1 Reyes 9:1-28
9 Yarpashqannömi Salomónqa TAYTA DIOSPA templunta, rey täkunan palaciuta y lapantapis munashqan kaqta sharkatsiyta usharqan.
2 Tsaypitanami Gabaóncho yuripashqanno* Salomónta yapay TAYTA DIOS yuriparkur
3 kayno nirqan: “Mayashqämi nawpächo ruwakamar manakamashqaykita. Imayyaqpis adorapäkamänanpaqmi sharkatsishqayki templuta chaskishqä. Imapis mana pasananpaqmi tsay templuta imaypis rikashaq.
4 “Qampis taytayki Davidno lapan shonquykiwan noqata cäsukamar jutsata mana ruraypa lapan leynïkunata y mandamientükunata cumpliptikiqa
5 papäniki Davidta promitishqänölami qampita miraqkuna imayyaqpis Israel runakunapa mandaqnin rey kanqa.*
6 “Qamkuna y qampita miraqkunapis leynïkunata y mandamientükunata mana cäsukushpayki juk dioskunata adoraptikiqa
7 qoykushqä nacionpita qarqushaykimi. Adorapäkamänaykipaq chaskishqä templutapis kachariykushaqmi. Qamkunata castigaptïmi juk lädu nacioncho taq runakunapis kushipäshushpayki manakaqman churashunkipaq.
8 Kay templu raqälana kaykaqta rikaykurmi runakuna mantsakashpan kayno nipäkunqapaq: ‘¡Imanirraq kay nación runakunata y kay templutapis TAYTA DIOS ushakätsishqa!’*
9 Tsayno niptinmi kayno nipäkunqa: ‘Yärakushqan TAYTA DIOSTA qonqakuykur juk dioskunata adorar adorapäkushqanpitami paykunata tsayno pasashqa. Unay aylunkunata Egiptupita Tayta Diosnin jorqaykämuptinpis mana cäsukushqanpitami tsayno castigashqa’ ”.
Rey Salomón wakin rurashqankuna
2 Crónicas 8.1-18
10 TAYTA DIOSPA templunta y rey täkunan palaciuta ishkay chunka (20) watachömi Salomón sharkatsiyta usharqan.
11 Templuta sharkatsinanpaq cedru qeruta, ciprés qeruta y qoritapis nistashqan tupumi Tiro markapa mandaqnin rey Hiram kamariparqan. Tsayno kamaripashqanpitanami rey Salomónqa Galileacho ishkay chunka (20) markakunata qoykurqan.
12 Tsaymi Hiram aywarqan Salomón qoykushqan markakunata rikananpaq. Itsanqa gustunpaq mana kaptinmi
13 Salomónta kayno nirqan: “Amïgu, ¿imanirtaq tsay niraq markakunataqa qoykamashqanki?”
Tsay markakuna mana välishqanta nishqanpitami tsay partitaqa Cabul* jutiwan reqipäkun. Kananyaqpis tsaynölami tsay partipa jutin kaykan.
14 Salomónman Hiram apatsishqan qori karqan kimsa waranqa isqun pachak soqta chunka (3,960) kïlumi.
15 Rey Salomónqa faynaypami arutsirqan TAYTA DIOSPA templunta, kikinpa palaciunta, patak kananpaq Milo perqata y Jerusalén markapa murällanta. Tsaynöpis altsatsirqan Hazor, Meguido y Gezer markakunata.
16 Nawpatami Gezer markaman chayaykushpan Egiptupa mandaqnin rey Faraón tsaycho taq cananeo runakunata lapanta wanurkatsir wayikunatapis rupatsir usharqan. Nirkurnami Salomónwan tätsishqan warmi tsurinta tsay markata qoykurqan.
17 Tsaymi Salomónqa altsatsirqan Gezer markata. Tsaynölami altsatsirqan ura kaq Bet-horón markata,
18 Baalat markata y chunyaqcho kaykaq Tadmor markatapis.
19 Tsaynöla altsatsirqan mikuy churakunan markakunata, guërra carrëta churakunan wayikunata y cawallun muntashqa aywaq soldädukunapa cuartilninkunata. Tsaynölami lapan yarpashqankunata ruratsirqan Jerusaléncho, Líbanucho y maytsaychöpis mandashqan kaqchöqa.
20 Tsay witsan Israel nacioncho tarkaykarqanraqmi amorreo runakuna, heteo runakuna, ferezeo runakuna, heveo runakuna y jebuseo runakuna. Paykunaqa manami Israel runakunatsu karqan.
21 Tsay runakunapa unay aylunkunataqa Israel runakuna nacionninman yaykuykur manami wanutsirqantsu. Tsaymi tsay runakunapita miraqkunaqa Israel nacioncho kaykaptinraq Salomón churarqan faynakunacho arupäkunanpaq. Kananyaqpis tsaynölami paykunaqa faynakunacho arupäkun.
22 Israel runakunatami itsanqa mana obligarqantsu faynacho arunanpaq. Tsaypa trukanqa paykunata churarqan soldädukuna, autoridäkuna, mandaqkuna, capitankuna, carrëta manijaq soldädukuna y cawallun muntashqa aywaq soldädukuna kananpaqmi.
23 Salomónpa aruqninkunapa capatazninkunami karqan pitsqa pachak pitsqa chunka (550). Paykunami faynacho runakunata arutsiq.
24 *Davidpa Markancho taykashqanpita Faraónpa warmi tsurin witikurqan Salomón ruratsipashqan palaciuman. Tsaycho taptinnami Milo nishqan patak kananpaq perqarkatsir alpata qotutsirqan.
25 Templuta sharkatsiyta usharkurmi cada watacho kimsa kuti* Salomón ruratsishqan *altarcho rupatsina sacrificiukunata y ali kawakuy sacrificiukunata rupatsipäkuq. Tsaynölami inciensuwanpis TAYTA DIOSPAQ qoshtatsipäkuq.
26 Tsaynölami *büquikunatapis rey Salomón ruratsirqan Ezión-geber markacho. Tsayqa kaykan Puka Lamarpa* kuchuncho y Elatpa nawpanchömi. Elatqa Edom nacionchömi kaykan.
27 Payta yanapananpaqmi rey Hiram tsayman kacharqan büqui manijaq capitankunata.
28 Tsaynöpami tsay runakuna Salomónpa capitanninkunawan lamarpa aywashpan Ofirman chayapäkurqan. Ofirpitami Salomónpaq apamurqan cäsi chunka chusku waranqa (14,000) kïlu qorita.
Ichic wilacuycuna
^ 9.5 2Sam. 7.11-16; 1Rey. 2.4.
^ 9.8 2Rey. 25.9; 2Crón. 36.19.
^ 9.13 Hebreo idiömacho Cabul ninanqa manakaqpaq ninanmi.
^ Davidpa Markan Davidpa Markanqa manami David yurishqan Belén markatsu karqan, sinöqa Sión jirkancho kaykaq Jerusalén markami. Tsayno jutin karqan jebuseo runakunata tsaypita David qarqushqa kaptinmi (2Sam. 5.6-7). Tsaychömi reypa palaciunta y templuta sharkatsipäkurqan. Jerusalén marka jatunyaptinpis Sión jirkancho kaykaq partilatami Davidpa Markan kashqanta nipäkun.
^ 9.25 Éxo. 23.17; 34.23; Deut. 16.16.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
^ 9.26 Tsay Puka Lamarqa manami Egiptupita yarqur Israel runakuna pasashqan Puka Lamartsu karqan, sinöqa Golfo de Acaba nishqan lamarmi karqan.
