1 Reyes 6:1-38
6 Chusku wata Israel nacionpa mandaqnin rey Salomón kaykarmi Zif killacho* TAYTA DIOSPA wayinta sharkatsiyta qalaykurqan. Tsay killaqa wata qalaykunancho ishkay kaq killami karqan. Tsay watawanqa Israel runakuna Egiptupita yarqamushqan chusku pachak pusaq chunka (480) watanami cumplirqan.
2 TAYTA DIOSPAQ rey Salomón sharkatsishqan templupa largun karqan ishkay chunka qanchis (27) metru. Anchunmi karqan isqun metru y altunnami karqan chunka kimsa pulan (13.5) metru.
3 Templupa anchunnölami alarninpa largunpis karqan isqun metru. Anchunnami karqan chusku metru pulan.
4 Salomónqa templupa ventänankunatapis rejïllayuqtami ruratsirqan.
5 Tsaynöpis templuman laqaylapami cuartukunata tumariq ruratsirqan.
6 Tsay cuartukunaqa ishkay altusyuqmi karqan. Patsa kaq cuartukunapa anchunmi karqan ishkay metru ishkay chunka pitsqa centïmetru. Altuscho kaq cuartukunapa anchunmi karqan ishkay metru qanchis chunka centïmetru. Janan kaq altuscho kaq cuartukunapa anchunnami karqan kimsa metru 15 centïmetru. Cuartukunata sharkatsinanpaqmi templu waqtan perqata sharkatsirqan patakkunata rurapaylapa. Tsay patakkunamannami churarqan cuartukunapa terrädunkunata. Tsaynöpami templupa perqanta mana uchkutsirqannatsu.
7 Templuta sharkatsinanpaqqa laqlashqalatanami rumikunata apamurqan. Tsaymi templuta sharkatsishpan martilluwan, cincilwan ni ima herramientawanpis mana takarqantsu.
8 Patsa kaq cuartukunaman yaykuna punkumi karqan templupa alawqa kaq nawpancho. Altuscho y janan kaq altuscho kaq cuartukunaman witsänanpaqmi tumaypa tumaypa escalëra karqan.
9 Templupa perqankunata sharkarkatsirnami terrädukunata churatsirqan. Nirkurmi terrädu rurinpa entablatsirqan cedru tablakunawan.
10 Templuman laqaypa ruratsishqan cuartukunapa cada pïsupa altunnin karqan ishkay metru ishkay chunka pitsqa centïmetru. Tsay cuartukunaqa templuman laqararqan cedru terrädukunawanmi.
11 Tsaymi Salomónta TAYTA DIOS kayno nirqan:
12 “Estatütükunata, leynïkunata y mandamientükunata cumpliptikiqa noqapis cumplishaqmi taytayki Davidta promitishqäta. Tsaymi sharkatsishqayki templucho
13 Israel runakunawan tar paykunata imaypis mana kacharishaqtsu”.
14 Tsaynömi Salomónqa templuta sharkatsiyta usharqan.
15 Templu rurin perqatami terrädupita pampayaq entablatsirqan cedru tablakunawan. Pïsuntanami entablatsirqan ciprés tablakunawan.
16 Templu rurincho Lugar Santïsimu kananpaqnami* rakirqan isqun metru larguta. Tsay cuartupa perqantapis cedru tablawanmi entablatsirqan terrädupita pampayaq.
17 Lugar Santïsimupita punkuyaq karqan chunka pusaq metrumi.
18 Lapan templu rurintami cedru tablakunawan entablatsirqan. Tsaymi perqashqan rumikunaqa mana rikakarqantsu. Tsay tablakunamanmi calabäzakunata y tukturaykaq waytakunata iskupulluwan laqlaypa dibujatsirqan.
19 Templu rurincho Lugar Santïsimuta Salomón ruratsirqan tsayman TAYTA DIOSPA *Pactu Babulninta churananpaq.
20 Lugar Santïsimupa largunmi karqan isqun metru, anchunmi karqan isqun metru y altunninnami karqan isqun metru. Lugar Santïsimupa perqanman kuchupita kuchuyaq qoriwanmi enchapatsirqan. Tsaynölami cedrupita ruratsishqan *altartapis qoriwan enchapatsirqan.
21 Tsaynölami Lugar Santïsimuman yaykuna cuartupa perqankunatapis kuchupita kuchuyaq qoriwan enchapatsirqan. Lugar Santïsimuman yaykuna punkupa jukaq kuchunpita jukaq kuchunyaqmi qori cadinata watarkurqan.
22 Tsaynölami lapan templu rurinta y Lugar Santïsimucho kaykaq altarta qoriwan enchapatsirqan.*
23 Nirkurmi olïvu qerupita ishkay *querubinkunata ruratsirqan Lugar Santïsimuman ichitsinanpaq. Tsay querubinkunapa altunmi karqan chusku metru pulan.
24 Cada älankunami karqan ishkay metru ishkay chunka pitsqa centïmetru. Tsaymi jukaq äla puntanpita jukaq äla puntanyaq karqan chusku metru pulan.
25 Tsaynölami jukaq querubinpa älankunapis chusku metru pulan karqan. Tsaymi ishkanpis tsay tamäñula y tsay niraqla karqan.
26 Ishkanpapis tamäñunkuna karqan chusku metru pulanmi.
27 Tsay ishkan querubinkunatami Lugar Santïsimu cuartuman Salomón churatsirqan. Ichirkatsiptinmi jukaq querubinpa älan töparqan perqaman y jukaq querubinpa älan töparqan jukaq lädu perqaman. Jukaq älankunanami Lugar Santïsimu chawpincho töpanakurqan.
28 Tsay querubinkunatami qoriwan Salomón enchapatsirqan.*
29 Lugar Santïsimupa perqankunaman y Lugar Santïsimuman yaykuna cuartupa perqankunamanpis querubinkunata, waytakunata y palmakunata iskupulluwan laqlaypa dibujatsirqan.
30 Tsaynölami ishkan cuartukunapa pïsunkunatapis qoriwan kuchupita kuchuyaq enchapatsirqan.
31 Lugar Santïsimuman yaykunan punkunkunatapis olïvu qerupitami ruratsirqan. Tsay punkupa numbralninkuna y quiciunkuna karqan pitsqa esquïnayuqmi.
32 Olïvu qerupita ruratsishqan ishkan punkukunachömi iskupulluwan laqlaypa dibujatsirqan querubinkunata, waytakunata y palmakunata. Tsaykuna jananpami qoriwan enchapatsirqan.
33 Tsaynölami templu punkupa quiciunkunatapis olïvu qerupita cuadrädu listonkunata ruratsirqan.
34 Templu punkupa ishkan höjankunataqa ciprés qerupitami kushpiyuqta ruratsirqan.
35 Tsay punkukunamanpis querubinkunata, waytakunata y palmakunatami iskupulluwan laqlaypa dibujatsirqan. Tsaykunatapis qoriwanmi enchapatsirqan.
36 Templupa ruri kaq patiuntapis kimsa hilëra laqlashqa rumikunawan y juk hilëra cedru tablonkunawanmi corralatsirqan.
37 Chusku watana mandaq kaykarmi Zif killacho Salomónqa TAYTA DIOSPA templunta sharkatsinanpaq cimientu churatsiyta qalaykatsirqan.
38 Chunka juk watana rey kaykarmi Bul nishqan killacho Salomónqa TAYTA DIOSPA templunta sharkatsiyta usharqan. Tsay killaqa karqan watacho pusaq killa kaqmi.* Templuta Salomón sharkatsirqan imanöpis sharkatsinanpaq yarpachakushqannölami. Templu aruyta ushatsirqan qanchis watachömi.
Ichic wilacuycuna
^ 6.1 Zif killaqa pulan abrilpita pulan mäyuyaqmi karqan.
^ 6.16 Éxo. 26.33-34.
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ querubín Querubinqa älayuq angilkunami karkaykan. Querubinkunatami Tayta Dios churarqan Edén huertata täpananpaq (Gén. 3.24). Tsaynölami Pactu Babulpa tsapanan jananchöpis qoripita rurashqa ishkay querubinkuna ichiraykarqan (Éxo. 25.18-22; Heb. 9.5). Salomón ruratsishqan templuchöpis ishkay querubinkunami qoriwan enchapashqa karqan. Tsay querubinkunapa altunmi karqan chusku metru pulan (1Rey. 6.23-29). Profëta Ezequielpis revelacionchömi querubinkunata rikarqan (Eze. 10.1-22; 41.18-19).
^ 6.23-28 Éxo. 25.18-20.
^ 6.38 Bul killaqa pulan octubripita pulan noviembriyaqmi karqan.
