1 Samuel 11:1-15
11 Amonita runakunapa mandaqnin rey Nahasmi soldädunkunata shuntarkur Galaad particho kaykaq Jabes markaman aywarqan Israel runakunata atacananpaq. Tsayman chayaykuptinmi Jabes runakuna kayno nipäkurqan: “Atacamänaykipa trukanqa *pactuta rurashun munaynikicho kawapäkunäpaq”.
2 Tsaymi rey Nahas kayno nirqan: “Qamkunawanqa pactuta rurashaq lapanikipa alawqa kaq nawikita jorqurkurraqmi. Tsaynöpami lapan Israel runakunata manakaqman churashaq”.
3 Tsayno niptinmi Jabes mayor runakuna kayno nipäkurqan: “Qanchis junaq shuyaykalämay intëru Israel nacionpa nishqaykita wilakatsinäyaq. Tsaycho pipis yanapamänanpaq mana shamuptinqa nishqaykinöchari kanqa”.
4 Tsayno nishqanta Nahas awniptinmi wilakuqninkunata kachapäkurqan. Saúl tashqan Gabaa markaman chayaykur wilaptinmi lakikushpan lapan waqapäkurqan.
5 Saúlnami chakrancho arushqanpita törunkuna qatishqa chayarqan. Runakuna waqaykaqta tarirmi kayno tapurqan: “¿Imanirtaq waqarkaykanki?” Tsayno tapuptinmi wilapäkurqan Jabes runakuna wilashqanta.
6 Wilaptinmi Tayta Diospa Espïritun Saúlta valorta qorqan mana mantsakuypa amonita runakunawan pelyananpaq. Tsaymi pasaypa rabyashpan
7 ishkay törukunata pishtarir pedäzu pedäzu kutsurqan. Nirkurmi wilakuqkunawan apatsirqan intëru Israel nación markakunaman. Tsay markakunaman chayaykurmi kayno nipäkurqan: “Mayqanikipis Saúlta y Samuelta pelyäshiq mana aywaptikiqa töruykitapis kaynömi pedäzu pedäzu kutsunqa”.
Tsayno nishqanta mayarmi Israel runakuna pasaypa mantsakärishpan pelyäshinanpaq Bezeccho lapan juntakarqan.
8 Bezeccho juntakaq runakunata Saúl yupaptinmi kimsa pachak waranqa (300,000) runakuna Israelpita karqan y kimsa chunka waranqa (30,000) runakunanami Judápita karqan.*
9 Nirkurna Jabesman kutipäkunanpaq wilakuq aywaqkunata Saúl kayno nirqan: “Jabes runakunata wilapäkuy wara manaraq pulan junaq kaptin aywaykamur salvanäpaq kashqanta”.
Tsaymi wilakuq runakuna kutiykur wilapäkuptin Jabes runakuna pasaypa kushikärirqan.
10 Tsaypitanami amonita runakunapa mandaqnin rey Nahasta kayno nipäkurqan: “Wara junaqmi shapäkamushaq nawïta jorqunaykipaq”.
11 Tsaymi waraynin* junaq soldädunkunata Saúl rakirqan kimsa puntaman. Patsa manaraq waraptinmi tsay kimsa punta soldädukuna amonita runakunaman elaqpita yaykuykur wanutsipäkurqan pulan junaqyaq. Mana wanutsishqan kaq amonita runakunami wakpa kaypa matsiypa matsir qeshpipäkurqan.
12 Tsayno vincirkurmi Israel runakuna Samuelta kayno nipäkurqan: “¿Pitaq mana criyirqantsu Saúl mandamaqnintsi rey kananpaq kashqanta? Tsay runakuna pï kashqantapis wilamay wanutsipäkunäpaq”.
13 Tsayno niptin Saúl kayno nirqan: “Kanan junaq TAYTA DIOS Israel runakunata salvaykaptinqa manami pipis wanunqatsu”.
14 Tsawraqa lapan runakunata Samuel kayno nirqan: “Gilgal markaman aku aywashun rey kayta Saúl qalaykunanpaq”.
15 Tsayno niptinmi lapan runakuna Gilgalman aywapäkurqan. Jawka kawakuy sacrificiuta rupatsishpanmi TAYTA DIOSPA nawpancho Saúlta churarqan rey kananpaq. Tsaymi fiestata rurashpan lapanpis kushikärirqan.
Ichic wilacuycuna
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 11.8 Saúl kawashqan witsan Israel nación juklayla kaptinpis ishkay parti kashqantami nipäkurqan. Norti kaq partipa jutinmi karqan Israel y sur kaq partipa jutinmi karqan Judá.
^ 11.11 Wakin runakunaqa warantin nipäkun.
