynöpis mas yachaq karqan Maholpa tsurinkuna Hemánpita, Calcolpita y Dardapitapis. Pïmaypitapis mas yachaq kashqanqa maytsaychöpis musyakarqanmi.
32 (5.12) Kimsa waranqa (3,000) proverbiukunatami* Salomón qelqarqan.* Tsaynölami juk waranqa pitsqa (1,005) poesíakunatapis qelqarqan.
33 (5.13) Paymi tukuy casta jachakuna imano kashqantapis tantiyarqan. Tsaymi Líbanucho kaq jatusaq cedru qerukunapita y perqakunacho winamuq qewakunapitapis ali yachatsirqan. Tsaynölami yachatsirqan tukuy casta uywakunapita, päriqkunapita, pachalanpa y lätaypa puriqkunapita y pescädukunapitapis.
34 (5.14) Salomón shumaq yachaq kashqanta musyaykurmi maytsay nacionkunapitapis runakuna shamuq rimashqanta mayananpaq.
Ichic wilacuycuna
^ 4.21 Gén. 15.18; 2Crón. 9.26.
^ 4.26 1Rey. 10.26; 2Crón. 1.14; 9.25.
^ 4.32 Proverbiuqa walka palabralawan yätsikuymi kaykan.
^ 4.32 Prov. 1.1; 10.1; 25.1; Cant. 1.1.
