1 Samuel 2:1-36
2 Tsaynölami Anapis TAYTA DIOSTA alabar kayno nirqan:“TAYTA DIOS, yanapamashqaykipita lapan shonqüwanmi qamta agradëcikü.*Chikimaqnïkunapis mananami asipämanqanatsu.Wawata tarinäpaq yanapamashqaykipitami kananqa pasaypa kushikü.
2 “TAYTA DIOS, qamlami *santu kanki.Manami qampita juk diosqa kantsu.Manami pipis qamno yanapakuq kantsu.
3 “Pipis ama yachaq tukutsuntsu, alabakutsuntsu ni runa tukutsuntsu.TAYTA DIOSLAMI lapantapis musyan.Paymi runakuna imata rurashqantapis juzgan.
4 Paymi munayniyuqkunapa flëchantapis pakirin.Kalpaynaqkunatapis kalpayuq kananpaqmi yanapan.
5 Rïcukunataqa juk tantalapaq arupakunanyaqmi waktsayätsin.Mikanaqkunataqa pacha junta kananpaqmi kamaripan.Qoluq warmikunatapis qanchis olqu wawayuq kananpaqmi yanapan.Atska wawayuqkunataqa japalan rikakunanpaqmi wawankunata elqätsin.
6 “TAYTA DIOSMI kawaytapis wanuytapis qomantsi.Pay munaptinmi wanuntsipis y kawarimuntsipis.
7 TAYTA DIOSMI waktsayätsimantsi y rïcuyätsimantsipis.Paymi penqapaypaq kanantsipaqpis y ali rikashqa kanantsipaqpis churamantsi.
8 TAYTA DIOSMI waktsakunatapis yanapan.Caridä manakuqkunatapis taritsin.Nirkur respitädu kananpaq churan.
“Kay patsapa cimientunkunatapis paymi rurashqa.Tsay jananmanmi kay patsata jamatsishqa.
9 Pay munashqanno kawaq runakunataqa imapitapis tsapanmi.Fiyu runakunataqa lakikuypita wanunanpaqmi kacharin.
“Manami pipis kalpayuq kashqalanpitaqa munayniyuq rikakuntsu.
10 Contran sharkuq runakunataqa TAYTA DIOS ushakätsinqami.Paykunataqa jana patsapitami räyuwan mantsakätsin.Maytsaycho taq runakunata TAYTA DIOSMI juzganqa.
“Akrashqan reytami munayniyuq kananpaq yanapanqa.Paytami wakin runakunapita mas munayniyuq kananpaq yanapanqa”.
11 Tsaypitanami Elcana kutikurqan warminkunawan y tsurinkunawan Ramácho kaykaq wayinman. Tsurin Samueltanami kachaykurqan Elípa makincho TAYTA DIOSTA sirvinanpaq.
Elípa tsurinkuna mana cäsukuq kashqan
12 Elípa tsurinkunaqa TAYTA DIOSTA mana cäsukurmi jutsata rurar kawapäkurqan.
13 Tsaynöpis manami cumplirqantsu cüra kar rurananpaq kaqkunata. Tsaymi pipis Tayta Diosta adorananpaq apamushqan uywata pishtarkur yanukuykaptin cüraqa ashmayninta kachaq jatun tenedorta aptaparkur aytsata apamunanpaq.
14 Paymi perolpita karpis, jatun mankapita karpis, taksha mankapita karpis, caserölapita karpis jatun tenedorwan aytsata jorqurir cüra mikunanpaq apapaq. Tsaynölami cadala rurapäkuq Israel runakuna Siluman apashqankunata.*
15 Tsaynöpis wirata manaraq rupatsirmi ashmayninta cüra kachaq sacrificiupaq apamuq runata kayno ninanpaq: “Cürata kankapänäpaqshi chawalanpa aytsata qomanki. Yanushqa aytsataqa manashi munannatsu”.
16 Uywa apamuq runa “aytsata apanaykipaqqa puntata wirantaraq rupatsitsun” niptinpis cürapa ashmaynin kayno niq: “Juklami munaykä. Mana awnimaptikiqa kikïmi aptarkur apakushaq”.*
17 Sacrificiupaq uywata apamuptin tsayno rurarmi Elípa tsurinkuna TAYTA DIOSTA pasaypa rabyanätsirqan.
18 Samuelnami TAYTA DIOSTA sirvirqan lïnupita rurashqa *efodnin jatishqa.
19 Samuelpa mamanqa runanwan cada wata sacrificiuta rupatsinanpaq Siluman aywar tünicata awarkur Samuelpaq apaq.
20 Silucho kaptinmi Anata y Elcanata bendicionninta qoshpan Elí kayno nirqan: “TAYTA DIOSTA sirvinanpaq Samuelta kayman apapäkamushqaykipita mas wamraykikuna kananpaq bendicionninta qoykuläshunki”.
Tsaypitanami Elcanaqa warmin Anawan wayinpa kutikärirqan.
21 TAYTA DIOSPA bendicionninwanmi Anapa kimsa olqu wawankuna y ishkay warmi wawankuna karqan. Samuelqa TAYTA DIOSPA makinchömi winarqan.
22 Elí karqan pasaypa awkinnami. Pay musyarqanmi tsurinkuna lutanta rurar Israel runakunata rabyanätsishqanta. Tsaynöpis musyarqanmi Tinkuna *Sagrädu Toldu patiucho yanapaq warmikunawan kakushqanta.
23 Tsaymi tsurinkunata kayno nirqan: “Lapan runakunami jutsata ruraykashqaykita wilamashqa. ¿Imanirtaq tsayno kapäkunki?
24 Tsayno rurashqaykita runakuna rimashqanqa pasaypa penqaypaqmi kaykan. Tsaynöqa amana kawapäkuynatsu, hïju.
25 Pipis runa mayinta rabyanätsiptinqa TAYTA DIOS tsapaykunmanmi. Kikin Tayta Diosta rabyanätsiptinqa ¿piraq tsapanman?”
Taytan tsayno anyapaptinpis ushakätsinanpaq Tayta Dios destinashqa kaptinmi mana cäsukärirqantsu.
26 Samuelqa winaylan tupumi shumaq tantiyakurqan ali kawananpaq. Tsaymi Tayta Dios munashqanno kawaptin runakunapis kushikärirqan.
Elíta Diospa profëtan wilapashqan
27 Juk kutichömi Elíman chayaykur Tayta Diospa profëtan kayno nirqan: “TAYTA DIOSMI kayno nin: ‘Faraónpa munaynincho unay ayluykikuna Egiptucho kaykaptinmi milagrukunata rurar paykunata salvarqä.
28 Nirkurmi lapan trïbukunapita ayluyki Aarónta akrarqä sirvimaqnï cüra kananpaq. Paytami churarqä *altarnïcho sacrificiukunata rupatsinanpaq, inciensuwan qoshtatsinanpaq y *efodnin jatishqa* nawpäman yaykamunanpaq. Tsaynöpis nirqä Israel runakuna apamushqan sacrificiukunapita racionninkuna pay y paypita miraqkunapis chaskinanpaqmi.*
29 Tsayno kaykaptinqa ¿imanirtaq Israel runakuna apamushqan sacrificiukunata mana respitaykankitsu? Tsaynöpis ¿imanirtaq noqata cäsukamänaykipa trukanqa tsurikikunata mas cäsupaykanki? Paykunaqa noqapaq apapäkamushqan alinnin kaqkunata mikushpanmi werayarkaykan’.
30 “Tsaymi Israel runakunata kuyaq TAYTA DIOS kayno nin: ‘Tsayno rurashqanpitami imaypis sirvimaq cüra kananpaq unay ayluykikunata akrashqa karpis qampita miraqkunata ushakätsishaq. Noqata respitamaq kaqkunataqa yanapashaqmi. Manakaqman churamaqkunataqa penqaymanmi churashaq.
31 Tsaymi tsurikikunata ushakätsinäpaq höra chayaykämunna. Manami awkinyashqanyaqqa mayqanpis qampita miraqkuna kawanqatsu.
32 Wakin Israel runakunata shumaq yanapaptïpis qampita miraqkunaqa nakarmi kawapäkunqa. Tsaymi mayqanpis awkinyashqanyaqqa mana kawanqatsu.
33 Qampa miraqnikikunapita altarnïcho juk sirvimarpis pasaypa lakikur y waqalarmi kawanqapaq. Qampita miraqkunataqa wakinta wanutsishaqmi.
34 Nishqänöla lapanpis kananpaq kashqantaqa musyankipaq tsurikikuna Ofni y Finees tsay junaqla wanuptinmi.
35 “ ‘Qampita miraqkuna ushakaptinpis juk aylupitanami akrashaq paykunapa trukan sirvimaq cürakuna kananpaq. Payqa imaypis nishqäta rurarmi kawanqapaq. Tsaynöpis paypita miraqkunami akrashqä reykunata sirvir imaypis cüra kanqapaq.
36 Qampita miraqkunapita kawaykar quëdaq kaqmi paypa nawpanman qonqurpakunqa qellayta karpis o tantata karpis manakushpan. Tsaynöpis payta manakärinqa cürakunacho arupakur ukushninta watarkunanpaq’ ”.
Ichic wilacuycuna
^ 2.1-10 Sal. 113.5-9.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 2.14 Cüraqa manami munashqan kaq partikunatatsu mikunman karqan, sinöqa töcashqan derëchun kaqlatami. Tsaypita musyanaykipaq liyinki Lev. 7.31-32; Deut. 18.3.
^ 2.16 Manaraq aytsata mikur puntataqa wirantaraq altarcho Tayta Diospaq rupatsinan karqan. Tsayta musyanaykipaq liyinki Éxo. 29.13; Lev. 3.3-5.
^ efod Efodqa cüra jatikunan mandilmi karqan. Tsaytaqa Israelcho mas mandaq cürami röpan jananman jatikuq (Éxo. 28.6-14). Tsay efodchömi laqararqan chunka ishkay rumikuna. Cada rumichömi kaykarqan Israel trïbupa juk jutin. Wakin runakunapis mas jukniraq efodta jatikuqmi. Tsay runakuna karqan Samuel (1Sam. 2.18), David (2Sam. 6.14), Nobpita kaq cürakuna (1Sam. 22.18) y Micaía (Jue. 17.5).
^ Sagrädu Toldu Liyinki Tinkuna Toldupita tantiyatsikuyta.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ efod Efodqa cüra jatikunan mandilmi karqan. Tsaytaqa Israelcho mas mandaq cürami röpan jananman jatikuq (Éxo. 28.6-14). Tsay efodchömi laqararqan chunka ishkay rumikuna. Cada rumichömi kaykarqan Israel trïbupa juk jutin. Wakin runakunapis mas jukniraq efodta jatikuqmi. Tsay runakuna karqan Samuel (1Sam. 2.18), David (2Sam. 6.14), Nobpita kaq cürakuna (1Sam. 22.18) y Micaía (Jue. 17.5).
^ 2.28a Éxo. 28.2-5.
^ 2.28b Lev. 7.35-36.
