1 Samuel 19:1-24
19 Tsaypitanami Davidta imanöpapis wanutsinanpaq tsurin Jonatánta y yanapaqninkunata Saúl nirqan. Jonatánnami Davidwan kuyanakur
2 wilarqan kayno nir: “Papänïmi imaykanöpapis wanutsishunaykipaq juraykan. Wara tuta tsaka tsakala yarqur maynilanmanpis pakakuy.
3 Pakaraykashqayki chakra cercanpa papänïwan yarqurmi tapushaq imata qampaq yarpashqantapis. Nirkurmi imata nimashqantapis wilashayki”.
4 Tsay nishqannölami waraynin* tuta Jonatánqa Davidpa favornin sharkur papäninta kayno nirqan: “Papä, ¿imanirtaq yanapashuqniki Davidta wanutsiyta munaykanki? Payqa manami imaypis contrayki sharkushqatsu. Tsaypa trukanqa lapanchöpis yanapaykäshunkimi.
5 Wanuyta mana mantsakuypa Goliatta wanutsiptinmi filisteo runakunapita Israel runakunata TAYTA DIOS salvashqa. Kikikipis Goliatta vinciykuptin kushikurqaykimi. Jutsaynaq kaykaptinqa ¿imanirtaq Davidta wanutsiyta yarpaykanki?”
6 Jonatán tsayno niptinmi tantiyakushpan Saúl kayno nirqan: “Rasunpapis Davidta manami wanutsïmantsu. Payta mana wanutsinäpaq TAYTA DIOSPA jutincho jurarmi promitï”.
7 Tsaypitanami Jonatánqa Davidta qayaykatsir wilaparqan papänin nishqankunata. Nirkurnami papänin kaqman pushaptin nawpata yanapashqanno Saúlta yapay David yanaparqan.
8 Tsaypita yapay guërra kaptinmi soldädunkunata pushakurkur David aywarqan filisteo runakunawan pelyananpaq. Tsaycho mantsariypaq atacaptinmi filisteo runakuna qeshpir aywakärirqan.
9 Tsaypita juk junaqnami wayincho lanzan aptashqa Saúl kaykaptin TAYTA DIOS kachashqan *supay yapay löcutätsirqan. Tsaymi arpata David tukapaykaptin
10 wanutsiyta munar lanzanwan Saúl lanzaykurqan. David witikuriptinnami lanza chayarqan tapiaman jawikaqpaq. Tsaymi jinan höra David qeshpir aywakurqan.
11 Tsaymi soldädunkunata Davidpa wayinman kachar Saúl kayno nirqan: “Wayinpita David mana qeshpinanpaq jukla aywaykur täpapäkuy. Patsa wararkuptinna wayinpita yarqaykämuqta jukla wanutsipäkunki”.*
Papänin tsayno nishqanta musyaykurmi Davidta warmin Mical kayno nirqan: “Kanan tsakay mana qeshpikuptikiqa wara junaq wanutsishunkipaqmi”.
12 Tsayno nir waskawan warkuypa ventänapa urarpatsiptinmi David qeshpir aywakurqan.
13 Micalnami wayincho kaykaq juk ïduluta Davidpa cämanman punuykatsirqan. Cabra aqtsapita awashqa jawnata ïdulupa umanman churaparkurmi qataparkurqan.
14 Tsawraqa Saúl kachashqan soldädukuna Davidpa wayinman chayaptin Mical wilarqan David qeshyaykashqanta.
15 Kutiykur David qeshyaykashqanta wilaptinmi Saúl yapay kutitsirqan kayno nir: “¡Cämantinta kayman apapäkamuy wanutsinäpaq!”
16 Tsayno niptinmi soldädukuna aywar Davidpa cämancho taripäkurqan cabra aqtsapita awashqa jawnan jawnashqa ïduluta.
17 Tsayno tarishqanta wilapäkuptinmi Micalta qayaykatsir Saúl kayno nirqan: “Conträ runata qeshpirkatsir ¿imanirtaq lulapämashqanki?”
Tsaymi Mical kayno nirqan: “ ‘Qeshpikunäpaq mana kachamaptikiqa wanutsishayki’ nimaptinmi qeshpikunanpaq kacharishqä”.
18 Tsayno qeshpikushpanmi Ramá markaman aywakur Samuel kaqman David chayarqan. Tsaychömi Samuelta wilarqan lapan ima pasashqantapis. Tsaymi Naiot markaman ishkan aywakärirqan tsaycho tänanpaq.
19 Ramá markapa cercan Naiotcho David kaykashqanta wilaptinmi
20 soldädunkunata Saúl kacharqan prësu tsarimunanpaq. Tsay soldädukuna Naiotman chayashpanmi taripäkurqan Samuelwan wakin profëtakuna Diospa wilakuyninta wilakurkaykaqta. Tsaymi Tayta Diospa Espïritun parlatsiptin tsay soldädukunapis Diospa wilakuyninta wilakuyta qalaykärirqan.
21 Tsayno pasashqanta mayaykurmi yapay juk soldädukunatana Saúl kacharqan. Tsaymi paykunapis chayaykur Diospa wilakuyninta wilakuyta qalaykärirqan. Soldädunkunata kimsa kutina Saúl kachaptinpis tsaynölami pasarqan.
22 Tsaymi kikin Saúlna Ramáman aywarqan. Secú nishqancho jatun pözuman chayaykurmi runakunata tapukurqan Samuelpaq y Davidpaq. Tapukuptinmi wilapäkurqan Ramá cercancho kaq Naiot markacho kaykashqanta.
23 Naiotman aywaykaptinmi Tayta Diospa Espïritun Saúltapis parlatsirqan. Tsaymi Naiotman chayananyaq Tayta Diospa wilakuyninta wilakuraykar aywarqan.
24 Chayaykurmi Tayta Diospa wilakuyninta wilakushpan röpanta loqtirir tsay junaq y tsay paqas Samuelpa nawpancho qarapächula jitararqan. Tsaypita patsami runakuna kayno nipäkun: “¿Saúlpis Tayta Diospa profëtannaku?”*.
Ichic wilacuycuna
^ 19.4 Wakin runakunaqa warantin nipäkun.
^ supay Supaykunaqa Tayta Diosta mana cäsukuq angilkunami kaykan. Paykunami Satanás mandashqanta rurar runakunata qeshyatsin, löcuyätsin, chikinakatsin y yarpayninta pantakätsin Tayta Diospa ali wilakuyninta mana tantiyapäkunanpaq (Mat. 12.43-45; Mar. 1.23-26; Luc. 8.2). Masta musyanaykipaq liyinki Satanáspita tantiyatsikuyta.
^ 19.24 Unay Israel runakuna tsayno nipäkuq juk runa o juk warmi imaypis mana rurashqanta ruraptinmi. Tsaynölami kaykan 1Sam. 10.11-12 versïculukunachöpis.
