1 Samuel 13:1-23
13 Israel runakunata mandayta qalaykushqan witsan Saúl poqushqa mözunami karqan. Ishkay wata mandaq kaykarmi
2 Israel runakunapita kimsa waranqata (3,000) akrarqan soldädunkuna kananpaq. Mana akrashqan runakunatami nirqan wayinkunapa kutikärinanpaq. Tsay kimsa waranqa akrashqan soldädukunapitami ishkay waranqata (2,000) akrarqan Micmascho y Bet-el jalqacho paywan quëdananpaq. Juk waranqa (1,000) soldädukunatanami kacharqan Benjamín trïbu runakuna tashqan Gabaa markaman Jonatánwan aywananpaq.
3 Soldädunkunawan Gabaaman Jonatán chayaykurmi filisteo runakunapa cuartilninta atacar soldädukunata wanutsipäkurqan. Tsayno vincishqanta musyaykurmi Filistea nacioncho taq runakuna pasaypa rabyakärirqan. Filisteo runakuna atacananpaq kashqanta musyarmi hebreo* runakuna juntakänanpaq *cornëtata intëru Israel nacioncho Saúl tukatsirqan.
4 Cada markacho juntakaptinmi wilapäkurqan filisteo soldädukunata Jonatán wanutsishqanta. Tsaynöpis wilapäkurqan filisteo runakuna pasaypa rabyashqa aywarkaykämushqanta. Tsawraqa filisteo soldädukunawan pelyananpaqmi Israel soldädukuna Gilgal markaman Saúlwan juntakarqan.
5 Filisteo runakunapis juntakarqan Israel runakunawan pelyananpaq. Filisteo runakunapami karqan kimsa chunka waranqa (30,000) carrëtankuna y soqta waranqa (6,000) cawallun muntashqa soldädunkuna. Chakilapa aywaq soldädukunanami karqan lamar kuchuncho aquyshanöraq yupaytapis mana atipaypaq. Paykunami juntakarqan Micmasman. Micmasqa Bet-avén inti jeqamunan kaq lädupami karqan.
6 Tsaymi Israel runakuna pasaypa mantsakushpan pakakärirqan machaykunaman, raqrakunaman, qaqakunaman, zanjakunaman y tsaki pözukunaman.
7 Wakin kaqnami qeshpishpan Jordán mayuta tsimparir Gad partiman y Galaad partiman aywakärirqan.
Runakuna aywakuptinpis Saúlqa Gilgalchömi soldädunkunawan kaykarqan. Tsaychömi soldädunkunaqa pasaypa mantsakurqan.
8 Puntatami Samuelwan wilanakushqa karqan qanchis junaq tsaycho payta shuyänanpaq.* Qanchis junaq Saúl shuyaraykaptinpis Samuelqa manami Gilgalman chayarqantsu. Tsawraqa runakuna waran waran qeshpir aywakäriptin
9 Saúl kayno nirqan: “Uywakunata jukla apapäkamuy rupatsina sacrificiuta y jawka kawakuy sacrificiuta rupatsinantsipaq”.
Uywakunata apaptinmi pishtarkatsir rupatsina sacrificiuta kikin Saúl rupatsirqan.
10 Sacrificiuta rupatsiyta ushaykaptinnami Samuel chayarqan. Tsawraqa Saúl aywarqan Samuelta winchikunanpaq.
11 Tinkurmi Samuel kayno nirqan: “¿Imanirtaq sacrificiuta rupatsishqanki?”
Tsayno niptin Saúl kayno nirqan: “Jitapämashqayki junaq mana chayamuptiki y runakuna kachariykamar aywakäriptinmi tsayno rurashqä. Tsaynöpis filisteo runakuna atacamänanpaqmi Micmascho juntakashqa karkaykan.
12 Tsaymi yarpashqä TAYTA DIOSTA manaraq manakuptï atacamänanpaq kashqanta. Tsaynöpis mana chayamuptikimi sacrificiuta kikïna rupatsishqä”.
13 Tsayno niptin Samuel kayno nirqan: “Lutantami rurashqanki. TAYTA DIOS nishqanta wiyakuptikiqa qampita miraqkunalami Israel runakunapa mandaqnin rey kanman karqan.
14 Payta mana wiyakushqaykipitami juk runatana akranqa Israel runakunapa mandaqnin rey kananpaq. Tsay runaqa TAYTA DIOSPA shonqunpaqnömi kanqa”.*
15 Nirkurnami Samuelqa Gilgalpita aywakurqan.
Saúlnami soldädunkunata pushakurkur Benjamín trïbu runakuna tashqan Gabaa markaman chayarqan. Tsaycho soldädunkunata yupaptin soqta pachaklanami (600) karqan.
16 Tsawraqa Saúl y tsurin Jonatánmi Gabaacho campamentuta ruratsirqan. Filisteo soldädukunami campamentuta rurapäkurqan Micmascho.
17 Filisteo soldädukunami kimsa puntaman rakikaykur Micmascho campamentunpita yarqupäkurqan Israel runakuna tashqan markakunata asulananpaq. Juk punta aywapäkurqan Sualcho kaykaq Ofra marka lädupa.
18 Juk puntami aywapäkurqan Bet-horón lädupa y jukaq puntanami aywapäkurqan Zeboim raqra janaqan chunyaq jirka lädupa.
19 Israel runakunata munaynincho tsarararmi filisteo runakuna mana kachaparqantsu ni juklaylapis herrëru kananta. Tsayno mana kachaparqantsu espädakunata ni lanzakunata rurananta mana munarmi.
20 Tsaymi Israel runakuna filisteo runakunamanraq aywapäkuq rëjankunata*, azadonninkunata, hächankunata aguzatsinanpaq y ösinkunata afilatsinanpaq.
21 Rëjata y azadonta aguzapashqanpitami pusaq grämu qellayta cobrapäkuq. Hächata y picata aguzapashqanpitanami chusku grämu qellayta cobrapäkuq.
22 Tsaynöpami filisteo soldädukunawan pelyanan junaq Israel soldädukunapa mayqanpapis espädan ni lanzanpis mana karqantsu. Saúlpa y Jonatánlapami karqan.
23 Juk punta filisteo soldädukunami aywapäkurqan Micmas raqraman Israel runakunata tsapänanpaq.
Ichic wilacuycuna
^ 13.3 Hebreo runakunaqa Israel runakunami kaykan.
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ 13.8 1Sam. 10.8.
^ 13.14 Hech. 13.22.
^ 13.20 Wakin runakunaqa lanchonninkunata nipäkun.
