1 Reyes 7:1-51
7 Tsaynölami wayikunatapis Salomón sharkatsirqan. Tsay wayikunata sharkatsiyta usharqan chunka kimsa watacho.
2 Juk wayinpa jutinmi karqan Líbano Munti. Tsay wayinpa largun karqan chusku chunka pitsqa (45) metru, anchunnami karqan ishkay chunka ishkay metru pulan (22.5) y altunnami karqan chunka kimsa metru pulan (13.5). Cedrupita rurashqa terrädukunata chusku fïla tushakunami tuknararqan.
3 Tsay terrädukuna karqan chusku chunka pitsqa (45). Tsaykunatami tushakunaman churatsirqan kimsa fïlata. Tsaymi cada fïlacho karqan chunka pitsqa terrädukuna. Nirkurmi cedru tablakunawan terrädu rurinpa entablatsirqan.
4 Tsaynölami kimsa hilëra ventänakunatapis frenti frenti kananpaq ruratsirqan. Cada hilëracho kimsa ventänakunami karqan.
5 Lapan punkukunapis y ventänakunapis kimsa fïla frenti frenti cuadrädumi karqan.
6 Tsaynölami juk alartapis tushakunawan ruratsirqan. Tsay alarpa largun karqan ishkay chunka ishkay metru pulan (22.5) y anchunna karqan chunka kimsa metru pulan (13.5). Tsay alarpa punku yaykunanchöpis tushakunawanmi juk alarta ruratsirqan.
7 Tsaynölami demandukunata arreglananpaq despächunta ruratsirqan. Tsay despächunpa perqankunatapis cedru tablakunawanmi entablatsirqan.
8 Täkunan palaciutapis despächun niraqlatami ruratsirqan. Tsay palaciuqa patiuyuqmi karqan. Tsaynölami Faraónpa tsurin kaq warmin* tänanpaqpis palaciuta patiuyuqta ruratsiparqan.
9 Tsaykunataqa Salomón ali rumikunalawanmi ruratsirqan cimientupita hasta perqa ushananyaq y jatun patiuyaq. Tsay rumikunataqa kamakänanpaqmi tupu tupuykur shumaq laqlapäkurqan.
10 Wayikunapa, alarpa y despächupa cimientunkunapis jatusaq ali rumikunawan perqashqami karqan. Tsay rumikuna wakinqa karqan chusku metru pulan y wakinnami karqan kimsa metru pulanpita maslan.
11 Lapantapis perqatsirqan tupu tupuykur laqlashqa ali rumikunawanmi. Tsay rumikuna jananmanmi cedru qerukunata churatsirqan.
12 Intëru kuchunta tumariqmi jatun patiuta kimsa hilëra rumikunawan y juk hilëra cedru tablakunawan corralatsirqan. Tsay corralatsishqan perqakunaqa templupa ruri kaq patiunta corralatsishqan perqakunanömi karqan. Tsaynöpis templuman yaykuna alarpa perqankunanömi karqan.
Hiramta Salomón minkakushqan
2 Crónicas 2.13-14; 3.15-17
13 Rey Salomónmi Tiro markacho taq Hiramta minkakurqan arupänanpaq.
14 Hirammi karqan Neftalí trïbu viüdapa wawan. Hirampa papäninmi karqan Tiro markapita bronci fundiyta yachaq. Tsaymi Hiramqa broncipita imatapis shumaq ruraq. Rey Salomón qayatsiptin aywaykurmi nishqankunata lapanta ruraparqan.
15 Hiramqa broncipita fundirqan ishkay jatusaq columnakunata. Tsay columnakuna karqan pusaq metru largun y tumariq tupuptin karqan pitsqa metru pulan.
16 Tsaynölami columna jananman churananpaqpis broncipita adornukunata rurarqan. Tsay adornukunami karqan ishkay metru juk cuarta altu.
17 Cada columnapa adornunman churananpaqmi qanchis cadinakunata rurarqan. Tsay cadinakunaqa tukupa nawinno rurashqami karqan.
18 Tsaynölami columnakunapa adornuncho warkaränanpaq granäda frütakunatano ishkay fïlata rurarqan.
19 Columnakuna ushanancho kaq adornukunaqa liriu wayta niraqmi karqan. Tsay adornukunapa tamäñun karqan ishkay metrunömi.
20 Tsaynöpis cada adornupa jana läduncho intëru kuchunpa ishkay pachak (200) granädakunatano ishkay fïlata rurarqan. Tsaykuna cadina nawpancho kar adornu mas anchu kaq partichömi warkararqan.
21 Tsay columnakunata templu punkuman ichirkatsirmi alawqa kaq läducho kaqpa jutinta Hiram churaparqan Jaquín jutin kananpaq y itsuq kaq läducho kaqpatanami churaparqan Boaz jutin kananpaq.*
22 Columnakunapa adornunkuna karqan liriu wayta pashtaraykaqno. Tsaynömi columnakunata rurayta usharqan.
Templupa manëjunkunata rurashqan
2 Crónicas 4.1—5.1
23 Tsaynöpis yakuta shuntananpaq Hiram rurarqan broncipita fundiypa lamar nishqan jatunkaray redondu lavatoriuta. Tsay lavatoriupa anchun karqan chusku metru pulan. Altunnami karqan ishkay metru 25 centïmetru. Kuchunta tumariq tupuptinmi karqan chunka kimsa metru pulan (13.5).
24 Lavatoriupa shimin ura lädunpami ishkay fïla tumariq broncipita rurashqa calabäzakuna karqan. Cada pulan metruchömi chunka calabäzakuna karqan. Tsay calabäzakuna lavatoriuwan juk piëzalami karqan.
25 Tsay lavatoriutami jamatsirqan chunka ishkay broncipita rurashqa törukuna jananman. Kimsa törukuna rikaraykarqan inti jeqamunan kaq lädupa, kimsa kaqna rikaraykarqan inti jeqanan kaq lädupa, kimsa kaqna rikaraykarqan norti kaq lädupa y kimsa kaqna rikaraykarqan sur kaq lädupa. Tsay törukunaqa lapanpis siki sikimi karqan. Lavatoriunami törukunapa janancho jamaraykarqan.
26 Tsay lavatoriuqa pusaq centïmetru raktami karqan. Shiminqa karqan liriu wayta pashtaraykaq niraqmi. Tsay lavatoriuman yaku juntaq chusku chunka chusku waranqa (44,000) litrumi.
27 Tsaynöpis broncipita rurarqan chunka carrëtakunata. Carrëtakunapa largun y achun karqan ishkay metru 80 centïmetru y altunnami karqan juk metru 35 centïmetru.
28 Tsay carrëtakunata rurananpaqqa marcuta ruraykur lädunkunapa traviskunata churarqan.
29 Carrëtakunapa chuskun lädunpami leonkunata, törukunata y *querubinkunata iskupulluwan laqlaypa dibujarqan. Törukuna y leonkunapa janaqanpa y uraqanpami waytakunata iskupulluwan laqlaypa dibujarqan.
30 Cada carrëtapami karqan broncipita rurashqa chusku ruëdankuna. Ruëdankunapa ëjinkunapis broncipitami karqan. Carrëtakunapa chusku esquïnanchömi lavatoriupa chakinkuna karqan. Chakinkunachömi waytakunata laqlaypa dibujarqan.
31 Carrëtapa shiminpis karqan lavatoriu mana tikwakänanpaq. Tsay shiminmi carrëtapita yarqurarqan chusku chunka pitsqa (45) centïmetru. Tsaynölami shiminpis ruyru karqan. Carrëtapa altunmi karqan soqta chunka pusaq (68) centïmetru. Shimincho tumariqmi dibüjukuna karqan. Itsanqa carrëtapa shimin manami redondutsu karqan, sinöqa cuadrädumi.
32 Chuskun ruëdankunaqa ëjimanmi sigurararqan. Ëjinkunaqa carrëtawan tsay piëzalami karqan. Cada ruëdapa altunmi karqan 68 centïmetru.
33 Ruëdankunapis carrëtapa ruëdannömi ëjiyuq, äruyuq, räyuyuq y cübuyuq karqan. Lapanpis karqan broncipita fundishqami.
34 Chuskun esquïnancho rinrinkunapis carrëtawan tsay piëzalami karqan.
35 Carrëtapa janancho kaq rebëtin ishkay chunka ishkay (22) centïmetru altumi tumariq ruyru yarqurarqan. Rebëtinpis y cajonninpis tsay piëzalami karqan.
36 Tsay cajonpa tablërunkunamanmi Hiramqa jäkuraqninman iskupulluwan laqlaypa dibujarqan querubinkunata, leonkunata y palmakunata. Tsaynölami waytakunatapis tumariq dibujarqan.
37 Tsay chunka carrëtakunataqa tsay tamäñulata y tsay niraqlatami fundiypa rurarqan.
38 Tsaynölami rurarqan broncipita chunka lavatoriukunatapis. Cada lavatoriupa tamäñunmi karqan juk metru mas pusaq chunka (80) centïmetru. Cada lavatoriumanmi yaykuq pusaq pachak pusaq chunka (880) litru yaku. Tsay lavatoriukunatami jamatsirqan ruratsishqan carrëtakunaman.
39 Nirkurmi pitsqa carrëtakunata churarqan templupa alawqa kaq nawpanman y pitsqa carrëtakunata churarqan templupa itsuq kaq nawpanman. Lamar nishqan jatun lavatoriutana churarqan templupa alawqa kaq nawpanman. Lapanpis inti jeqamunan kaq läduchömi karqan.
40 Tsaynöpis Hiram rurarqan mankakunata, tenäzakunata y tazonkunata.
Salomón minkakushqannölami Hiramqa TAYTA DIOSPA templuncho kananpaq lapanta rurarqan.
41 Tsay rurashqankuna kaynömi karqan:ishkay columnakuna,columnakunapa puntancho adornunkuna,columnakunapa cada adornuncho tukupa nawintano rurashqa ishkay adornukuna,
42 tsay adornupita waqiraykaq chusku pachak (400) granädakuna (tsay granädakunata rurarqan ishkay fïla warkaränanpaq),
43 chunka carrëtakuna,carrëtakunapaq chunka lavatoriukuna,
44 chunka ishkay törukuna,törukuna jananman jamananpaq lamar nishqan jatun lavatoriu,
45 mankakuna,palëtakunay tazonkunapis.
Lapan tsaykunatami Hiramqa TAYTA DIOSPA wayinpaq rey Salomón nishqannöla broncipita chipchipyaykaqta rurarqan.
46 Mituwan moldita ruraykurmi tsaykunata fundirqan Sucotwan Saretán markakuna tinkuqcho. Tsayqa karqan Jordán mayu nawpan pampachömi.
47 Broncipita tsaytsika manëjukunata ruratsirmi ayka broncita gastashqantapis Salomón pësatsirqannatsu.
48 Tsaynölami TAYTA DIOSPA templunman churapäkunanpaq wakin manëjukunatapis Salomón ruratsirqan. Tsay manëjukunaqa kaynömi karqan:qoripita *altar,tanta churakuna qoripita mësakuna,
49 Lugar Santïsimu alawqa kaq läduman churananpaq qoripita rurashqa pitsqa candelabrukuna,Lugar Santïsimu itsuq kaq läduman churananpaq qoripita rurashqa pitsqa candelabrukuna,wayta niraq adornukuna,mechërukuna,tenäzakuna,
50 cöpakuna,mëchapa liptanta jorqunanpaq taksha alicätikuna,tazonkuna,wishlakuna,inciensu qoshtatsikuna,Lugar Santïsimuman yaykuna punkupa bisagrankunay templu punkupa bisagrankunapis.
Lapan tsaykunaqa qoripita rurashqami karqan.
51 TAYTA DIOSPA templunta ruratsiyta usharkurnami templupa manëjunkunata tsayman churananpaq Salomón apatsirqan. Tsay manëjukunataqa ruratsirqan TAYTA DIOSPAQ taytan David churashqan qoripita y qellaypitami.
Ichic wilacuycuna
^ 7.21 Jaquín ninanqa kamakätsin ninanmi. Boaz ninanqa munayniyuq ninanmi.
^ querubín Querubinqa älayuq angilkunami karkaykan. Querubinkunatami Tayta Dios churarqan Edén huertata täpananpaq (Gén. 3.24). Tsaynölami Pactu Babulpa tsapanan jananchöpis qoripita rurashqa ishkay querubinkuna ichiraykarqan (Éxo. 25.18-22; Heb. 9.5). Salomón ruratsishqan templuchöpis ishkay querubinkunami qoriwan enchapashqa karqan. Tsay querubinkunapa altunmi karqan chusku metru pulan (1Rey. 6.23-29). Profëta Ezequielpis revelacionchömi querubinkunata rikarqan (Eze. 10.1-22; 41.18-19).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
